ပၢင်ပွႆးတဵတ်ႈထမ်း တီႈပွၵ်ႉမႄးၶၢဝ် ၸႄႈဝဵင်းတႃႈၶီႈလဵၵ်း ဢမ်ႇမီးပၢင်တေႃႇလွင်း။ ၵူၼ်းမိူင်းတႃႈၶီႈလဵၵ်း ဢဝ်ႁဵတ်း တူဝ်ယၢင်ႇလီ။

ပီႈၼွင်ႉၵူၼ်းမိူင်းၼႂ်းပွၵ်ႉမႄႈၶၢဝ် ၽွမ်ႉႁူမ်ႈၵၼ်သေ ၸတ်းႁဵတ်းပွႆးတင်ႈထမ်း လူၺ်ႈဢမ်ႇမီးပၢင်တေႃႇလွင်း တႄႇဢဝ် ဝၼ်းတီႈ 24-29/09/2018 ဝႃႈၼႆ။

ၸၢႆးဢုတ်ႉ ၽူႈၵွၼ်းပွၵ်ႉ မႄႈၶၢဝ် ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ပွႆးတင်ႈထမ်းႁဝ်းၶႃႈ တီႈပွၵ်ႉ မႄးၶၢဝ်ၼႆႉ ႁဝ်းၶႃႈၸတ်းႁဵတ်းမႃးၵူႈပီ။ ပီၼႆႉၵေႃႈ ၸတ်းႁဵတ်း ပဵၼ်ပွႆးယႂ်ႇပွႆးလူင် မိူၼ်ၵၼ် ၼႂ်းပၢင်ပွႆးႁဝ်းၶႃႈၼႆႉ တိုၼ်းဢမ်ႇပၼ်မီး ပၢင်တေႃႇလွင်း။ ႁဵတ်းမႃးၵူႈပီၵေႃႈ ၶႃႈႁဝ်းဢမ်ႇပၼ်မီး ပၢင်တေႃႇလွင်း ပေႃးမီးၼႆ တၢင်းယၢမ်ႈ ၵူၼ်းၼႂ်းပွၵ်ႉ/ ၼႂ်းၶူင်ႇ ၵူၼ်းၼုမ်ႇ ၸဵမ်ၸိူဝ်းၼႆႉ ဢၵျၢင်ႉတၢင်းယၢမ်ႈၶဝ်တေလူႉ၊ ၵူၼ်းဝၢၼ်ႈၵူၼ်းၶူင်ႇႁဝ်းၵေႃႈ တေထူပ်းလွင်ႈယၢပ်ႇၽိုတ်ႇ ယွၼ်ႉၼၼ် ၶႃႈတိုၼ်းႁၢမ်ႈ ဢမ်ႇပၼ်ၸတ်းႁဵတ်းပၢင်တေႃႇလွင်းသင်။ ဢမ်ႇဝႃႈ ၼႂ်း ပၢင်ပွႆးၼႆႉၵူၺ်း ပဵၼ်ပွႆးလၢမ်းသင်ၵေႃႈယဝ်ႉ ၼႂ်းပွၵ်ႉၶႃႈႁဝ်း တိုၼ်းဢမ်ႇပၼ်ႁဵတ်း” ဝႃႈၼႆ။

