ၸုမ်းဢူၺ်းလီပွတ်းႁွင်ႇ 3 ၸုမ်း ဢွၵ်ႇၶေႃႈပိုၼ်ၽၢဝ်ႇဝႃႈ တေၵိုတ်းၵၢၼ်တိုၵ်းသေ တေပႆၸွမ်း သဵၼ်ႈတၢင်း ၵၢၼ် မိူင်းၵႂႃႇ ယွၼ်ႉဝႃႈ ဢဝ်ၵၢၼ်သိုၵ်းသေ ၵႄႈလိတ်ႈၵၼ်မႃး ၶၢဝ်းတၢင်း 70 ပီပၢႆယဝ်ႉ ဢမ်ႇယဝ်ႉ ဢမ်ႇတူဝ်ႈလႆႈ ဝႃႈၼႆ။

ဝၼ်းတီႈ 12/12/2018 ႁူဝ်ၼႃႈ ၸုမ်းသိုၵ်းရၶႅင်ႇ AA၊ ၵူဝ်းၵၢင်ႉ MNDAA လႄႈ တဢၢင်း TNLA ႁူပ်ႉဢုပ်ႇၵၼ် တင်း ၶွမ်ႊမသျိၼ်ႊလွင်ႈငမ်းယဵၼ်မၢၼ်ႈ (PC) တီႈဝဵင်းၶုၼ်ႊမိင်ႊ ၸႄႈမိူင်းယုၼ်ႊၼၢၼ်ႊ ၸိုင်ႈမိူင်းၶႄႇ၊ ဢုပ်ႇၵုမ်ၵၼ် လွင်ႈၵၢၼ်ငမ်းယဵၼ် သေယဝ်ႉ ႁူမ်ႈၵၼ် ဢွၵ်ႇၶေႃႈပိုၼ်ၽၢဝ်ႇ။

ၼႂ်းၶေႃႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ ဢၼ်ၾၢႆႇလူင်ပွင်ၸိုင်ႈမၢၼ်ႈ ႁဵတ်းသၢင်ႈလွင်ႈငမ်းယဵၼ်လႄႈ လွင်ႈၸမ်ၸႂ် ၸိူဝ်ႉၸၢတ်ႈၼၼ်ႉ ယူႇတီႈၸုမ်းသိုၵ်းၵူဝ်းၵၢင်ႉ၊ ရၶႅင်ႇလႄႈ တဢၢင်းတႄႉ ႁၼ်လီၵမ်ႉထႅမ်ၸွမ်းယူႇ။ ယူႇတီႈ ၸုမ်း ဢူၺ်းလီ ပွတ်းႁွင်ႇ 3 ၸုမ်း၊ လူင်ပွင်ၸိုင်ႈလႄႈ တပ်ႉသိုၵ်းမၢၼ်ႈ ဢၼ်ပဵၼ်ပၼ်ႁႃၵၼ်ယူႇ ၵဵဝ်ႇလူၺ်ႈပၢင်တိုၵ်း လႄႈၵၢၼ် မိူင်းၸိူဝ်းၼၼ်ႉ မီးၵၢင်ၸႂ်ဝႃႈ ႁႂ်ႈႁူပ်ႉဢုပ်ႇဢူဝ်းၵၼ်သေ ၶႂ်ႈၵႄႈလိတ်ႈၵႂႃႇ။ လိူဝ်ၼၼ်ႉ ထႅင်ႈၾၢႆႇၼိုင်ႈ ၵေႃႈ ၼင်ႇႁိုဝ် ပေႃးတေလႆႈၶဝ်ႈပႃး ၼႂ်းၶၵ်ႉၵၢၼ်လွင်ႈငမ်းယဵၼ်ၼၼ်ႉ ယူႇတီႈ FPNCC ၵေႃႈ တိုၵ်းသူၼ်း ၾၢႆႇၼိုင်ႈ ၵေႃႈ ယူႇတီႈ တၢင်းမိူင်းၶႄႇၵေႃႈ ၶဝ်ႈႁဵတ်းၵၢင်ပၼ် ဝႃႈၼႆ။

လိူဝ်ၼၼ်ႉ ၼႂ်းၶၢဝ်းတၢင်း 70 ပီမႃးၼႆႉ ပၼ်ႁႃၼႂ်းမိူင်းၸၢဝ်းၶိူဝ်း ဢၼ်ပဵၼ်မႃးယူႇၼၼ်ႉ ဢဝ်သဵၼ်ႈတၢင်းၵၢၼ်သိုၵ်း သေၵႄႈလိတ်ႈၵၢၼ်မိူင်းမႃးၼၼ်ႉ ယင်းပႆႇၵႄႈလိတ်ႈသင်မႃးလႆႈ။ ယွၼ်ႉၼၼ်လႄႈ တေၵိုတ်းၵၢၼ်သိုၵ်းသေ တေပႆ ၸွမ်းသဵၼ်ႈတၢင်းၵၢၼ်မိူင်းၵႂႃႇ။ လိူဝ်ၼၼ်ႉ မုင်ႈမွင်းဝႃႈ ယူႇတီႈၾၢႆႇတပ်ႉသိုၵ်းမၢၼ်ႈၵေႃႈ တေမီးၵၢင်ၸႂ် ဢၼ်မၢၼ်ႇ မႅၼ်ႈသေ ၵုမ်းၵမ်ၼိမ်သဝ်း လွင်ႈပၢင်တိုၵ်းၼႂ်းမိူင်းၵႂႃႇယူႇ။ ၵွပ်ႈၼၼ်လႄႈ ယူႇတီႈၸုမ်းဢူၺ်းလီ ပွတ်းႁွင်ႇ 3 ၸုမ်း တႄႉ တေၶဝ်ႈၸွမ်းသဵၼ်ႈတၢင်းၶၵ်ႉၵၢၼ်လွင်ႈငမ်းယဵၼ် ဢၼ်ယူႇတီႈ NRPC ဢွၼ်ႁဵတ်းမႃးၼၼ်ႉသေ ၸင်ႇလႆႈ ႁူမ်ႈၵၼ်ဢွၵ်ႇ ၶေႃႈပိုၼ်ၽၢဝ်ႇမႃး ဝႃႈၼႆ။