ၵူၼ်းမိူင်း ၼႂ်းပိုၼ်ႉတီႈတႃႈၶီႈလဵၵ်း ႁူပ်ႉလွင်ႈယၢပ်ႇၽိုတ်ႇ ၵၢၼ်ၵႃႉၶၢႆ ယွၼ်ႉတၢင်းပဵၼ်ၶူဝ်ႊဝိတ်ႉ – 19 ၼႆႉ။

ဝၼ်းတီႈ 23/5/2020 ၼႆႉ တီႈၶူဝ်လႅၼ်လိၼ်တႆး – ထႆး တႃႈၶီႈလဵၵ်း – မႄႈသၢႆ လႆႈပိၵ်ႉဢိုတ်းမႃး မီးၶၢဝ်းတၢင်း 2 လိူၼ်တဵမ်ယဝ်ႉ။ မိူဝ်ႈလဵဝ် ၵူၼ်းမိူင်းပိုၼ်ႉတီႈ ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၸိူဝ်းၼႆႉႁူပ်ႉလွင်ႈယၢပ်ႇၽိုတ်ႇ လွင်ႈၵၢၼ်ၵႃႉၶၢႆ၊ လွင်ႈၵၢၼ်ႁႃၵိၼ်လဵင်ႉတွင်ႉ -ၼႆယဝ်ႉ။

ၼၢင်းႁွမ် ၸဝ်ႈၵုၼ်ႇၶူဝ်းၵႃႉၶၢႆ တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ၵႃႈၶၼ်ၶူဝ်းၶွင်ၸႂ်ႉသွႆ ၶိုၼ်ႈမႃးထႅင်ႈ ဢိတ်းၼိုင်ႈယဝ်ႉ။ မိူၼ်ၼင်ႇ ၶဝ်ႈသွႆးႁႅင်ႈ(မႃးမႃႉ) ၸိူဝ်းၼႆႉ ဢမ်ႇသိုဝ်ႉလႆႈၸေးၸေး မိူၼ်မိူဝ်ႈဢွၼ်တၢင်းယဝ်ႉၶႃႈ။ တေလႆႈဝႃႈ ႁိူဝ်ႉလိူဝ်ၵဝ်ႇ လႆႈၶတ်းၸႂ်လိူဝ်ၵဝ်ႇထႅင်ႈၶႃႈဢေႃႈ တေႃႈလဵဝ်ၼႆႉ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆႉသေ” ဝႃႈၼႆ။

သိုပ်ႇလၢတ်ႈဝႃႈ “ လႆႈႁၼ်ၵူၼ်းမႃးသိုဝ်ႉၶူဝ်းၶွင် ဢွၼ်ၵၼ်ၶၢင်းပွင်ႉၵၼ်ယူႇ၊ မၢင်ၸိူဝ်း လႆႈယင်ႉၵၢၼ်ၸဵမ်မိူဝ်ႈတၢင်းပဵၼ် ၶူဝ်ႊဝိတ်ႉ လၢမ်းၽႄႈႁၢဝ်ႈႁႅင်းယူႇၼၼ်ႉ တေႃႇထိုင်မိူဝ်ႈလဵဝ်ၼႆႉ ယင်းပႆႇလႆႈႁဵတ်းၵၢၼ်သင်။ ယၢပ်ႇၽိုတ်ႇတႄႉၶႃႈဢေႃႈ” ဝႃႈၼႆ။

မိူၼ်ၼင်ႇ ၵူၼ်းၸိူဝ်းဢၼ်ႁပ်ႉတၢင်းၵိၼ်ၶူဝ်းယႅမ်ႉတီႈတၢင်းၾင်ႇမႄႈသၢႆ မႃးယၢင်ႇလဵဝ်ၵူၺ်းတႄႉ ဢမ်ႇၸၢင်ႈသင်ႇ မႃးၶၢႆတေႃႇထႅင်ႈ ၵွပ်ႈဝႃႈ ၵႃႈရူတ်ႉၵႃႈၵႃး ၵႃႈၶွၼ်ႇမၼ်းလႆႈပၼ်ၼမ် ဢမ်ႇလႆႈၼမ်ႉတွၼ်း (ၼမ်ႉမျႅတ်ႈ)မၼ်း ဝႃႈၼႆ။

ယွၼ်ႉတၢင်းပဵၼ်ၶူဝ်ႊဝိတ်ႉ – 19 ၼႆႉသေ ၵူၼ်းမိူင်းၼႂ်းၸႄႈဝဵင်းတႃႈၶီႈလဵၵ်းၵမ်ႈၼမ် ဢွၼ်ၵၼ်ယူႇၼႂ်းႁွင်ႈၶၢတ်ႈ၊ ႁိူၼ်း ယေးၽႂ်မၼ်းၵေႃႈ မီးတင်းၼမ်။

ၼၢင်းႁွမ် သိုပ်ႇလၢတ်ႈဝႃႈ “ တေႃႈလဵဝ် ၵူၼ်းတႃႈၶီႈလဵၵ်းၵမ်းၼမ်တႄႉ ဢွၼ်ၵၼ်ႁဵတ်းၶဝ်ႈၽၵ်းတၢင်းၵိၼ်ၶၢႆၵၼ် တၢင်းၼိူဝ်ဢွၼ်ႊလၢႆႊ Online ၵၼ်ၼမ်ၶႃႈဢေႃႈ။ တေႃႈၼင်ႇ သထေးလူင်ၶဝ် ယင်းယၢင်ႈၼိူဝ်ႉမူ သႂ်ႇဢႅပ်ႇသေ ၶၢႆတၢင်း Online ၶႃႈဢေႃႈ။ ၽႅဝ်ထိုင်ၶၵ်ႉတွၼ်ႈၼၼ်ႉၶႃႈယဝ်ႉ မိူဝ်ႈလဵဝ်ၼႆႉ၊ ဢၼ်ႁၼ်ပဵၼ်ၵၢၼ်ၼႃႇတႄႉ ပဵၼ်ၸုမ်း Mr. Fast ၶဝ်ၵူၺ်းယဝ်ႉၶႃႈ သူင်ႇတၢင်းၵိၼ်တၢင်းယႅမ်ႉပၼ် ၵူၼ်းၸိူဝ်းဢမ်ႇဢွၵ်ႇၼွၵ်ႈႁိူၼ်းယေးၵၼ်” ဝႃႈၼႆ။

မိူဝ်ႈပူၼ်ႉမႃး 1-2 လိူၼ်ၼၼ်ႉ ယွၼ်ႉတၢင်းပဵၼ်ၶူဝ်ႊဝိတ်ႉ -19 သေ ၵူၼ်းဝၢၼ်ႈၵူၼ်းမိူင်းၼႂ်းတႃႈၶီႈလဵၵ်း ဢမ်ႇႁတ်းဢွၵ်ႇႁိူၼ်းယေးၵၼ်။ ယၢမ်းလဵဝ်ၼႆႉ ဢွၼ်ၵၼ်တူင်ႉတူဝ် ဢွၵ်ႇႁိူၼ်းဢွၵ်းယေးၵၼ် ၼမ်ၶိုၼ်ႈမႃးယဝ်ႉ။ ထႅင်ႈလွင်ႈၼိုင်ႈၵေႃႈ ဢွၼ်ၵၼ်မုင်ႈမွင်းလွင်ႈတေပိုတ်ႇၶူဝ်လႅၼ်လိၼ်တႆး – ထႆး ၵၼ်ယူႇ။