ၵူၼ်းမိူင်းသီႇပေႃႉ ဢႃယု 54 ပီ ၺႃးၸုမ်းဢမ်ႇႁူႉၾၢႆႇယိုဝ်းသေ လႆႈတိူဝ်ႉၺႃးမၢၵ်ႇၵွင်ႈ 2 ႁွႆး တေႃႈလဵဝ် လႆႈသူင်ႇယူတ်း ယႃတူဝ်ဝႆႉတီႈႁူင်းယႃ လႃႈသဵဝ်ႈ။
ဝၼ်းတီႈ 1/9/2019 ယၢမ်းၵၢင်ၶမ်ႈ 8 မူင်းၶိုင်ႈၼၼ်ႉ ၸၢႆးၸေႃးတိၵ ဢႃယု 54 ပီ ၺႃးၸုမ်းဢမ်ႇႁူႉၾၢႆႇ ၶဝ်ႈယိုဝ်းၼႂ်း ႁိူၼ်းဢူၺ်းၵေႃႉမၼ်း တီႈပွၵ်ႉၸၢင်ႈၶမ်းၸၢၼ်း ႁိမ်းဝတ်ႉၽူဝ်းတေႃႇ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ လႆႈတိူဝ်ႉမၢတ်ႇၸဵပ်း 2 ႁွႆး တီႈပုမ်လႄႈ ၶႃၾၢႆႇၶႂႃ ဝႃႈၼႆ။
ၵူဝ်ႇမဵဝ်း ၸုမ်းၸွႆႈထႅမ်ပရႁိတပိုၼ်ႉတီႈႁၢမ်းၶွပ်ႇလႅၼ် သီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ မၼ်းၸၢႆးလႆႈတိူဝ်ႉမၢတ်ႇ ၸဵပ်း 2 ႁွႆး တီႈပုမ်ႁွႆးၼိုင်ႈလႄႈ တီႈၶႃလူင်ၾၢႆႇၶႂႃ ႁွႆးၼိုင်ႈ။ ယၢမ်းၵၢင်ၶိုၼ်း 10 မူင်း လႆႈသူင်ႇၵႂႃႇယူတ်းယႃတီႈလႃႈသဵဝ်ႈ” ဝႃႈၼႆ။
ၵူၼ်းပိုၼ်ႉတီႈ သီႇပေႃႉ ဢႃယု မွၵ်ႈ 45 ပီ လၢတ်ႈတီႈၽူႈတွႆႇႁွၵ်ႈဝႃႈ “ ၸုမ်းဢၼ်မႃးယိုဝ်းမၼ်းၸၢႆးၼၼ်ႉ ပဵၼ်ၸုမ်းလႂ် ၵေႃႉလႂ် ဢၼ်ဝႃႈၼၼ်ႉ ဢမ်ႇလႆႈႁူႉ။ လႆႈငိၼ်းဝႃႈတႄႉ မိူဝ်ႈၽွင်းမႃးယိုဝ်းၼၼ်ႉ မၼ်းၸၢႆးတိုၵ်ႉၼင်ႈလဵၼ်ႈမၢၵ်ႇလဵတ်း (ၶူင်ႇၸႄႇ)ယူႇ။ မီးၵူၼ်းၶဝ်ႈမႃး ႁွင်ႉဝႃႈ ၸၢႆးၸေႃးတိၵ ပဵၼ်ၽႂ်ၼႆသေ မၼ်းၸၢႆးၵေႃႈ တွပ်ႇဝႃႈ ဢေႃႈၶႃႈၼႆလႄႈ ၵူၼ်း ယိပ်းၵွင်ႈၼၼ်ႉ ယိုဝ်းသႂ်ႇမၼ်းၸၢႆးၵမ်းလဵဝ်” ဝႃႈၼႆ။
