ၵူၼ်းဝၢၼ်ႈဢွၼ်ၵၼ် သွၵ်ႈႁၼ် တူဝ်တၢႆ ၸၢႆးသၢမ်မူၼ်း ၵူၼ်းဝၢၼ်ႈပဵင်း ႁၢႆၵႂႃႇ မိူဝ်ႈၽွင်း RCSS တင်း ၸုမ်းဢူၺ်း လီပွတ်းႁွင်ႇ ပဵၼ်ပၢင်တိုၵ်းၵၼ် ၼႂ်းႁၢင်လိူၼ်ဢွၵ်ႊထူဝ်ႊၿိူဝ်ႊ ပူၼ်ႉမႃးၼၼ်ႉ ဝႃႈၼႆ။

ဝၼ်းတီႈ 07/11/2018 ယၢမ်းဝၢႆးဝၼ်း မွၵ်ႈ 4 မူင်း ၵူၼ်းဝၢၼ်ႈ ႁၼ်တူဝ်တၢႆ သၢမ်မူၼ်း (ၸၢဝ်းၶၢင်) ၼႂ်းၵႄႈဝၢၼ်ႈပဵင်း ၼိူဝ် – ပဵင်းတႂ်ႈ သဵၼ်ႈတၢင်း လႃႈသဵဝ်ႈ – ၼမ်ႉတူႈ ၼႂ်းဢိူင်ႇဢီႇၼၢႆး ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ။ မၼ်းၸၢႆး ၼႆႉ ႁၢႆၵႂႃႇမိူဝ်ႈၽွင်း တပ်ႉသိုၵ်းဢူၺ်းလီပွတ်းႁွင်ႇ တင်း RCSS ပဵၼ်ပၢင်တိုၵ်းၵၼ် မိူဝ်ႈ ဝၼ်းတီႈ 26/10/2018 ၼၼ်ႉ ဝႃႈၼႆ။

လုင်းၸၢႆးမွင်ႇ ၵူၼ်းဝၢၼ်ႈၼႂ်းဢိူင်ႇဢီႇၼၢႆး လၢတ်ႈတီႈၽူႈတွႆႇႁွၵ်ႈဝႃႈ “ ထူပ်းႁၼ်တူဝ်တၢႆ မၼ်းၸၢႆး မိူဝ်ႈၶမ်ႈဝႃး ၼႆႉ ၶႃႈ။ မၼ်းၸၢႆးႁၢႆၵႂႃႇ မိူဝ်ႈၽွင်းပဵၼ်ပၢင်တိုၵ်းၼၼ်ႉယဝ်ႉ။ ၵမ်းၼႆႉ ၵူၼ်းဝၢၼ်ႈဢွၼ်ၵၼ်သွၵ်ႈတဝ်ႁႃ လႆႈငိၼ်း ဢၢႆ တူႇသေ ၸွမ်းၶႆႈငိူၼ်ႈမၼ်း ႁဵတ်းၼၼ်သေ ၸင်ႇၵႂႃႇၶုတ်းႁၼ် တူဝ်တၢႆမၼ်းၸၢႆး ဢၼ်ၾင်လိၼ်ဝႆႉၼၼ်ႉ။ ထူပ်း ႁၼ် ၼႂ်းၵႄႈဝၢၼ်ႈပဵင်းၼိူဝ် – ပဵင်းတႂ်ႈၶႃႈဢေႃႈ” ဝႃႈၼႆ။

တေႃႈလဵဝ်တႄႉ ၶၢပ်ႈတူဝ်တၢႆ သၢမ်မူၼ်းၼႆႉ ယူႇတီႈပီႈၼွင်ႉၸိူဝ်ႉၶိူဝ်းမၼ်းၸၢႆး ဢဝ်ၵႂႃႇလုမ်းလႃး ၸွမ်းၼင်ႇ ၾိင်ႈ ႁိတ်ႈႁွႆးၸၢဝ်းၶၢင်မီးၼၼ်ႉ ဝႃႈၼႆ။
သၢမ်မူၼ်းၼႆႉ ၵူပ်ႉၵူႈၵၼ်တင်း ၶွၼ်ႇမႂ်ႇ (မေးၼၢင်း) မီးလုၵ်ႈႁူမ်ႈၵၼ် 4 ၵေႃႉ ဢႃယု ၼႂ်း ၵႄႈ 2 ပီ ထိုင် 10 ပီ ဝႃႈၼႆ။

မိူဝ်ႈၵၢင်လိူၼ်ဢွၵ်ႊထူဝ်ႊၿိူဝ်ႊ 2018 ၼႆႉမႃး သိုၵ်းဢူၺ်းလီပွတ်းႁွင်ႇ တင်း RCSS ပဵၼ်ပၢင်တိုၵ်းၵၼ် တၢင်းပွတ်း မိူင်းၵိုင်၊ ၵေးသီး၊ ၼမ်ႉတူႈ၊ သီႇပေႃႉလႄႈ လႃႈသဵဝ်ႈ ၸဵမ်ၸိူဝ်းၼႆႉ။

ၵဵဝ်ႇလူၺ်ႈလွင်ႈပဵၼ်ပၢင်တိုၵ်းၼႆႉ ၵူၼ်းမိူင်းၼပ်ႉႁူဝ်ႁဵင် ၺႃးၸၢၵ်ႇသိုၵ်းသိူဝ်၊ လႆႈပၢႆႈယၢၼ်ႁိူၼ်းယေးတီႈယူႇ၊ ဢမ်ႇ လႆႈၽုၵ်ႇသွမ်ႈႁႃၵိၼ်လဵင်ႉၼႃႈႁိူၼ်း လႄႈ ႁူပ်ႉတၢင်းယၢပ်ႇ၊ ၵမ်ႈၽွင်ႈပၢႆႈၵႂႃႇတၢင်းမိူင်းၶႄႇ၊ မၢင်ၸိူဝ်းပၢႆႈၵႂႃႇတၢင်း မိူင်းထႆး ဝႃႈၼႆ။