ၸုမ်းဢူၺ်းလီပွတ်းႁွင်ႇ တင်း ၶွမ်ႊမသျိၼ်ႊလွင်ႈငမ်းယဵၼ် ႁူပ်ႉၵၼ် တီႈဝဵင်းၶုၼ်းမိင် ၸိုင်ႈမိူင်းၶႄႇ ဝႃႈၼႆ။
ဝၼ်းတီႈ 25/02/2019 ယၢမ်းၵၢင်ၼႂ် 10 မူင်း ထိုင် 3 မူင်းဝၢႆးဝၼ်း ၸုမ်းၶၢင် KIA၊ ၸုမ်းၵူဝ်းၵၢင်ႉ MNDAA၊ ၸုမ်း ရၶႅင်ႇ AA လႄႈ ၸုမ်းတဢၢင်း TNLA ႁူပ်ႉၵၼ် တင်း ၶွမ်ႊမသျိၼ်ႊလွင်ႈငမ်းယဵၼ် PC တီႈ World Trade Center ၸႄႈဝဵင်း ၶုၼ်းမိင် ၸိုင်ႈမိူင်းၶႄႇ။ ပၢင်ႁူပ်ႉၵၼ်ၼႆႉ ပဵၼ်ပၢင်ႁူပ်ႉဢုပ်ႇၵၼ်ၼွၵ်ႈလႅၵ်ႈ ၵဵဝ်ႇၵပ်းၶၵ်ႉၵၢၼ်လွင်ႈငမ်းယဵၼ် ဝႃႈၼႆ။
ၶၢႆႇတုၵ်ႉၶ ၽူႈၶၢၼ်ပၢၵ်ႇ ၸုမ်းရၶႅင်ႇ AA လၢတ်ႈဝႃႈ “ ၵဵဝ်ႇလူၺ်ႈလွင်ႈဢုပ်ႇဢူဝ်းၼႆႉ ပႆႇလႆႈႁူႉလၢႆးႁူဝ်ယွႆႈမၼ်း ၵပ်း သိုပ်ႇႁႃ ႁူဝ်ၼႃႈတင်းသွင်ၾၢႆႇၵေႃႈဢမ်ႇလႆႈ” ဝႃႈၼႆ။
ၼႂ်းပၢင်ႁူပ်ႉထူပ်းၵၼ်ၼႆႉ တင်းၾၢႆႇလူင်ပွင်ၸိုင်ႈသမ်ႉ ဢူးတဵင်းၸေႃႇ ၵႅမ်ႁူဝ်ပဝ်ႈ ၶွမ်ႊမသျိၼ်ႊလွင်ႈငမ်းယဵၼ်၊ ၸွမ် သိုၵ်း ၶိၼ်ႇၸေႃႇဢူး ၽူႈၼမ်းၼႂ်း၊ ဢူးဢွင်ႇသူဝ်း ၽူႈၶဝ်ႈၸုမ်းၶွမ်ႊမသျိၼ်ႊ၊ ဢူးလႃႉမွင်ႇသူၺ်ႇ ၽူႈပၼ်တၢင်းၶႆႈၸႂ် ၶွမ်ႊမသျိၼ်ႊလႄႈ ဢူးၶိၼ်ႇမွင်ႇတိၼ်ႇ ၵႅမ်ၽွင်းလူင် လုမ်းၵပ်းသၢၼ်တီႈၵိူဝ်းၵုမ် မိူင်းႁူမ်ႈတုမ် ၸဵမ်ၸိူဝ်းၼႆႉ။
လိူဝ်ၼၼ်ႉ တူဝ်တႅၼ်း ၸုမ်းဝႃႉ UWSA၊ ၸုမ်းမိူင်းလႃး NDAA လႄႈ ၸုမ်းဝၢၼ်ႈႁႆး SSPP ၸိူဝ်းၼႆႉ ၶဝ်ႈႁူမ်ႈ လဵပ်ႈႁဵၼ်း ပဵၼ်ၽူႈႁူႉႁၼ်ၸွမ်း ပဵၼ်သၢၵ်ႈသေႇ ဝႃႈၼႆ။
ၸုမ်းၶၢင် KIA၊ ၸုမ်းၵူဝ်းၵၢင်ႉ MNDAA၊ ၸုမ်းရၶႅင်ႇ AA လႄႈ ၸုမ်းတဢၢင်း TNLA ၼႆႉ ပဵၼ်ၼႂ်းလုၵ်ႈၸုမ်း FPNCC ဢၼ်ၸုမ်းဝႃႉ UWSA ဢွၼ်ႁူဝ်ဝႆႉ။
ၼႂ်းၸုမ်း FPNCC တင်းမူတ်း မီးလုၵ်ႈၸုမ်း 7 ၸုမ်း မိူၼ်ၼင်ႇ ၸုမ်းဝႃႉ UWSA၊ ၸုမ်းမိူင်းလႃး NDAA၊ ၸုမ်းဝၢၼ်ႈႁႆး SSPP၊ ၸုမ်းၶၢင် KIA၊ ၸုမ်းၵူဝ်းၵၢင်ႉ MNDAA၊ ၸုမ်းတဢၢင်း TNLA လႄႈ ၸုမ်း ရၶႅင်ႇ AA ၸိူဝ်းၼႆႉ။
ၶေႃႈမုလ်း – nmg news
