ႁွင်ႈၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈမိူင်းထႆး ပိုၼ်ၽၢဝ်ႇဝႃႈ တေသိုပ်ႇတေႃႇပၼ်ဝတ်းဝႂ်ႁႅင်းၵၢၼ်ထႅင်ႈ 2 ပီ ၼႂ်းမိူင်းထႆး။
ဝၼ်းတီႈ 08/07/2019 ႁွင်ႈၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈမိူင်းထႆး ၸတ်းႁဵတ်းပၢင်ဢုပ်ႇၵုမ်ၵၼ်သေ ႁၼ်လီလွင်ႈဝႃႈ တေတေႃႇပၼ်ဝတ်းဝႂ် ဢၼ်ၶဝ်ႈၸွမ်းပိူင် MOU ပၼ် ႁႅင်းၵၢၼ်ယၢၼ်မိူင်း မိူင်းႁူမ်ႈတုမ်မၢၼ်ႈ၊ မိူင်းၵမ်ႊပူႊၶျႃႊလႄႈလၢဝ်း ၸိူဝ်းဢၼ်ယႃယုဝတ်းတေမူတ်းၼႂ်းဝၼ်းတီႈ 30/09/2019 တင်း 1/11/2019 လႄႈ ဢၼ်တေမူတ်းၼႂ်းဝၼ်းတီႈ 31/03/2020။ တေတေႃႇပၼ်ဝတ်းဝႂ် ၼႂ်းမိူင်းထႆးၵူၺ်း ဢမ်ႇလူဝ်ႇဢွၵ်ႇမိူဝ်းႁဵတ်းတီႈမိူင်းၽႂ်မၼ်းၶိုၼ်း ။
ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈ HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ မိူဝ်ႈဝႃးၼႆႉ လူင်ပွင်ၸိုင်ႈမိူင်းထႆး ပိုၼ်ၽၢဝ်ႇ တေတေႃႇပၼ်ဝတ်းဝႂ်ႁႅင်းၵၢၼ်တႃႇ 2 ပီ ၵူၺ်းၵႃႈလၢႆးႁူဝ်ယွႆႈမၼ်းတေပဵၼ်ၸိူင်ႉႁိုဝ်ဢၼ်ဝႃႈၼႆႉ ပႆႇႁူႉ ယွၼ်းႁႂ်ႈပီႈၼွင်ႉႁဝ်းၶႃႈ တိတ်းတၢမ်ၶၢဝ်ႇငၢဝ်းယူႇတႃႇသေႇ ” ဝႃႈၼႆ။
ယူႇတီႈႁွင်ႈၵၢၼ်ၾၢႆႇႁႅင်းၵၢၼ်သေ တေတႄႇပိုတ်ႇႁႂ်ႈႁႅင်းၵၢၼ်ယၢၼ်မိူင်း ၵႂႃႇယိုၼ်ႈတေႃႇလႆႈတင်ႈတႄႇ ဝၼ်းတီႈ 15/08/2019 တေႃႇထိုင် ဝၼ်းတီႈ 31/03/2020 ႁႅင်းၵၢၼ်ယၢၼ်မိူင်းယိုၼ်ႈတေႃႇလႆႈ ၵွၼ်ႇဝတ်းဝႂ်တူဝ်ၵဝ်ႇတေ မူတ်း ဢႃယု 90 ဝၼ်း ။