ၼၢင်းႁွမ် ၵူၼ်းမိူင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းတႃႈၶီႈလဵၵ်း ႁဝ်းၶႃႈၼႆႉ မွင်းဝႃႈ ပဵၼ်ပွႆးပဵၼ်လၢမ်း လႃႈ ပၢင်တေႃႇလွင်းၼႆႉ တိုၼ်းမီးၵမ်းလဵဝ်ယဝ်ႉ။ ဢမ်ႇဝႃႈ ပွႆးတင်ႈထမ်း၊ ပွႆးလူႇပွႆးတၢၼ်းလိူၼ်ႁႃႈ သၢင်း ၵျၢၼ်ႇ ၸဵမ်ၸိူဝ်းၼႆႉ မီးၵႂႃႇယူႇၵူႈပွႆးၶႃႈယဝ်ႉ။ ၵူၼ်းလူင် ၸဝ်ႈၼႃႈတီႈၶဝ်ၵေႃႈ ဢမ်ႇႁၢမ်ႈ ဢမ်ႇသီးသင် ပွႆႇပၼ်ႁဵတ်း ၸိူင်ႉၼၼ် ယွၼ်ႉၼၼ်လႄႈ ဢၼ်ႁဝ်းၶႃႈ လႆႈႁၼ်တူဝ်ယၢင်ႇလီ ဢၼ်ၼိုင်ႈတႄႉ တီႈပွၵ်ႉမႄႈၶၢဝ် တႃႈၶီႈ လဵၵ်းၼၼ်ႉ ပဵၼ်ပွႆးပဵၼ်လၢမ်းမိူဝ်ႈလႂ် ၶဝ်တိုၼ်းဢမ်ႇပဵၼ်ႁဵတ်း ပၢင်တေႃႇလွင်း။ လွင်ႈၼႆႉ ပဵၼ်ဢၼ် လီတႄႉတႄႉ ႁဝ်းၶႃႈၵေႃႈ ၶႂ်ႈႁႂ်ႈၵူႈပွၵ်ႉ ၵူႈဢိူင်ႇ ၵူႈဝၢၼ်ႈ ပဵၼ်မိူၼ်ၼင်ႇ ပွၵ်ႉမႄႈၶၢဝ်ၼၼ်ႉၶႃႈ” ဝႃႈၼႆ။

ၸၢႆးဢုတ်ႉ ၽူႈၵွၼ်းပွၵ်ႉမႄႈၶၢဝ် လၢတ်ႈဝႃႈ “ တီႈၼႂ်းပွၵ်ႉႁဝ်းၶႃႈၼႆႉ တိုၼ်းဢမ်ႇပၼ်ပိုတ်ႇၵမ်းလဵဝ်ၶႃႈယဝ်ႉ လွင်ႈ ပၢင်တေႃႇလွင်း မၼ်းတေႁဵတ်းႁႂ်ႈၵူၼ်းၼုမ်ႇ ၵူၼ်းဝၢၼ်ႈႁဝ်းလူႉ။ ႁဝ်းၶႃႈ ၶႂ်ႈႁႂ်ႈၵူၼ်းၼႂ်းပွၵ်ႉ ၵူၼ်းဝၢၼ်ႈႁဝ်း ၶိုၼ်ႈယႂ်ႇမႂ်ႇသုင် ၽွမ်ႉသဵင်ပဵင်းပၢၵ်ႇၵၼ် ၸွႆႈထႅမ်ၵၼ်။ ယဝ်ႉၵေႃႈ ႁႂ်ႈမေႃႁၵ်ႉသႃ ပႂ်ႉပႃး လိၵ်ႈလၢႆး ၾိင်ႈငႄႈတႆးႁဝ်း ၶႃႈ ၵူႈၵေႃႉၵူႈၵူၼ်း” ဝႃႈၼႆ။

ၼႂ်းပၢင်တင်ႈထမ်း တီႈဝတ်ႉမႄႈၶၢဝ် ပီၼႆႉ ၸတ်းႁဵတ်းပဵၼ်ဢၼ်ၶိုၵ်ႉယႂ်ႇလူင် မီးတၢင်းၵႃႈၼူၵ်ႉ ၵႃႈတူဝ်းပႃးၵႃႈ ၾိင်ႈငႄႈႁိတ်ႈႁွႆးတႆး ဢဝ်မႃးၵႃႈၼႄၵၼ်သေဢမ်ႇၵႃး ယုၵ်ႉယွင်ႈပၼ်ၽူဝ်မေး ဢၼ်ဢမ်ႇယၢမ်ႈပႅတ်ႈၵၼ် ၽၢတ်ႇ ၵၼ် လၢႆလၢႆသိပ်းၵူႈ။ ႁႂ်ႈမႃးပႆတၢင်းၼႄ မိူဝ်ႈၽွင်းႁႄႇၶူဝ်းလူႇလႅပ်ႈဝဵင်းၼၼ်ႉ ဝႃႈၼႆ။