ၸုမ်းဢူၺ်းလီပွတ်းႁွင်ႇ 3 ၸုမ်း ပိုၼ်ၽၢဝ်ႇ ႁၢမ်ႈၵူၼ်းမိူင်းၵႂႃႇမႃး ဢွၵ်ႇတႃႈပႆတၢင်း ၼႂ်းပိုၼ်ႉတီႈဢၼ်ပဵၼ်ပၢင်တိုၵ်းၵၼ် ၼႂ်းၸိုင်ႈတႆးပွတ်းႁွင်ႇၼၼ်ႉ ယွၼ်ႉၵူဝ်တုမ်ႉတိူဝ်ႉထိုင်သၢႆၸႂ်ၵူၼ်းမိူင်း ဝႃႈၼႆ။
ဝၼ်းတီႈ 28/8/2019 ယူႇတီႈၸုမ်းဢူၺ်းလီပွတ်းႁွင်ႇ 3 ၸုမ်း ပိုၼ်ၽၢဝ်ႇ ပၼ်ၾၢင်ႉ/ သတိထိုင် ၵူၼ်းမိူင်း ၸိူဝ်းဢွၵ်ႇ တႃႈပႆတၢင်း၊ ၵႃးတၢင်ႇၵုၼ်ႇတၢင်ႇၶူဝ်း ၵႃးလူင်၊ ၵႃးဢွၼ်ႇ ယႃႇပေၵႂႃႇၼႂ်းၵႄႈပၢင်တိုၵ်း ဢၼ်ပဵၼ်ပၢင်တိုၵ်းၵၼ်ယူႇ ၸိူဝ်းၼၼ်ႉ ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇ ဢွၵ်ႇဝႆႉဝႃႈ “ ၸုမ်းဢူၺ်းလီပွတ်းႁွင်ႇတင်း တပ်ႉသိုၵ်းလူင်ပွင်ၸိုင်ႈမၢၼ်ႈၼႆႉ ပဵၼ်ပၢင်တိုၵ်းၵၼ် ႁၢဝ်ႈႁႅင်းမႃးၵူႈဝၼ်း။ ၼႂ်းၵႄႈၼႆႉလႆႈႁၼ်သိုၵ်းမၢၼ်ႈ လႆႈလၵ်ႉၶီႇၸွမ်းရူတ်ႉၵႃး တၢင်ႇၵုၼ်ႇ၊ တေႃႉသူင်ႇၶိူင်ႈၵွင်ႈၵၢင်ႇၶဝ်။ သင်ဝႃႈ ၵူၼ်းမိူင်း ဢမ်ႇလိူဝ်လႆႈလႃးလႃး လူဝ်ႇၵႂႃႇ လူဝ်ႇပႆ ၵႂႃႇႁူင်းယႃၸိုင် ႁႂ်ႈပွင်ႇထိုင် ၵပ်းႁႃ ၸုမ်းဢူၺ်းလီပွတ်းႁွင်ႇ ဢၼ်တူင်ႉၼိုင်ယူႇဝႆႉႁိမ်းႁွမ်းၸိူဝ်းၼၼ်ႉသေ ၸင်ႇၵႂႃႇမႃး” ဝႃႈၼႆ။
ဝၼ်းတီႈ 27/8/2019 ယၢမ်းၵၢင်ၼႂ် မွၵ်ႈ 10 မူင်းၶိုင်ႈၼၼ်ႉ ရူတ်ႉၵႃး Crown လမ်းၼိုင်ႈ ၺႃးယိုဝ်း တီႈႁိမ်းလၢၼ်ႇၵဵပ်း ငိုၼ်း (တူဝ်းၵဵတ်ႉ) ၸႄႈဝဵင်းၵူတ်ႉၶၢႆ ၼိူဝ်သဵၼ်ႈတၢင်း မူႇၸေႊ – ၵူတ်ႉၶၢႆ ၸိုင်ႈတႆးပွတ်းႁွင်ႇ။ တိူဝ်ႉၺႃး ၵူၼ်းႁေႃႈၵႃး မၢတ်ႇၸဵပ်းတီႈဝႂ်ႁူ ၵေႃႉၼိုင်ႈ ဝႃႈၼႆ။
မိူဝ်ႈဝၼ်းတီႈ 25/8/2019 ၼၼ်ႉ ယူႇတီႈၸုမ်းဢူၺ်းလီပွတ်းႁွင်ႇ 3 ၸုမ်း ဢွၵ်ႇလိၵ်ႈပွင်ႇလႅင်းပၼ်ၾၢင်ႉၸူးၵူၼ်းမိူင်း ၸိုင်ႈ တႆးပွတ်းႁွင်ႇ ႁႂ်ႈဢွၼ်ၵၼ်ၶုတ်းလုၵ်းလိၼ်၊ ထၢင်လိၼ်ၵၼ်ဝႆႉ သေ သင်ဝႃႈ ငိၼ်းသဵင်ၵွင်ႈ၊ သဵင်မၢၵ်ႇတႅၵ်ႇၸိုင် ႁႂ်ႈဢွၼ် ၵၼ်ၵႂႃႇပၢႆႈမႅပ်ႉ/ မူၵ်းၼႂ်းလုၵ်းလိၼ်ၼၼ်ႉ။ ယႃႇပေၵႂႃႇမႃး တူင်ႉၼိုင်တၢင်းလႂ် သင်ပဵၼ်လႆႈႁႂ်ႈယူႇမူၵ်းဝႆႉ ၼႂ်း လုၵ်းလိၼ် တေႃႇသဵင်ၵွင်ႈသဵင်မၢၵ်ႇပေႃးယဵၼ် ဝႃႈၼႆ။
ၼႂ်းၸိုင်ႈတႆးပွတ်းႁွင်ႇၼႆႉ တႄႇဢဝ်ဝၼ်းတီႈ 15 လိူၼ်ဢေႃႊၵတ်ႊသ်ၼႆႉမႃး သိုၵ်းလူင်ပွင်ၸိုင်ႈမၢၼ်ႈ တင်း ၸုမ်းဢူၺ်း လီပွတ်းႁွင်ႇ ပဵၼ်ပၢင်တိုၵ်းၵၼ်မႃးႁၢဝ်ႈႁႅင်းၵူႈဝၼ်း။ ၼႂ်းၶၢဝ်းတၢင်း 14 ဝၼ်းမႃးၼႆႉ ပၢင်တိုၵ်းၵိူတ်ႇပဵၼ်ယူႇၵူႈဝၼ်းလႄႈ ၵူၼ်းမိူင်းဢၼ်လႆႈလူႉတၢႆၸွမ်း မီး 11 ၵေႃႉ၊ ဢၼ်လႆႈမၢတ်ႇၸဵပ်း သမ်ႉ မီး 25 ၵေႃႉ ယူႇတီႈၸုမ်းၸွႆႈထႅမ် ၵၢၼ်ၵူၼ်းၸွႆႈၵူၼ်း လၢတ်ႈၼႄဝႆႉၼင်ႇၼႆ။
