တႄႇဢဝ်ႁူဝ်ပီ 2019 ၼႆႉမႃး ႁႅင်းၵၢၼ်မိူင်းႁူမ်ႈတုမ် ဢၼ်ၶဝ်ႈ ႁဵတ်းၵၢၼ် ႁႃၵိၼ်လဵင်ႉတွင်ႉ ၼႂ်းမိူင်းထႆးၼၼ်ႉ ယွၼ်ႉ ဢမ်ႇမီးဝတ်းဝႂ်တဵမ်ထူၼ်ႈသေ ထုၵ်ႇပလိၵ်ႈထႆး တီႉၺွပ်းသူင်ႇတူဝ်ပွၵ်ႈတၢင်းလႅၼ်လိၼ် တႆး – ထႆး တၢင်းတႃႈၶီႈလဵၵ်း တင်းမူတ်း မီးၵႂႃႇ 924 ၵေႃႉ။
ဝၼ်းတီႈ 17/6/2019 ပလိၵ်ႈထႆး သူင်ႇတူဝ်ႁႅင်းၵၢၼ်မိူင်းႁူမ်ႈတုမ် မွပ်ႈယိုၼ်ႈပၼ် ၾၢႆႇၸဝ်ႈၼႃႈတီႈတၢင်းၾင်ႇ တႃႈၶီႈ လဵၵ်း တီႈလႅၼ်လိၼ် တႆး – ထႆး (မႄႈသၢႆ- တႃႈၶီႈလဵၵ်း) ၸိုင်ႈတႆးပွတ်းဢွၵ်ႇၶူင်း။ တင်းမူတ်း သူင်ႇမွပ်ႈပၼ် 8 ၵေႃႉ။ ၼႂ်း 8 ၵေႃႉၼၼ်ႉ ၸၢႆး 5 ၵေႃႉ၊ ယိင်း 3 ၵေႃႉ။
ႁႅင်းၵၢၼ် 8 ၵေႃႉၼႆႉ ပဵၼ်ၵူၼ်းယူႇသဝ်းၼႂ်းၸိုင်ႈတႆး တၢင်းပွတ်းဢွၵ်ႇ 3 ၵေႃႉ၊ တၢင်းပွတ်းၸၢၼ်း 3 ၵေႃႉလႄႈ တၢင်း ပွတ်းႁွင်ႇ 2 ၵေႃႉ ဝႃႈၼႆ။
တႄႇဢဝ်ဝၼ်းတီႈ 1 လိူၼ်ၵျႅၼ်ႊၼိဝ်ႊရီႊ 2019 ထိုင် ဝၼ်းတီႈ 17 လိူၼ်ၵျုၼ်ႊ 2019 ၼႆႉ တင်းမူတ်းႁႅင်းၵၢၼ် ဢၼ် ၺႃးၸဝ်ႈၼႃႈတီႈထႆး တီႉၺွပ်းသူင်ႇပွၵ်ႈမႃးတၢင်းၾင်ႇတႃႈၶီႈလဵၵ်းၼႆႉ ၽူႈၸၢႆး 608 ၵေႃႉ၊ ၽူႈယိင်း 284 ၵေႃႉလႄႈ လုၵ်ႈ ဢွၼ်ႇ 32 ၵေႃႉ ႁူမ်ႈၵၼ် တင်းမူတ်း 924 ၵေႃႉ။
ၵဵဝ်ႇလူၺ်ႈလွင်ႈ ဢၼ်ထုၵ်ႇတီႉၺွပ်းသူင်ႇပွၵ်ႈမႃးၼႆႉ ၵဵဝ်ႇလူၺ်ႈပၼ်ႁႃ ၵူႈလွင်ႈလွင်ႈ မိူၼ်ၼင်ႇ လွင်ႈဝတ်းဝႂ်ဢမ်ႇတဵမ် ထူၼ်ႈ၊ ဢမ်ႇမီးဝႂ်ႁဵတ်းၵၢၼ်၊ ႁဵတ်းၵၢၼ်ၽိတ်းတီႈ၊ ဝတ်းဝႂ်မူတ်းဢႃယု၊ ဢွၵ်ႇၼွၵ်ႈပိုၼ်ႉတီႈ ဢၼ်ႁၢမ်ႈဝႆႉ။ လိူဝ်ၼၼ်ႉ လၵ်ႉၶဝ်ႈၵႂႃႇႁဵတ်းၵၢၼ် ဢမ်ႇပဵၼ်တၢင်းၵၢၼ် ၸဵမ်ၸိူဝ်းၼႆႉ။
ၶေႃႈမုလ်း – Tachileik News Agency
