ပွႆးဢွၵ်ႇဝႃႇလိူၼ်သိပ်းဢဵတ်းမူၼ်း မိူင်းၵႅတ်ႈ တူင်ႇဝဵင်းလႃႈသဵဝ်ႈၼၼ်ႉ သဵင်ၵွင်ႈလူင်မေႃးၽွင်းၶၢဝ်းပွႆးၵိုၼ်း ႁဵတ်းႁႂ်ႈၵူၼ်းမိူင်းတူၵ်းၸႂ်တိုၼ်ႇသၢၼ်ႈပွႆး  ယၢႆႈၸဵမ်ၸဝ်ႉသေ ပူႇသိၼ်ၼၢႆးသိၼ်ၵေႃႈ ဢမ်ႇၸၢင်ႈၵမ်သိၼ်ၼွၼ်းၵျွင်းလႆႈ။

ပွႆးဢွၵ်ႇဝႃႇ လူႇတၢၼ်းၾႆးတဵၼ်း တီႈမိူင်းၵႅတ်ႈပီၼႆႉၵေႃႈ ၸတ်း 2 ၶိုၼ်း။ ၶိုၼ်းဝၼ်းထိ 24  -25/10/2018  မႅၼ်ႈဝၼ်းလိူၼ် သိပ်းဢဵတ်း မူၼ်းလႄႈ လိူၼ်လွင်ႈၶမ်ႈ။ ၶိုၼ်းလိူၼ်သိပ်းဢဵတ်းမူၼ်း (ၶမ်ႈဝႃး) သဵင်ၵွင်ႈလူင်မေႃးလၢႆလၢႆၵမ်း တီႈႁိမ်းၵွင်းမူးလႄႈၵျွင်းလူင် ႁဵတ်းႁႂ်ႈၵူၼ်းမိူင်းတူၵ်းၸႂ်ၵူဝ်ႁႄ။ ဢမ်ႇတၼ်းလႆႈလူႇၼမ်ႉလူႇၾႆးသေ ပၢင်ပွႆးယၢႆႈၸဵမ် ၸဝ်ႉဝႃႈၼႆ။

လုင်းၸၢႆးသၢမ် ၵူၼ်းမိူင်းၵႅတ်ႈလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ပဵၼ်ပွႆးၾိင်ႈထုင်းဢွၵ်ႇဝႃႇ ပီႈၼွင်ႉမိူင်းၵႅတ်ႈ ႁဝ်းၶႃႈ လူႇတဵၼ်း ၶိုၼ်ႈၵျွင်း  မႃးတႃႇသေႇ ၵူႈပီ။ ပီၼႆႉၵေႃႈ ႁဵတ်းပွႆး 2 ၶိုၼ်း။ ၶမ်ႈဝႃးၼႆႉ ၵူၼ်းဝၢၼ်ႈလႆႈယိၼ်း သဵင်မၢၵ်ႇၵွင်ႈလူင်သေ တူၵ်းၸႂ်ၵူဝ်ႁႄ။ ပၢင်ပွႆးယၢႆႈၸဵမ်ၸဝ်ႉ။ ၶိုၼ်း ၼႆႉ လိူၼ်သိပ်းဢဵတ်းလွင်ႈ ၼိုင်ႈၶမ်ႈ ပဵၼ် ၶိုၼ်းဢၼ်ၵူၼ်းဝၢၼ်ႈတေလူႇတၢၼ်းၵၼ်ႇတေႃး ၸဝ်ႈသြႃႇလႄႈ  မႆႈၸႂ်ၵူဝ်မီးသဵင်ၵွင်ႈလူင်ယႃႉပၢင် ၵၼ်ႇတေႃးထႅင်ႈ   ၵူၺ်းယဝ်ႉၶႃႈ။ ၸွမ်းၼင်ႇထုင်းႁဝ်းၶႃႈ ပီႈၼွင်ႉ မိူင်းၵႅတ်ႈ ၼႆ ပေႃး 9 ၶမ်ႈမႃးၵေႃႈတေမီး ပီႈၼွင်ႉၼႂ်းထုင်ႉမိူင်းၵႅတ်ႈ ၵူႈဝၢၼ်ႈၵူႈဢိူင်ႇ ႁူမ်ႈၵၼ် ၵၼ်ႇတေႃး ၸဝ်ႈသြႃႇထႅင်ႈၵမ်းၼိုင်ႈၶႃႈဢေႃႈ ။ ပဵၼ်ပွႆးၵၼ်ႇတေႃးယႂ်ႇလူင်ၶႃႈဢေႃႈ။ ၼၼ်ႉၵေႃႈယင်းလႆႈ မႆႈၸႂ်ဝႆႉဝႃႈ ၵူဝ်မီးၵူၼ်းမႃးယႃႉပၢင်ၵၼ်ႇတေႃးႁဝ်းၶႃႈထႅင်ႈၵူၺ်းယဝ်ႉၶႃႈ  ”- ဝႃႈၼႆ။

