လူင်ပွင်ၸိုင်ႈမိူင်းထႆး ႁွင်ႈၵၢၼ်ၾၢႆႇႁႅင်းၵၢၼ် ႁူမ်ႈၵၼ်လၢႆႁွင်ႈၵၢၼ် လူင်းပိုၼ်ႉတီႈၵူတ်ႇထတ်းတီႉၺွပ်းႁႅင်းၵၢၼ်ယၢၼ်မိူင်း ႁၢဝ်ႈႁႅင်းလၢႆပိုၼ်ႉတီႈ ။
ဝၼ်းတီႈ 18/10/2018 လူင်ပွင်ၸိုင်ႈမိူင်းထႆး ႁွင်ႈၵၢၼ်ၾၢႆႇႁႅင်းၵၢၼ်၊ ၾၢႆႇၵူတ်ႇထတ်းၵူၼ်းၶဝ်ႈမိူင်း၊ ၾၢႆႇပလိၵ်ႈႁူမ်ႈ ၵၼ်လူင်းပိုၼ်ႉတီႈ ၵူတ်ႇထတ်းတီႉၺွပ်းႁႅင်းၵၢၼ်ယၢၼ်မိူင်း ၸိူဝ်းၽိတ်းပၵ်းပိူင်မၢႆမီႈ ၼႂ်းမိူင်းထႆးတႃႇ 54 တီႈ ၼႂ်းပိုၼ်ႉတီႈၵုမ်းၵမ်ႁူင်းပလိၵ်ႈၿၢင်ႊၽလီႊ၊ ၿၢင်ႊၵႅဝ်ႊ၊ ၿၢင်ႊသဝ်ထူင်ႊ၊ ၿၢင်ႊၿေႃႊ ၼႂ်းၸႄႈတွၼ်ႈသမုတ်ႊပရႃႊၵၢၼ်ႊ ၸိုင်ႈထႆး ပွတ်းၵၢင် ။
ၵူတ်ႇထတ်းထူပ်းႁၼ်ႁႅင်းၵၢၼ်ယၢၼ်မိူင်း 945 ၵေႃႉ၊ ႁႅင်းၵၢၼ်မိူင်းႁူမ်ႈတုမ်မၢၼ်ႈ 706 ၵေႃႉ၊ ၵမ်ႊပူႊၶျႃႊ 104 ၵေႃႉ၊ လၢဝ်း 135 ၵေႃႉ။ ဢၼ်ႁဵတ်းၽိတ်းပၵ်းပိူင်မၢႆမီႈမီး 640 ၵေႃႉ ပဵၼ်တၢမ်ႇတၢင်းၽိတ်းဢမ်ႇၸႅင်ႈတီႈယူႇ၊ၸဝ်ႈႁေႃၸဝ်ႈႁိူၼ်းဢမ်ႇၸႅင်ႈပၼ်တီႈယူႇ၊ ဢမ်ႇဢဝ်ဝတ်းဝႂ်ၸပ်းတူဝ်၊ ၶဝ်ႈမိူင်းၽိတ်းမၢႆမီႈ၊ ၸႂ်ႉဝတ်းဝႂ်ဢၼ်တူႉဢၼ်ပွမ်ၸိူဝ်းၼႆႉ။
ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈႁႅင်းၵၢၼ် HRDF ယၢမ်ႈလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ႁႅင်းၵၢၼ်ယၢၼ်မိူင်းၸိူဝ်းမႃးႁႃႁဵတ်းၵၢၼ်ယူႇတီႈၼႂ်းမိူင်းထႆးၼႆႉ ႁဝ်းလူဝ်ႇတိတ်းတၢမ်ၶၢဝ်ႇငၢဝ်းလႄႈ ႁဵတ်းၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းပိူၼ်ႈ၊ ဢဝ်ဝတ်းဝႂ်ၸပ်းတူဝ်ၵႂႃႇၸွမ်းယူႇတႃႇသေႇ ဝႃႈၼႆ။
တီႈၼႂ်းမိူင်းၸိုင်ႈထႆးၼႆႉ မီးႁႅင်းၵၢၼ်ယၢၼ်မိူင်း ၶဝ်ႈႁဵတ်းၵၢၼ်ၼပ်ႉဢၢၼ်ႇႁူဝ်လၢၼ်ႉ ၸိူဝ်းထုၵ်ႇမႅၼ်ႈ ၸွမ်းၼင်ႇပၵ်းပိူင် ၵေႃႈမီး၊ ဢမ်ႇမႅၼ်ႈၸွမ်းၼင်ႇပၵ်းပိူင်ၵေႃႈမီး ၵွပ်ႈၼၼ်လႄႈ ၼင်ႇႁိုဝ်ႁႅင်းၵၢၼ်ပေႃးတေထုၵ်ႇမႅၼ်ႈၸွမ်းပၵ်းပိူင်ဝၢၼ်ႈမိူင်း ၼၼ်ႉ ၸဝ်ႈၼႃႈတီႈၽူႈမီးပုၼ်ႈၽွၼ်းၵူတ်ႇထတ်းႁၢဝ်ႈႁႅင်း လိူဝ် သေတီႈၸႄႈတွၼ်ႈသမုတ်ႊပရႃႊၵၢၼ်ႊယဝ်ႉ တၢင်ႇၸႄႈတွၼ်ႈၵေႃႈ ၸဝ်ႈၼႃႈတီႈလူင်းပိုၼ်ႉတီႈ ၵူတ်ႇထတ်းၼင်ႇၵဝ်ႇဝႃႈၼႆ။
