ၸွမ်ၸိုင်ႈ ဢူးဝိၼ်းမျိၼ်ႉ ဢွၵ်ႇလိၵ်ႈပွႆႇပၼ်ၵူၼ်းတူၵ်းၶွၵ်ႈထႅင်ႈ 6000 ပၢႆ ပိုၼ်ၽၢဝ်ႇတီႈၼႃႈဝႅပ်ႉသၢႆႉ လူင်ပွင်ၸိုင်ႈ မိူဝ်ႈၼႆႉၵၢင်ၼႂ်။
ၼႂ်းလိၵ်ႈပိုၼ်ၽၢဝ်ႇ ၸွမ်ၸိုင်ႈၼၼ်ႉပႃးဝႆႉဝႃႈ ဝၼ်းတီႈ 26 လိူၼ်ဢေႊပရိူဝ်ႊၼႆႉ ယူႇတီႈလူင်ပွင်ၸိုင်ႈမိူင်းႁူမ်ႈတုမ် မီးၵၢင်ၸႂ်ႁႂ်ႈပဵၼ်မိင်ႈၶႂၢၼ်ၼႂ်းပီမႂ်ႇမၢၼ်ႈ၊ ႁႂ်ႈၵူၼ်းမိူင်းလႆႈၵတ်းတူဝ်ယဵၼ်ၸႂ်၊ ႁႂ်ႈပဵၼ်လွင်ႈၵူၼ်းတေႃႇၵူၼ်း ဢီးလူတူၺ်းထိုင်ၵၼ်ၼႆသေ တေပွႆႇပၼ်ၵူၼ်းတူၵ်းၶွၵ်ႈ ဢၼ်မီးၼႂ်းၶွၵ်ႈ ပတ်းပိုၼ်ႉမိူင်းႁူမ်ႈတုမ် တႃႇ 6948 ၵေႃႉ။ ပွႆႇပၼ်လူၺ်ႈ ဢမ်ႇမီး ၶေႃႈၼွင်ႇငိူၼ်ႈၶႆသင်။ ၵူၼ်းတူၵ်းၶွၵ်ႈၸိူဝ်းၵိုတ်းဝႆႉၼၼ်ႉၵေႃႈ တေၵူတ်ႇထတ်းတူၺ်းထႅင်ႈလီလီသေ ဢၼ်ထုၵ်ႇလီပွႆႇပၼ်ၵေႃႈ တေသိုပ်ႇပွႆႇပၼ်ၵႂႃႇထႅင်ႈ ဝႃႈၼႆဝႆႉ။
မိူဝ်ႈဝၼ်းပီမႂ်ႇသွၼ်းၼမ်ႉ (ပီမႂ်ႇမၢၼ်ႈ) ဝၼ်းၼိုင်ႈ ဝၼ်းတီႈ 17/4/2019 ၼၼ်ႉၵေႃႈ ၸွမ်ၸိုင်ႈပိုၼ်ၽၢဝ်ႇပွႆႇပၼ်ၵူၼ်းတူၵ်းၶွၵ်ႈပတ်းပိုၼ်ႉတူဝ်ႈမိူင်း တႃႇ 9535 ၵေႃႉယဝ်ႉၵမ်းၼိုင်ႈ။
ၵွပ်ႈၼၼ်လႄႈ ၼႂ်းလိူၼ် ဢေႊပရိူဝ်ႊၼႆႉၵူၺ်း ယူႇတီႈၸွမ်ၸိုင်ႈ ပွႆႇပၼ် ၵူၼ်းတူၵ်းၶွၵ်ႈၵၢၼ်မိူင်းၵႂႃႇယဝ်ႉ 16483 ၵေႃႉ။
ၵူၺ်းၵႃႈ ၵူၼ်းတူၵ်းၶွၵ်ႈၵၢၼ်မိူင်းတႄႉ ပႃးလၢႆၵေႃႉၼႆ ဢမ်ႇပိုၼ်ၽၢဝ်ႇဝႆႉပဵၼ်တၢင်းၵၢၼ်။ ဢၼ်တိၵေႃႈ တိုၵ်ႉတိယဵတ်ႈၶွၵ်ႈယူႇတိၵ်းတိၵ်း ။
