ၵူၼ်းမိူင်းသီႇပေႃႉ ၵေႃႉၼိုင်ႈ ဢွၵ်ႇၼႄၵၢင်ၸႂ် ႁႂ်ႈၵိုတ်းပၢင်တိုၵ်းၼႂ်းမိူင်းတႆး ႁႂ်ႈလူင်ပွင်ၸိုင်ႈမိူင်းတႆး မိူင်းႁူမ်ႈတုမ် ၸွႆႈႁၢမ်ႈပၢင်တိုၵ်းပၼ် ဝႃႈၼႆ။
ၵူၼ်းမိူင်းသီႇပေႃႉ ၸိုဝ်ႈႁွင်ႉ ၵူဝ်ႇၺီႇလၢတ်ႉ တၢင်ႇယွၼ်းၶႂၢင်ႉ တႃႇၼႄၵၢင်ၸႂ် မိူဝ်ႈဝၼ်းတီႈ 24/03/2019 သေ ထိုင်မႃး ဝၼ်းတီႈ 26/03/2019 မၼ်းၸၢႆး ဢွၵ်ႇၼႄၵၢင်ၸႂ် ၵေႃႉလဵဝ် တုၵ်းယွၼ်းႁႂ်ႈၵိုတ်းပၢင်တိုၵ်း ဢၼ်ပဵၼ်ယူႇၼႂ်းမိူင်းတႆး ပွတ်း ႁွင်ႇၸိူဝ်းၼၼ်ႉ ဝႃႈၼႆ။
ၵူဝ်ႇၺီႇလၢတ်ႉ ယိပ်းပၢႆႉ ဢၼ်တႅမ်ႈဝႆႉဝႃႈ “ ၵူၼ်းမိူင်းတႆးပွတ်းႁွင်ႇ လႆႈတုၵ်ႉၶယၢပ်ႇၽိုတ်ႇၸွမ်းပၢင်တိုၵ်းၼႃႇယဝ်ႉလႄႈ ၶႂ်ႈႁႂ်ႈလူင်ပွင်ၸိုင်ႈတူၺ်းထိုင်ပၼ်။ သၢၼ်ၶတ်းၸုမ်းၸိူဝ်းသၢင်ႈပၢင်တိုၵ်း”ဝႃႈၼႆ။
ၵူဝ်ႇၺီႇလၢတ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ပၢင်တိုၵ်းဢၼ်ပဵၼ်ယူႇ ၼႂ်းမိူင်းရၶႅင်ႇ တင်းမိူင်းတႆးၼႆႉ ၶႂ်ႈႁႂ်ႈၵိုတ်းပၼ်ဝႆးဝႆး။ လွင်ႈတေၵေႃႇသၢင်ႈၾၢႆ ႁူဝ်ၼမ်ႉၵဵဝ် တီႈမိူင်းၶၢင်ၼၼ်ႉၵေႃႈ ၶႂ်ႈႁႂ်ႈၵိုတ်းၵမ်းလဵဝ်လႄႈ ၸင်ႇလႆႈမႃးၼႄၵၢင်ၸႂ်”ဝႃႈၼႆ။
မိူဝ်ႈတၢင်ႇယွၼ်းၶႂၢင်ႉတႃႇၼႄၵၢင်ၸႂ်ၼၼ်ႉ တၢင်ႇပႃးတႃႇၵူၼ်းတင်းၼမ်ယူႇသေတႃႉထိုင်ဝၼ်းၼႄၵၢင်ၸႂ်ၼၼ်ႉ ဢမ်ႇမီးၽႂ်မႃးႁူမ်ႈလႄႈ မၼ်းၸၢႆးၸင်ႇၼႄၵၢင်ၸႂ်ၵေႃႉလဵဝ်ၵူၺ်း ဝႃႈၼႆ။
