ၵေႃႁူမ်ႈသၢင်ႈၸိူဝ်ႉၸၢတ်ႈတႆး Tai National Partnership Constructive Engagement တေႁူမ်ႈၵၼ်ၸတ်းႁဵတ်းပၢင်တၢၼ်ႈၶႆႈ “ ၵၢၼ်သိုဝ်ႇသၢၼ်ပိုၼ်ႉႁူႉ ၾိင်ႈငႄႈ လိၵ်ႈလၢႆး ပၢႆးယူႇၵိၼ် ” ႁႂ်ႈပဵၼ်ၽွၼ်းလီတႃႇတူဝ်ၵဝ်ႇလႄႈ ၸိူဝ်ႉၶိူဝ်းမိူဝ်းၼႃႈ ။

ပၢင်တၢၼ်ၶႆႈၼႆႉတေၸတ်းႁဵတ်းၼႂ်း ဝၼ်းတီႈ 14/10/2018 တီႈဝတ်ႉပႃႇပဝ်ႈ ဢိူင်ႇသီၽုမ်း ၸႄႈဝဵင်းမိူင်း ၸႄႈတွၼ်ႈၵဵင်းမႆႇ ၸိုင်ႈထႆး။ ယၢမ်းလဵဝ်ယူႇတီႈၵေႃႁူမ်ႈ သၢင်ႈၸိူဝ်ႉၸၢတ်ႈ တႆးသေ လႆႈ ႁွင်ႉမွၵ်ႇၽူႈသူၼ်ၸႂ်ၶဝ်ႈႁူမ်ႈထွမ်ႇငိၼ်းၸွမ်းဝႃႈၼႆ။ ။

ၼႂ်းပၢင်ၼၼ်ႉတေမီး ၸဝ်ႈၶူးသီႇရိထမ်ႇမ ဝတ်ႉၾႃႉဝဵင်းဢိၼ်း၊ ၸဝ်ႈၶူး ပၢႆးမိူင်း၊ ၸဝ်ႈၵၼ်း ၸဵတ်း ၸိူဝ်းၼႆႉမႃးဢုပ်ႇလၢတ်ႈတၢၼ်ႈၶႆႈ ။

ၸၢႆးသၢႆဝၼ်း ၽူႈၼင်ႈၸိုင်ႈၵေႃႁူမ်ႈသၢင်ႈၸိူဝ်ႉၸၢတ်ႈတႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ယိူင်းဢၢၼ်းဢၼ်ႁဝ်းၶႃႈၸတ်းႁဵတ်းၼႆႉ ပိူဝ်ႈႁႂ်ႈၵူၼ်းၼုမ်ႇၸၢႆး ယိင်း ဢိၵ်ႇသၢမ်ပၢၼ်ၸဵတ်း သႅၼ်း ပေႃးတေမီးတၢင်းႁူႉၶိုတ်းတၼ်းၵၢပ်ႈပၢၼ် IT လႄႈ ႁႂ်ႈမေႃၸႂ်ႉႁႂ်ႈမီးၽွၼ်းလီတႃႇ တူဝ်ၸဝ်ႈၵဝ်ႇ၊ တႃႇၵူၼ်းၼမ်၊ တႃႇၸိူဝ်ႉၶိူဝ်းၸိူဝ်းၼႆႉ။ လိူဝ်ၼၼ်ႉ ႁႂ်ႈပီႈၼွင်ႉၸိူဝ်း ၽၢတ်ႇယၢၼ်ႁိူၼ်းယေးသေ ၸိူဝ်းယူႇဝႆႉၼႂ်းမိူင်းပိူၼ်ႈ ႁႂ်ႈမေႃယူႇမေႃၵိၼ်၊ ႁႂ်ႈမေႃႁၵ်ႉၵၼ်၊ မေႃၸွႆႈထႅမ်ၵၼ်မိူဝ်ႈထူပ်းတၢင်းယၢပ်ႇ၊ ႁႂ်ႈမေႃၶဝ်ႈဢွၵ်ႇၵၼ်ၸိူဝ်းၼႆ” ဝႃႈၼႆ။

ၵေႃႈႁူမ်ႈသၢင်ႈၸိူဝ်ႉၸၢတ်ႈတႆးၼႆႉ ၵေႃႇတင်ႈမႃး မိူဝ်ႈဝၼ်းတီႈ 21 လိူၼ် ၼူဝ်ႊဝႅမ်ႊၿိူဝ်ႊ 2017 ယိူင်းဢၢၼ်း ပိူဝ်ႈတႃႇၵူႈမူႇၵူႈၸုမ်း တေၸၢင်ႈၵပ်းသၢၼ်ၵၼ်ငၢႆႈ မီးယိူင်းဢၢၼ်းလၵ်းၼမ်း ၵဵဝ်ႇၵပ်းၵၢၼ်တူင်ႇဝူင်းၵူၼ်းတႆး ဢိၵ်ႇတင်းၵၢၼ်ဢၼ်ပဵၼ်ၼႃႈ ပဵၼ်တႃတႆးတင်းသဵင်ႈ။ ၵေႃႁူမ်ႈသၢင်ႈၸိူဝ်ႉၸၢတ်ႈတႆးၼႆႉ ဢမ်ႇယူႇတႂ်ႈတပ်ႉသိုၵ်းၸုမ်းလႂ် ဢမ်ႇယူႇတႂ်ႈပႃႇ တီႇ ၸုမ်းလႂ်လႄႈ မီးလၵ်းၼမ်းဢဝ်ၵၢၼ်ၽွမ်ႉႁူမ်ႈပဵၼ်လၵ်းသေ ၵမ်ႉထႅမ်ႁၼ်လီ ယုၵ်ႉယွင်ႈ ၵူႈမူႇၵူႈၸုမ်း ဢမ်ႇဝႃႈၼွၵ်ႈမိူင်း ၼႂ်းမိူင်း ဢၼ်ႁဵတ်းၵၢၼ်တူင်ႉၼိုင်တူင်ႇဝူင်းၵူၼ်း ၵၢၼ်ပူၵ်းပွင် ႁူမ်ႈတင်းတူင်ႇဝူင်းၵၢၼ်ၾိင်ႈငႄႈလိၵ်ႈလၢႆး လႄႈၵၢၼ်ၸိူဝ်ႉ ၸၢတ်ႈၸိူဝ်ႉၶိူဝ်းဝၢၼ်ႈမိူင်း။