ၵူၼ်းဝၢၼ်ႈၵုင်းသႃႇ ၸႄႈဝဵင်းသီႇပေႃႉ ၺႃးယိုဝ်း ပဵၼ်ၸုမ်းလႂ်ယိုဝ်းသႂ်ႇ ဢၼ်ဝႃႈၼၼ်ႉ ပႆႇႁူႉ ဝႃႈၼႆ။
ဝၼ်းတီႈ 09/05/2018 ယၢမ်းၵၢင်ၼႂ် 4 မူင်းပၢႆၼၼ်ႉ ၵူၼ်းဝၢၼ်ႈ ၵေႃႉၼိုင်ႈ ၸိုဝ်ႈႁွင်ႉ ၸၢႆးၵျေႃႇဢူး ဢႃယု 30 ပီ ၺႃးယိုဝ်းတီႈႁိူၼ်းမၼ်းၸၢႆး တီႈဝၢၼ်ႈၵုင်းသႃႇ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ မၼ်းၸၢႆးၺႃးယိုဝ်းသႂ်ႇတီႈၶႃ ၵူၺ်းၵႃႈ ပဵၼ်ၸုမ်းလႂ်ယိုဝ်းသႂ်ႇဢၼ်ဝႃႈၼၼ်ႉ ပႆႇႁူႉ ဝႃႈၼႆ။
ၵူဝ်ႇမဵဝ်း ၸုမ်း (နယ်စည်းမခြားပရဟိတ အဖွဲ့) ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းၶၢဝ်းတၢင်းသွင် ဝၼ်းထပ်းၵၼ်မႃးၼႆႉ ၵူၼ်းမိူင်းထုၵ်ႇၺႃးယိုဝ်း။ ၵူၺ်းၵႃႈ ပဵၼ်ၸုမ်းလႂ်ယိုဝ်းဢၼ်ဝႃႈၼၼ်ႉ ဢမ်ႇလႆႈႁူႉ။ ယွၼ်ႉဝႃႈ ၵပ်းသိုပ်ႇယွၼ်းတၢင်းၸွႆႈထႅမ်မႃးၼႆသေလႄႈ ႁဝ်းၶႃႈ လႆႈၵႂႃႇၸွႆႈဢဝ်ၵူၼ်းမၢတ်ႇၸဵပ်းၼၼ်ႉ မႃးတီႈႁူင်းယႃသီႇ ပေႃႉ ။ မိူဝ်ႈဝၼ်းတီႈ 8 ၼၼ်ႉၵေႃႈ ၵူၼ်းႁေႃႈၵႃးၵေႃႉၼိုင်ႈ ၺႃးယိုဝ်းလူႉတၢႆထင်တီႈ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈမၢၼ်ႈၸႄႈဝဵင်းသီႇပေႃႉ လႆႈၵႂႃႇၵူတ်ႇထတ်းတူၺ်းဢွင်ႈတီႈဢၼ်ပဵၼ်ၼၼ်ႉသေ မၢႆတွင်း ဝႆႉလွင်ႈပဵၼ်ၸိူဝ်းၼၼ်ႉ။ တေႃႈလဵဝ် တူဝ်ၸၢႆးၵျေႃႇဢူး လႆႈယူတ်းယႃတူဝ်ဝႆႉတီႈႁူင်းယႃၵူၼ်းမိူင်း ၸႄႈဝဵင်းသီႇပေႃႉဝႆႉယူႇ။
ၼႂ်းၸႄႈဝဵင်းသီႇပေႃႉၼႆႉ သိုၵ်းဢၼ်တူင်ႉၼိုင်ၵႂႃႇမႃး မီးသိုၵ်းလူင်ပွင်ၸိုင်ႈမၢၼ်ႈ၊ ၸုမ်းပျီႇတူႉၸိတ်ႉ တပ်ႉပလိၵ်ႈ၊ သိုၵ်း TNLA ၊ သိုၵ်း SSPP/SSA လႄႈ သိုၵ်း RCSS/SSA ၸိူဝ်းၼႆႉ ဝႃႈၼႆ။
မိူဝ်ႈလိူၼ်ၵျႅၼ်ႊၼိဝ်ႊရီႊၼၼ်ႉၵေႃႈ ၼႂ်းၸႄႈဝဵင်းသီႇပေႃႉၵူၺ်းၼင်ႇၵဝ်ႇ ၵႃးတၢင်ႇဝူဝ်းလမ်းၼိုင်ႈ ၺႃးယိုဝ်း ႁဵတ်းႁႂ်ႈၵူၼ်းမိူင်းတူၵ်းၸႂ်ဢမ်ႇပေႃးႁတ်းၵႂႃႇမႃးထၢင်ႇႁၢင်ႈလွတ်ႈလႅဝ်း မိူၼ်ၵူႈပွၵ်ႈယဝ်ႉ ဝႃႈၼႆ။