ပၢင်တိုၵ်းသိုၵ်းသိူဝ်ၼႆႉ ပဵၼ်မႃးၶၢဝ်းတၢင်းႁိုင် ဢမ်ႇယဝ်ႉဢမ်ႇဝၢႆးသေပွၵ်ႈ ၵူၼ်းမိူင်းလႆႈဢွၼ်ၵၼ်ပၢႆႈယၢၼ်ႁိူၼ်းယေး ႁဵတ်းႁႂ်ႈတုမ်ႉတိူဝ်ႉပႃးသရေႇၼႃႈတႃ မိူင်းတႆး၊ မိူင်းႁူမ်ႈတုမ်လႄႈ ၸုမ်းယိပ်းၵွင်ႈၵၢင်ႇ ၸိူဝ်းၼႆႉ ဝႃႈၼႆ။
မၼ်းၸၢႆး သိုပ်ႇလၢတ်ႈဝႃႈ “ၶႃႈႁဝ်းၵေႃႈ ယုမ်ႇယမ် ၼပ်ႉထိုဝ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်းယူႇ။ ၵူၺ်းၵႃႈ တေဢဝ်မၢၵ်ႇ ၵွင်ႈသေ တိုၵ်းၵၼ်ၼႆႉ မီးလွင်ႈတုမ်ႉတိူဝ်ႉသေ ဢမ်ႇထိုင်တီႈလႆႈ။ ယွၼ်းႁႂ်ႈလႅၵ်ႈလွၵ်းလၢႆးသေ ဢုပ်ႇၵၼ်”ဝႃႈၼႆ။
လိူဝ်ၼၼ်ႉ မၼ်းၸၢႆးတုၵ်းယွၼ်းပႃးထႅင်ႈဝႃႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တီႉၺွပ်းၵူၼ်းမိူင်းၵႂႃႇၸိူဝ်းၼၼ်ႉၵေႃႈ ၶႂ်ႈႁႂ်ႈ လူင်ပွင်ၸိုင်ႈမိူင်းႁူမ်ႈတုမ် ဢူးဝိၼ်းမိၼ်ႉလႄႈ ၸွမ်ၽွင်းလူင်မိူင်းတႆးၶဝ် ဢွၵ်ႇသဵင်ႁၢမ်ႈသီးပၼ်ၽွင်ႈ ဝႃႈၼႆ။
ၵူဝ်ႇၺီႇလၢတ်ႉ သိုပ်ႇလၢတ်ႈဝႃႈ “ ၼၢင်းယိင်း၊ လုၵ်ႈဢွၼ်ႇလႄႈ ၵူၼ်းထဝ်ႈ လႆႈပၢႆႈၽေးသိုၵ်းၼၼ်ႉ ဢမ်ႇၶႂ်ႈႁၼ်သေ ဢိတ်းယဝ်ႉ။ ဢမ်ႇၶႂ်ႈႁႂ်ႈၸွမ်ၸိုင်ႈ၊ လူင်ပွင်ၸိုင်ႈပွႆႇမၢင်ဝၢင်းႁဵဝ်ႇပႅတ်ႈၵူၼ်းမိူင်းထူပ်းတၢင်းယၢပ်ႇၸိူဝ်းၼႆႉ။ ႁႂ်ႈတူၺ်းထိုင် ပၼ်ၵူၼ်းမိူင်းၽွင်ႈ ဝႃႈၼႆ။
တင်ႈတႄႇပီ 2018 ၼၼ်ႉမႃး တေႃႇထိုင် ယၢမ်းလဵဝ် ပၢင်တိုၵ်းဢၼ်ပဵၼ်ယူႇၼႂ်းမိူင်းတႆး ပႆႇယဵၼ်ပႆႇဝၢႆး ၵူၼ်းမိူင်းလႆႈပၢႆႈ ယၢၼ်ႁိူၼ်းယေး တီႈယူႇၵူႈဝၼ်း ဝႃႈၼႆ။
