လူင်ပွင်ၸိုင်ႈမိူင်းထႆး တေၵႂၢတ်ႇလၢင်ႉၽဵဝ်ႈမူၺ်ႉယႃႈမဝ်းၵမ်ႁၢဝ်ႈႁႅင်း

လူင်ပွင်ၸိုင်ႈမိူင်းထႆး ဢုပ်ႇၵုမ်ၵၼ် တႃႇႁူမ်ႈၵၼ်ၵႂၢတ်ႇလၢင်ႉ ၽဵဝ်ႈမူၺ်ႉယႃႈမဝ်းၵမ် ၼႂ်းမိူင်းထႆး။

ဝၼ်းတီႈ 16/10/2018 ၸွမ်သိုၵ်းလူင် ပရႃႊယုတ်ႊ ၸၼ်ႊဢူဝ်ႊၶျႃႊ ၸွမ်ၽွင်းလူင်မိူင်းထႆး မွၵ်ႇလၢတ်ႈ တီႈသိုဝ်ႇၶၢဝ်ႇ Thairath ဝၢႆးလင်ပၢင်ၵုမ်ၸုမ်းၽွင်းလူင်ဝႃႈ- ယိၼ်းမႆႈၸႂ်ၼိူဝ်လွင်ႈယႃႈမဝ်းၵမ် ဢၼ်ၽႄႈတိူၼ်းယူႇၼႂ်းမိူင်းထႆး ၵွပ်ႈ ၼၼ်လႄႈ ႁၼ်ထိုင်ဝႃႈ ထုၵ်ႇလီႁူမ်ႈၵၼ်ၵႄႈလိတ်ႈပၼ်ႁႃယႃႈမဝ်းၵမ် ႁႂ်ႈဝႆးတီႈသုတ်း ။ လႆႈသင်ႇၵၢၼ်ႁႂ်ႈၸဝ်ႈၼႃႈတီႈၾၢႆႇသိုၵ်း၊ ၾၢႆႇပလိၵ်ႈ၊ ၾၢႆႇၽဵဝ်ႈမူၺ်ႉယႃႈမဝ်းၵမ် ၸိူဝ်းၼႆႉၶဵင်ႈၶႅင်ၵူတ်ႇထတ်း ဢမ်ႇဝႃႈတေပဵၼ်ၼႂ်းပိုၼ်ႉတီႈ ၵၢၼ်ႁဵၼ်းၵၢၼ်သွၼ် ၊ ႁူင်းငၢၼ်းၸိူဝ်းၼႆႉ ။

ၸွမ်သိုၵ်းလူင် ပရႃႊယုတ်ႊ ၸၼ်ႊဢူဝ်ႊၶျႃႊ လၢတ်ႈဝႃႈ – “ ပၼ်ႁႃယႃႈမဝ်းၵမ်ၼႆႉ ပဵၼ်ပၼ်ႁႃဢၼ် ႁဵတ်းႁႂ်ႈတၢင်းယၢမ်ႈ ၵူၼ်းမိူင်း၊ ၵူၼ်းၼုမ်ႇလူႉ ႁဝ်းတေၵုမ်ႇတီႉၺွပ်းၵူၼ်းၵိၼ်မၼ်းၵူၺ်းဢမ်ႇလႆႈ ႁဝ်းတေလႆႈၵူတ်ႇထတ်းတီႉပႃးၵူၼ်းၶၢႆမၼ်း၊တူၼ်ႈတေႃမၼ်း ၼင်ႇႁိုဝ်ပေႃးတေၵႄႈလိတ်ႈလႆႈ ပၼ်ႁႃယႃႈမဝ်းၵမ်ၼႆႉလႆႈ ” ဝႃႈၼႆ။

တီႈၼႂ်းမိူင်းၸိုင်ႈထႆးၼႆႉ ၵႆႉမီးၶၢဝ်ႇၸဝ်ႈၼႃႈတီႈပလိၵ်ႈထႆးလႄႈ ၾၢႆႇၽဵဝ်ႈမူၺ်ႉယႃႈမဝ်းၵမ် ၵႆႉၵႆႉတီႉ ၺွပ်းလႆႈယႃႈမဝ်းၵမ် ၶိူဝ်းယႂ်းလႄႈ ၼင်ႇႁိုဝ်တေၵႄႈလိတ်ႈလႆႈၼႆသေ လူင်ပွင်ၸိုင်ႈ တေႁူမ်ႈမိုဝ်း ၽူႈမီးပုၼ်ႈၽွၼ်းလၢႆၾၢႆႇသေ ၶဵင်ႈၶႅင်ၵူတ်ႇထတ်းၵႂႃႇၼႆယဝ်ႉ။