ၸၢႆးၸေႃးတိၵၼႆႉ ပဵၼ်ၵူၼ်းၸႃတိ ဝၢၼ်ႈတႃႈလူင်။ မိူဝ်ႈၶမ်ႈၺႃးယိုဝ်းၼၼ်ႉ မၼ်းၸၢႆးမႃးဢႅဝ်ႇႁိူၼ်းဢူၺ်းၵေႃႉမႃး တီႈပွၵ်ႉၸၢင်ႈၶမ်းၸၢၼ်းသေ ၺႃးယိုဝ်း။
“ ႁဵတ်းသင်လႄႈ ယိုဝ်းမၼ်းၸၢႆးဢၼ်ဝႃႈၼၼ်ႉတႄႉ ႁဝ်းၶႃႈၵေႃႈ ဢမ်ႇႁူႉၸွမ်းလွင်ႈတၢင်းမၼ်းၶႃႈ ဝႃႈမၼ်းၸၢႆး ၵဵဝ်ႇ ၶွင်ႈၸွမ်းလွင်ႈသင် မီးပၼ်ႁႃသင်ဝႆႉ ဢၼ်ဝႃႈၼၼ်ႉ” ၵူၼ်းပိုၼ်ႉတီႈ သီႇပေႃႉ ၵေႃႉၼိုင်ႈလၢတ်ႈၼႄၼင်ႇၼႆ။
ၼႂ်းၸႄႈဝဵင်းသီႇပေႃႉၼႆႉ တႄႇဢဝ်ပီ 2018 – 2019 မႃးၼႆႉ ၵူၼ်းမိူင်းဢၼ်ၺႃးၸုမ်း/ ၵေႃႉ ဢမ်ႇႁူႉၾၢႆႇၶဝ်ႈယိုဝ်း တီႈ ႁိူၼ်း လႄႈ ၵူၼ်းႁေႃႈၵႃးတၢင်ႇဝူဝ်း-ၵႂၢႆး ၸိူဝ်းၼႆႉ ဢမ်ႇယွမ်း 10 ၵေႃႉယဝ်ႉ ဝႃႈၼႆ။
ၸၢႆးဝိၼ်း ၵူၼ်းသီႇပေႃႉလၢတ်ႈဝႃႈ “ ၼႂ်းၶၢဝ်းတၢင်း 1 ပီ 2 ပီၼႆႉ ၸဵမ်ၵူၼ်းမိူင်း – ၵူၼ်းႁေႃႈၵႃး ၺႃးယိုဝ်း တၢႆ/ မၢတ်ႇၸဵပ်း ၵေႃႈၼမ်။ ၵူၼ်းဢၼ်ၺႃးယိုဝ်းတၢႆၼႆႉ ဢမ်ႇၶႂ်ႈယွမ်း 10 ၵေႃႉယဝ်ႉၶႃႈယူဝ်ႉ။ ၸုမ်းဢၼ်မႃးယိုဝ်းၼၼ်ႉ ပဵၼ်ၽႂ်ၸုမ်းလႂ် ၵေႃႉလႂ် ၼႆၵေႃႈ ယူႇတီႈၾၢႆႇ ပလိၵ်ႈၶဝ် ဢမ်ႇတွၼ်ႉတီႉလႆႈသေပွၵ်ႈ။ တေလႆႈဝႃႈ ၼႂ်းသီႇပေႃႉႁဝ်းၶႃႈၼႆႉ ဢမ်ႇ မီးလွင်ႈႁူမ်ႇလူမ်ႈသင်” ဝႃႈၼႆ။
ၼႂ်းၸႄႈဝဵင်းသီႇပေႃႉၼႆႉ မီးၸုမ်းယိပ်းၵွင်ႈၵၢင်ႇတူင်ႉၼိုင်ၵႂႃႇမႃး မိူၼ်ၼင်ႇ တပ်ႉသိုၵ်းလူင်ပွင်ၸိုင်ႈမၢၼ်ႈ၊ ၸုမ်းပျီႇတူႉ ၸိတ်ႉလႄႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸဵမ်ၸိူဝ်းၼႆႉ။
