ၸဝ်ႈၼႃႈတီႈပလိၵ်ႈထႆး ၵူတ်ႇထတ်းတီႉၺွပ်းႁႅင်းၵၢၼ်တႆး ဢၼ်ဢမ်ႇၸွမ်းပၵ်းပိူင်မၢႆမီႈထႆး 3 ၵေႃႉ သူင်ႇႁူင်းပလိၵ်ႈ။

ဝၼ်းတီႈ 27/08/2018 သိုဝ်ႇၶၢဝ်ႇၵဵင်းမႆႇပိုၼ်ၽၢဝ်ႇဝႃႈ – ၸဝ်ႈၼႃႈတီႈပလိၵ်ႈႁူင်းပလိၵ်ႈမႄႈပိင်း ၸႄႈတွၼ်ႈ   ၵဵင်းမႆႇ ႁူမ်ႈၵၼ်လူင်း ၵူတ်ႇထတ်းၼႂ်းပိုၼ်ႉတီႈ ဢိူင်ႇဝတ်ႉၵဵတ်ႇ ၸႄႈဝဵင်းမိူင်း ၸႄႈတွၼ်ႈၵဵင်းမႆႇသေ တီႉၺွပ်း ၸၢႆးၼုမ်ႇ မိူင်း ဢႃယု 28 ပီ၊ ၸၢႆးမႅတ်ႈဢွင်ႇ ဢႃယု 30 ပီ၊ ၸၢႆးသႅင် ဢႃယု 21 ပီ လူၺ်ႈတူတ်ႈ တၢမ်ႇတၢင်းၽိတ်းဢမ်ႇဢဝ်ဝတ်းဝႂ်ႁဵတ်းၵၢၼ်ဝႆႉ ၸပ်းတူဝ် ၊ ဢမ်ႇမီးဝႂ်သင်ၼႄ လႆႈၽွင်းၸဝ်ႈ ၼႃႈတီႈ လူင်းၵူတ်ႇထတ်း ယွၼ်းတူၺ်း ၸဵမ်ၸိူဝ်းၼႆႉ။

ၸၢႆးပိူင်း ၸဝ်ႈၼႃႈတီႈ ၾၢႆႇမၢႆမီႈႁႅင်းၵၢၼ် HRDF ယၢမ်ႈလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ဝႂ်ၵပ်းတူဝ်ဢၼ်ဝႃႈၼၼ်ႉ ဢမ်ႇဝႃႈဝႂ် Passport ၊ ဝႂ်ႁဵတ်းၵၢၼ်၊ ဝႂ်ၶပ်းၶီႇ(လၢႆႇသိၼ်ႇ)လူတ်ႉ-ၵႃး ၸိူဝ်းၼႆႉ ႁဝ်းလူဝ်ႇ ဢဝ်ၸပ်းတူဝ်ႁဝ်းယူႇတႃႇသေႇ ပေႃးၸဝ်ႈၼႃႈတီႈၶဝ်ယွၼ်း တူၺ်းၼႆ တေၸၢင်ႈၼႄပိူၼ်လႆႈ ” ဝႃႈၼႆ။

သိုပ်ႇလၢတ်ႈဝႃႈ – “ ဢမ်ႇမီးဝတ်းဝႂ်သင်လႄႈသင်၊ မီးဝတ်းဝႂ်တဵမ်ထူၼ်ႈယူႇသေတႃႉ ပေႃးဢမ်ႇၼႄလႆႈ ၽွင်းၺႃး ၸဝ်ႈၼႃႈတီႈမႃးၵူတ်ႇထတ်းလႄႈသင်တိုၼ်းၺႃးတီႉယဵတ်ႈၶွၵ်ႈ။ ယွၼ်ႉၼၼ်ထုၵ်ႇ လီဢဝ်ဝတ်း ဝႂ်ၸပ်းတူဝ်ဝႆႉတႃႇသေႇ ” – ဝႃႈၼႆ။

ၸဝ်ႈၼႃႈတီႈပလိၵ်ႈ ၸင်ႇတီႉၺွပ်းၶဝ်တင်း 3 ၵေႃႉ သူင်ႇႁူင်းပလိၵ်ႈမႄႈပိင်း ပၼ်တူတ်ႈတၢမ်ႇ ၸွမ်းၼင်ႇပၵ်း  ပိူင်မၢႆမီႈမိူင်းထႆးမီးၼၼ်ႉသိုပ်ႇၵႂႃႇ ၼႆယဝ်ႉ။