ပၢင်တိုၵ်းၼႂ်းၵႄႈတပ်ႉသိုၵ်းလူင်ပွင်ၸိုင်ႈလႄႈ တပ်ႉသိုၵ်းဢူၺ်းလီပွတ်းႁွင်ႇ ပဵၼ်ၵႂၢင်ႈယႂ်ႇမႃးတိၵ်းတိၵ်းလႄႈ ၵူၼ်းၵႂႃႇ တႃႈပႆတၢင်းႁႂ်ႈၾၢင်ႉယႂ်ႇၼမ် ဝႃႈၼႆ။
ဝၼ်းတီႈ 25/8/2019 ၼၼ်ႉ ယူႇတီႈၸုမ်းဢူၺ်းလီပွတ်းႁွင်ႇ 3 ၸုမ်း တပ်ႉသိုၵ်းတဢၢင်း၊ ၵဝ်ႈၵူင်ႉလႄႈ ရၶႅင်ႇ ႁူမ်ႈၵၼ် သေ ဢွၵ်ႇလိၵ်ႈပွင်ႇလႅင်းပၼ်ၾၢင်ႉၸူးၵူၼ်းမိူင်းၸိုင်ႈတႆးပွတ်းႁွင်ႇ ႁႂ်ႈဢွၼ်ၵၼ်ၶုတ်းလုၵ်းလိၼ်၊ ထၢင်လိၼ်ၵၼ်ဝႆႉ သေ သင်ဝႃႈ ငိၼ်းသဵင်ၵွင်ႈ၊ သဵင်မၢၵ်ႇတႅၵ်ႇၸိုင် ႁႂ်ႈဢွၼ်ၵၼ်ၵႂႃႇပၢႆႈမႅပ်ႉ/ မူၵ်းၼႂ်းလုၵ်းလိၼ်ၼၼ်ႉ။ ယႃႇပေၵႂႃႇမႃး တူင်ႉၼိုင်တၢင်းလႂ် သင်ပဵၼ်လႆႈႁႂ်ႈယူႇမူၵ်းဝႆႉၼႂ်းလုၵ်းလိၼ်တေႃႇသဵင်ၵွင်ႈသဵင်မၢၵ်ႇပေႃးယဵၼ် ဝႃႈၼႆ။
ၼႂ်းလိၵ်ႈပၼ်ၾၢင်ႉၵူၼ်းမိူင်း လၢတ်ႈဝႆႉထႅင်ႈဝႃႈ “ ယူႇတီႈၵူၼ်းမိူင်း၊ ၽူႈသိုဝ်ႇၶၢဝ်ႇ လႄႈ ၸုမ်းၸွႆႈ ထႅမ်တူင်ႇဝူင်းၵူၼ်း သင်ဝႃႈ တေဢွၵ်ႇတႃႈပႆတၢင်း တေၵႂႃႇတၢင်းလႂ်ၼႆၸိုင် ႁႂ်ႈဢွၼ်ၵၼ်လဵပ်ႈႁဵၼ်းႁူႉငဝ်းလၢႆးလီလီသေ ၸင်ႇၵႂႃႇ” ဝႃႈၼႆ။
လိူဝ်ၼၼ်ႉ သင်ဝႃႈ ၵူၼ်းမိူင်း ဢွၵ်ႇတႃႈပႆတၢင်း ၼႂ်းပိုၼ်ႉတီႈ ဢၼ်တပ်ႉသိုၵ်းတူင်ႉၼိုင်ယူႇဝႆႉၼၼ်ႉ မိူဝ်ႈၽွင်းပဵၼ်ပၢင် တိုၵ်းၵၼ်လႄႈသင် ၵူၼ်းမိူင်းလႆႈၵိုတ်းၶမ်ၼႂ်းၵႄႈသိုၵ်းၸိူဝ်းၼၼ်ႉ ၼင်ႇႁိုဝ် ၵူၼ်းမိူင်းပေႃးတေမီးလွင်ႈလွတ်ႈၽေး ၵၼ်ၼၼ်ႉ ပေႃးဝႃႈ ၵူၼ်းသိုၵ်းဢူၺ်းလီပွတ်းႁွင်ႇ ထဵတ်ႈထၢမ်ၵူၼ်းၵႂႃႇမႃးၸိုင် ၶႅၼ်းတေႃး ႁႂ်ႈပၼ်တၢင်းႁူမ်ႈမိုဝ်း ႁႂ်ႈပွင်ႇၸႂ်ပၼ်သေၵမ်း” ဝႃႈၼႆ။
ၵဵဝ်ႇၵပ်းလွင်ႈပဵၼ်ပၢင်တိုၵ်းၼႆႉသေ ၼႂ်းၸိုင်ႈတႆးပွတ်းႁွင်ႇၼႆႉ တႄႇဢဝ်ဝၼ်းတီႈ 15 လိူၼ်ဢေႃႊၵတ်ႊသ်ၼႆႉမႃး သိုၵ်းလူင်ပွင်ၸိုင်ႈမၢၼ်ႈ တင်း ၸုမ်းဢူၺ်းလီပွတ်းႁွင်ႇ ပဵၼ်ပၢင်တိုၵ်းၵၼ်မႃးႁၢဝ်ႈႁႅင်းၵူႈဝၼ်း။ ၼႂ်းၶၢဝ်းတၢင်း 14 ဝၼ်းမႃးၼႆႉ ပၢင်တိုၵ်းၵိူတ်ႇပဵၼ်ယူႇၵူႈဝၼ်းလႄႈ ၵူၼ်းမိူင်းဢၼ်လႆႈလူႉတၢႆၸွမ်း မီး 11 ၵေႃႉ၊ ဢၼ်လႆႈမၢတ်ႇၸဵပ်းသမ်ႉ မီး 25 ၵေႃႉ ယူႇတီႈၸုမ်းၸွႆႈထႅမ် ၵၢၼ်ၵူၼ်းၸွႆႈၵူၼ်း လၢတ်ႈၼႄဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