ၵေႃႁူမ်ႈသၢင်ႈၸိူဝ်ႉၸၢတ်ႈတႆး ၸတ်းႁဵတ်းပၢင်ဢုပ်ႇလၢတ်ႈတၢၼ်ႈၶႆႈၼႂ်းႁူဝ်ၶေႃႈ “ ၾိင်ႈယူႇၵိၼ်လႄႈ ၵၢၼ်ၸႂ်ႉတိုဝ်း IT ႁႂ်ႈမီးၽွၼ်းလီ” ႁႅင်းၵၢၼ်ယၢၼ်မိူင်းၼႂ်းၵဵင်းမႆႇ ဢိၵ်ႇၽူႈသူၼ်ၸႂ်ၶဝ်ႈႁူမ်ႈထွမ်ႇငိၼ်းမီး 400 ပၢႆ။
ဝၼ်းတီႈ 14/10/2018 ၵေႃႁူမ်ႈသၢင်ႈၸိူဝ်ႉၸၢတ်ႈတႆး Tai National Partnership Constructive Engagement ၸတ်းႁဵတ်းပၢင်ဢုပ်ႇလၢတ်ႈတၢၼ်ႈၶႆႈ ၵဵဝ်ႇလူၺ်ႈလွင်ႈ “ ၵၢၼ်သိုဝ်ႇသၢၼ် ပိုၼ်ႉႁူႉ ၾိင်ႈငႄႈ လိၵ်ႈလၢႆး ပၢႆးယူႇၵိၼ်” တီႈဝတ်ႉပႃႇပဝ်ႈ ဝဵင်းၵဵင်းမႆႇ ၸိုင်ႈထႆး ၽူႈသူၼ်ၸႂ်တီႈ ၸမ်တီႈၵႆ ၶဝ်ႈႁူမ်ႈထွမ်ႇငိၼ်း 400 ၵေႃႉပၢႆ ။
ၼႂ်းပၢင်ၼၼ်ႉ မီး ၸဝ်ႈၶူးသီႇရိထမ်ႇမ ဝတ်ႉၾႃႉဝဵင်းဢိၼ်း ဢုပ်ႇလၢတ်ႈလွင်ႈပုတ်ႉထၽြႃးပဵၼ်ၸဝ်ႈလႄႈ တူင်ႇဝူင်းၵူၼ်း၊၊ ပေႃႈၶူးပၢႆးမိူင်း ဢုပ်ႇလၢတ်ႈလွင်ႈ ၵၢၼ်ယူႇသဝ်းၵိၼ်သၢင်ႈၸိူဝ်းၼႆႉ။
ၸၢႆးသၢႆဝၼ်း ၽူႈၼင်ႈၸိုင်ႈၵေႃႁူမ်ႈသၢင်ႈၸိူဝ်ႉၸၢတ်ႈတႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ဢၼ်ႁဝ်းၶႃႈၸတ်း ႁဵတ်းပွၵ်ႈၵမ်းၼႆႉ ပဵၼ်ပွၵ်ႈဢွၼ်တၢင်းလႄႈ သင်ဝႃႈမီးတီႈၽိတ်းၼႆ ၶႅၼ်းတေႃႈၶႂၢင်းပၼ်သေၵမ်း ၊ မိူဝ်းၼႃႈမႃးပေႃးမီးတိုဝ်ႉတၢင်းၼႆ ႁဝ်းၶႃႈတေၸတ်းႁဵတ်းထႅင်ႈ ။ ယိူင်းဢၢၼ်းဢၼ်ႁဝ်းၶႃႈၸတ်းႁဵတ်းၼႆႉ ပိူဝ်ႈႁႂ်ႈၵူၼ်းၼုမ်ႇၸၢႆး ယိင်း ဢိၵ်ႇသၢမ်ပၢၼ်ၸဵတ်းသႅၼ်း ပေႃးတေမီးတၢင်းႁူႉၶိုတ်းတၼ်းၵၢပ်ႈပၢၼ် IT လႄႈ ႁႂ်ႈမေႃၸႂ်ႉႁႂ်ႈမီးၽွၼ်းလီတႃႇ တူဝ်ၸဝ်ႈၵဝ်ႇ၊ တႃႇၵူၼ်းၼမ်၊ တႃႇၸိူဝ်ႉၶိူဝ်းၸိူဝ်းၼႆႉ ” ဝႃႈၼႆ။
ၵေႃႈႁူမ်ႈသၢင်ႈၸိူဝ်ႉၸၢတ်ႈတႆးၼႆႉ ၵေႃႇတင်ႈမႃး မိူဝ်ႈဝၼ်းတီႈ 21 လိူၼ် ၼူဝ်ႊဝႅမ်ႊၿိူဝ်ႊ 2017 ယိူင်းဢၢၼ်းပိူဝ်ႈတႃႇၵူႈမူႇၵူႈၸုမ်း တေၸၢင်ႈၵပ်းသၢၼ်ၵၼ်ငၢႆႈ မီးယိူင်းဢၢၼ်းလၵ်းၼမ်း ၵဵဝ်ႇၵပ်းၵၢၼ်တူင်ႇဝူင်းၵူၼ်းတႆး ဢိၵ်ႇတင်းၵၢၼ်ဢၼ်ပဵၼ်ၼႃႈ ပဵၼ်တႃတႆးတင်းသဵင်ႈ။ ၵေႃႁူမ်ႈသၢင်ႈၸိူဝ်ႉၸၢတ်ႈတႆးၼႆႉ ဢမ်ႇယူႇတႂ်ႈတပ်ႉသိုၵ်းၸုမ်းလႂ် ဢမ်ႇယူႇတႂ်ႈပႃႇတီႇ ၸုမ်းလႂ်လႄႈ မီးလၵ်း ၼမ်းဢဝ်ၵၢၼ်ၽွမ်ႉႁူမ်ႈပဵၼ်လၵ်းသေ ၵမ်ႉထႅမ်ႁၼ်လီယုၵ်ႉယွင်ႈၵူႈမူႇၵူႈၸုမ်းဢမ်ႇဝႃႈၼွၵ်ႈမိူင်း ၼႂ်းမိူင်း ဢၼ်ႁဵတ်းၵၢၼ်တူင်ႉၼိုင်တူင်ႇဝူင်းၵူၼ်းၵၢၼ်ပူၵ်းပွင် ႁူမ်ႈတင်းတူင်ႇဝူင်းၵၢၼ်ၾိင်ႈငႄႈလိၵ်ႈလၢႆးလႄႈ ၵၢၼ်ၸိူဝ်ႉ ၸၢတ်ႈၸိူဝ်ႉၶိူဝ်းဝၢၼ်ႈမိူင်း။
