ၵေႃႁူမ်ႈသၢင်ႈၵူၼ်းၼုမ်ႇတႆး TYN လူင်းပိုၼ်ႉတီႈ ႁူပ်ႉထူပ်းၵူၼ်းၼုမ်ႇတႆးၼႂ်းထုင်ႉၵဵဝ်သေ ႁူမ်ႈၵၼ်လဵၼ်ႈ မၢၵ်ႇၼင် တႃႇသၢင်ႈလွင်ႈမိုတ်ႈၵိုဝ်းၸမ်ၸႂ်လႄႈ ႁႂ်ႈၵူၼ်းၼုမ်ႇၵႆယၢၼ်ယႃႈမဝ်းၵမ်။
တႄႇဝၼ်းတီႈ 10/09/2018 မႃးၼႆႉ ၵေႃႁူမ်ႈသၢင်ႈၵူၼ်းၼုမ်ႇတႆး TYN လူင်းပိုၼ်ႉတီႈႁူပ်ႉထူပ်းၵူၼ်းၼုမ်ႇတႆး ၼႂ်းထုင်ႉႁူဝ်ၵဵဝ် ႁူမ်ႈၵၼ်ပိတ်ႉမၢၵ်ႇၼင်တႃႇသၢင်ႈလွင်ႈမိုတ်ႈၵိုဝ်းၸမ်ၸႂ်ၵၼ် ႁႂ်ႈၵူၼ်းၼုမ်ႇၵႆယၢၼ်ယႃႈမဝ်းၵမ် ၸိူဝ်းၼႆႉ။
ၸၢႆးမၢဝ်းႁၢၼ် ႁူဝ်ၼႃႈၵူၼ်းၼုမ်ႇမိူင်းၶိူဝ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ -“ ယိူင်းဢၢၼ်းဢၼ်ၸတ်းပၢင် ပိတ်ႉမၢၵ်ႇၼင်ၼႆႉ ပိူဝ်ႈႁႂ်ႈၵူၼ်းၼုမ်ႇထုင်ႉၼိုင်ႈလႄႈ မိူင်းၼိုင်ႈ မိုတ်ႈၵိုဝ်းၸမ်ၸႂ်ၵၼ်၊ ႁႂ်ႈၵူၼ်းၼုမ်ႇၵႆယၢၼ် ယႃႈမဝ်းၵမ်၊ ႁႂ်ႈပၢႆးယူႇလီၶႅမ်ႉ၊ ႁႂ်ႈမီးလွင်ႈၶဝ်ႈႁႃၵၼ်၊ ႁႂ်ႈၵူၼ်းၼုမ်ႇႁူမ်ႈႁႅင်းၵၼ်ႁဵတ်းသၢင်ႈၼႃႈၵၢၼ်မိူဝ်းၼႃႈ “ ၸိူဝ်းၼႆႉ။
တႄႇဝၼ်းတီႈ 10/09/2018 မႃးၼႆႉ ၵေႃႁူမ်ႈသၢင်ႈၵူၼ်းၼုမ်ႇတႆး TYN လူင်းပိုၼ်ႉတီႈ ႁူပ်ႉထူပ်း ၵူၼ်းၼုမ်ႇလၢႆလၢႆဝဵင်းမိူၼ်ၼင်ႇ သၵွၼ်း၊ ၼွင်လူင်၊ မိူင်းၵွင်းဢၼ်မီးၼႂ်းၸႄႈတွၼ်ႈမိူင်းယၢင်း၊ ဝဵင်းၸႄႈၼႃး(မိတ်ႉၵျီးၼႃး) ဝဵင်းမႂ်ႇၸိူဝ်းၼႆႉ။
ထုင်ႉႁူဝ်ၵဵဝ်ၼႆႉ မီး 4 ၸႄႈတွၼ်ႈ 1.ၸႄႈတွၼ်ႈ ၸႄႈၼႃး ဢၼ်ႁွင်ႉဝႃႈ ( မိတ်ႉၵျီးၼႃး) ၊ 2.ၸႄႈတွၼ်ႈ ဝၢၼ်ႈမေႃႇ (ပမေႃႇ)၊ 3.ၸႄႈတွၼ်ႈ မိူင်းယၢင်း (မူဝ်းၺိၼ်း)၊ 4. ၸႄႈတွၼ်ႈ ပူႇထဝ်ႈ (ပူႇတႃႇဢူဝ်ႇ) ။ ဝဵင်းၸိူဝ်းၼႆႉ ပဵၼ်တႆးၵေႃႇ တင်ႈၽွင်းငမ်းမႃး ၊ ပၢင်ၵုမ်လူင်တီႈဝဵင်းပၢင်လူင် ပၢၼ်လိၵ်ႈႁူမ်ႈမၢႆပၢင်လူင် 1947 ၼၼ်ႉ တႅပ်းတတ်းပၼ်လႄႈ တူၵ်းပဵၼ်ၸႄႈမိူင်းၶၢင်မႃး တေႃႇယၢမ်းလဵဝ်။