ပီၼႆႉပွႆးဢွၵ်ႇဝႃႇ တေဢမ်ႇလႆႈၶၢႆ၊ ဢမ်ႇလႆႈပွႆႇ မၢၵ်ႇထူပ်းမၢၵ်ႇတႅၵ်ႇၼႆသေ ၵၢင်ႉၵႄႇ၊ ၾၢႆႇၵွၼ်း ပိူင်ႇဢိၵ်ႇ သိုၵ်းမၢၼ်ႈ၊ တပ်ႉပီႇတုၸိတ်ႉမၢၼ်ႈပၢင်ႇ ႁူပ်ႉထူပ်းဢုပ်ႇဢူဝ်းၵၼ်သေ ႁၢမ်ႈဝႆႉၸဵမ်လႂ်လႄႈ ဢၼ်ၶၢႆမူၵ်ႇတႅၵ်ႇတႄႉဢမ်ႇမီးဝႃႈၼႆ။

လုင်းၸၢႆးသၢမ် လၢတ်ႈထႅင်ႈဝႃႈ- ပီၵၢႆပီဢွၼ် ၵူၼ်းၶၢႆမၢၵ်ႇထူပ်း မူၵ်ႇတႅၵ်ႇၵေႃႈဢမ်ႇၸႂ်ႈၵူၼ်းဝၢၼ်ႈၶႃႈ။ ပဵၼ်တၢင်ႇၸၢဝ်းၶိူဝ်းၶႃႈဢေႃႈ  ။ ပီၼႆႉတႄႉၵေႃႈ ယွၼ်ႉၺႃးႁၢမ်ႈဝႆႉလႄႈ ၶဝ်ဢမ်ႇလႆႈၶၢႆၶႃႈ။ ယဝ်ႉၵေႃႈ ပီႇတုၸိတ်ႉၵေႃႈဢမ်ႇမႃးပွႆးႁဝ်းၶႃႈ။ မိူဝ်ႈၸဝ်ႉ ၵွၼ်ႇၼႃႈၼၼ်ႉ မီးသိုၵ်းမၢၼ်ႈတပ်ႉ 99 ဢၼ် ၽူႈၵွၼ်းတပ်ႉ ၽဵဝ်းၸိင်ႇတူႇထုၼ်း ဢွၼ်ႁူဝ်လုၵ်ႈၼွင်ႉမၼ်းမႃးလူႇၶဝ်ႈတႃပႃပၼ်ၸဝ်ႈသၢင်ႇၶဝ်ၶႃႈဢေႃႈတီႈၵွင်းမူးၼၼ်ႉၶႃႈဢေႃႈ။ –  ဝႃႈၼႆ။

သဵင်ၵွင်ႈလူင်ၼႆႉယွၼ်ႉဝႃႈပဵၼ်ၼွၵ်ႈဝၢၼ်ႈလႄႈ ဢမ်ႇမီးလွင်ႈတုမ်ႉတိူဝ်ႉၵူၼ်းဝၢၼ်ႈ၊ ဢမ်ႇမီးၽႂ်မၢတ်ႇၸဵပ်းလုတၢႆ။ ၵူၺ်းၵႃႈတေႃႇထိုင်ယၢမ်းလဵဝ်  ပဵၼ်ၸုမ်းလႂ် ၼမ်ႉမိုဝ်းၽႂ်ၵေႃႉပွႆႇမၢၵ်ႇယႃႉပွႆးၼႆယင်းဢမ်ႇလႆႈႁူႉ။ ၵဵဝ်ႇၵပ်းလွင်ႈၼႆႉ ၾၢႆႇႁူမ်ႇလူမ်ႈမိူင်းၵႅတ်ႈၵေႃႈဢမ်ႇလူင်းပိုၼ်ႉတီႈ တွင်ႈထၢမ်သင်သေဢိတ်း။

တီႈဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈၼႆႉ မီးသိုၵ်းလူင်ပွင်ၸိုင်ႈမၢၼ်ႈလႄႈ ပျီႇတူႉၸိတ်ႉမၢၼ်ႈပၢင်ႇလႄႈ ပလိၵ်ႈမၢၼ်ႈတူင်ႉၼိုင်ယူႇသဝ်း ။ တပ်ႉမ 99 ၼႆႉမႃးပၵ်းတီႈမိူင်းၵႅတ်ႈ မိူဝ်ႈၽွင်းပီ 2014  ပုၼ်ႉဝႃႈၼႆ။