တႄႇဢဝ်ႁူဝ်လိူၼ် ၵျႅၼ်ႊၼိဝ်ႊရီႊ ထိုင် ႁၢင်လိူၼ်သႅပ်ႊထႅမ်ႊၿိူဝ်ႊပီ 2018 ၼႆႉမႃး ပလိၵ်ႈထႆးတီႉၺွပ်းႁႅင်းၵၢၼ် ယၢၼ်မိူင်းၸိူဝ်း ႁဵတ်းၵၢၼ်ၼႂ်းမိူင်းထႆးသေ သူင်ႇတူဝ်ပွၵ်ႈတၢင်း လႅၼ်လိၼ်တႆး – ထႆး မီးၵႂႃႇ 908 ၵေႃႉ ယဝ်ႉ။
ဝၼ်းတီႈ 28/09/2018 ယၢမ်းဝၢႆးဝၼ်း ပလိၵ်ႈထႆး သူင်ႇတူဝ် ႁႅင်းၵၢၼ် ၵူၼ်းမိူင်းတႆး မွပ်ႈယိုၼ်ႈပၼ် ၸဝ်ႈၼႃႈတီႈ တၢင်းၾင်ႇတႃႈၶီႈလဵၵ်း 28 ၵေႃႉ။ ပဵၼ် ၽူႈၸၢႆး 20 ၵေႃႉ၊ ၽူႈယိင်း 8 ၵေႃႉ။
သိုဝ်ႇၶၢဝ်ႇ Tachileik News Agency ဢွၵ်ႇဝႆႉဝႃႈ “ ႁႅင်းၵၢၼ် ဢၼ်ထုၵ်ႇသူင်ႇပွၵ်ႈမႃးၼၼ်ႉ မၢင်ၵေႃႉ ပဵၼ်ၵူၼ်း လၵ်ႉၶဝ်ႈၵႂႃႇႁဵတ်းၵၢၼ်မိူင်းပိူၼ်ႈ။ မၢင်ၵေႃႉသမ်ႉ ပူၼ်ႉဢွင်ႈတီႈဢၼ်မၵ်းမၼ်ႈဝႆႉ။ မၢင်ၵေႃႉ ဝတ်းဝႂ်မူတ်းဢႃယု ၸဵမ်ၸိူဝ်းၼႆႉ” ဝႃႈၼႆ။
ၵဵဝ်ႇလူၺ်ႈလွင်ႈၼႆႉ တင်ႈတႄႇဢဝ် လိူၼ်ၵျႅၼ်ႊၼိဝ်ႊရီႊမႃး ထိုင် လိူၼ်သႅပ်ႊထႅမ်ႊၿိူဝ်ႊ 2018 ၼႆႉ ႁႅင်းၵၢၼ် ဢၼ်ထုၵ်ႇသူင်ႇပွၵ်ႈၶိုၼ်းတၢင်းၽၵ်းတူမိူင်း တႃႈၶီႈလဵၵ်း မႄးသၢႆ မီး 908 ၵေႃႉ ပဵၼ်ၽူႈၸၢႆး 605 ၵေႃႉ၊ ၽူႈယိင်း 272 ၵေႃႉလႄႈ လုၵ်ႈဢွၼ်ႇ 31 ၵေႃႉ ဝႃႈၼႆ။