ၵေႃႁူမ်ႈသၢင်ႈၵူၼ်းၼုမ်ႇတႆး TYN လူင်းပိုၼ်ႉတီႈ ႁူပ်ႉထူပ်းၵူၼ်းၼုမ်ႇတႆးလၢႆလၢႆဝဵင်း ၼႂ်းထုင်ႉႁူဝ်ၵဵဝ်သၢင်ႈလွင်ႈမိုတ်ႈၵိုဝ်းၸမ်ၸႂ်ၵၼ် တႃႇၸၢင်ႈႁူမ်ႈသၢင်ႈၼႃႈၵၢၼ်ၵႂႃႇမိူဝ်းၼႃႈ။
ၵေႃႁူမ်ႈသၢင်ႈၵူၼ်းၼုမ်ႇတႆး TYN ႁူမ်ႈဢဵၼ်ႁႅင်းၵၼ်လၢႆၵေႃႉသေ လူင်းပိုၼ်ႉတီႈႁူပ်ႉထူပ်းၸုမ်းၵူၼ်းၼုမ်ႇတႆး ဢၼ်မီးၼႂ်းထုင်ႉႁူဝ်ၵဵဝ်လၢႆလၢႆဝဵင်း မိူၼ်ၼင်ႇ ဝၢၼ်ႈသၵွၼ်း ဝဵင်းမိူင်းယၢင်း၊ ဝၢၼ်ႈပၢၼ်းၼႃး တီႈၼွင်မႄႈမၢႆႈ ။ ဝဵင်းမိူင်းၵွင်၊ ဝဵင်းၸႄႈၼႃး၊ ဝၢၼ်ႈမေႃႇ၊ လွႆၸေႊ၊ မိူင်းဝၼ်း၊ မၢၼ်ႈသိမ်ႇ၊ ၽႃၵၢၼ်ႉ ၸိူဝ်းၼႆႉ။
ၸၢႆးမၢဝ်းႁၢၼ် ႁူဝ်ၼႃႈၵူၼ်းၼုမ်ႇမိူင်းၶိူဝ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ -“ ယိူင်းဢၢၼ်းဢၼ်ႁဝ်းၶႃႈ လူင်းပိုၼ်ႉတီႈ ႁူပ်ႉထူပ်းဢုပ်ႇဢူဝ်းၵၼ်ၼႆႉ ပိူဝ်ႈသၢင်ႈလွင်ႈမိုတ်ႈၵိုဝ်းၸမ်ၸႂ်ၵၼ် ၾၢႆႇTYN သပ်းလႅင်းၼႄ လွင်ႈတူင်ႉၼိုင်ၼႃႈၵၢၼ် ဢၼ်ႁဵတ်းသၢင်ႈမႃး ပိတ်ႉမၢၵ်ႇၼင်ႁူမ်ႈၵၼ် သၢင်ႈလွင်ႈမိုတ်ႈၵိုဝ်း ၸမ်ၸႂ်ၵၼ် မိူဝ်းၼႃႈမႃးႁႂ်ႈၸၢင်ႈႁဵတ်းသၢင်ႈၼႃႈၵၢၼ် ၸွမ်းၵၼ်ၵႂႃႇလႆႈ ” ဝႃႈၼႆ။
ထုင်ႉႁူဝ်ၵဵဝ်ၼႆႉမီးပီႈၼွင်ႉတႆးယူႇသဝ်းတင်းၼမ် ၼႂ်းထုင်ႉ မီး 4 ၸႄႈတွၼ်ႈ မိူၼ်ၼင်ႇ1.ၸႄႈတွၼ်ႈ ၸႄႈၼႃး ဢၼ်ႁွင်ႉဝႃႈ ( မိတ်ႉၵျီးၼႃး) ၊ 2.ၸႄႈတွၼ်ႈ ဝၢၼ်ႈမေႃႇ (ပမေႃႇ)၊ 3.ၸႄႈတွၼ်ႈ မိူင်းယၢင်း (မူဝ်းၺိၼ်း)၊ 4. ၸႄႈတွၼ်ႈပူႇထဝ်ႈ (ပူႇတႃႇဢူဝ်ႇ) ၸိူဝ်းၼႆႉပဵၼ်မိူင်း ၸဝ်ႈၾႃႉတႆးၵေႃႇ တင်ႈၽွင်း ငမ်းမႃး ၊ ပၢင်ၵုမ်လူင် တီႈဝဵင်းပၢင်လူင် ပၢၼ်လိၵ်ႈႁူမ်ႈမၢႆပၢင်လူင် 1947 ၼၼ်ႉ တႅပ်းတတ်းပၼ်လႄႈ တူၵ်းပဵၼ် ၸႄႈမိူင်းၶၢင်ၵႂႃႇ တေႃႇယၢမ်းလဵဝ်။
