တႄႇဢဝ်လိူၼ် ၵျႅၼ်ႊၼိဝ်ႊရီႊ ႁူဝ်ပီ 2026 မႃး တေႃႇထိုင်ယၢမ်းလဵဝ် တီႈမိူင်းသီလင်ႊၵႃႊ ၵူၼ်းတိတ်းၸပ်းတၢင်းပဵၼ် ၼၢဝ်ၶႆႈလိူတ်ႈဢွၵ်ႇ မီး 44000 ပၢႆ၊ လူႉတၢႆ 28 ၵေႃႉ။ ၽူႈမီးပုၼ်ႈၽွၼ်း ၾၢႆႇပၢႆးယူႇလီ လၢတ်ႈဝႃႈ – ပဵၼ်ပီ ဢၼ်တၢင်းပဵၼ်ၼၢဝ်ၶႆႈလိူတ်ႈဢွၵ်ႇ ၽႄႈလၢမ်းလိူဝ်ပိူၼ်ႈႁၢဝ်ႈႁႅင်း ဝႃႈၼႆ။
ယွၼ်ႉၵူၼ်းတိတ်းၸပ်းတၢင်းပဵၼ် ၼမ်ၶိုၼ်ႈမႃးလႄႈ ၸွမ်းႁူင်းယႃလူင်ပွင်ၸိုင်ႈၸိူဝ်းၼႆႉ ၵူၼ်းတဵမ်ၵႂႃႇမူတ်းသေ ႁူပ်ႉလွင်ႈယၢပ်ႇၽိုတ်ႇ တႃႇတေယူတ်းယႃတူဝ်ဝႆႉ။
မိူင်းသီလင်ႊၵႃႊၼႆႉ ပဵၼ်မိူင်းၾိင်ႈၾႃႉရႃႇသီႇ မႆႈလႄႈ ၵႆႉပဵၼ်တၢင်းပဵၼ် ၼၢဝ်ၶႆႈလိူတ်ႈဢွၵ်ႇယူႇတင်းပီ။ မိူဝ်ႈပီ 2017၊ 2019 လႄႈ 2023 ၼၼ်ႉၵေႃႈ တၢင်းပဵၼ်ၼၢဝ်ၶႆႈလိူတ်ႈဢွၵ်ႇ ၽႄႈလၢမ်းႁၢဝ်ႈႁႅင်း မိူၼ်ၵၼ်။
ပီၼႆႉသမ်ႉ ယွၼ်ႉၶူင်းၵၢၼ်ၶႂၢၵ်ႈဝဵင်း၊ တီႈယူႇသဝ်းဢမ်ႇမီးပၵ်းပိူင်၊ ယုၵ်းယၢၵ်းၼမ်၊ ယွၼ်ႉၾိင်ႈၾႃႉရႃႇသီႇလႅၵ်ႈလၢႆႈသေ ႁဵတ်းႁႂ်ႈတၢင်းပဵၼ်ၽႄႈလၢမ်းႁၢဝ်ႈႁႅင်းမႃးလိူဝ်ၵူႈပီ။ ၼႂ်းလိူၼ်ၵျုၼ်ႊၼႆႉ ၵူၼ်းတိတ်းၸပ်းတၢင်းပဵၼ် ၼမ်လိူဝ် မိူဝ်ႈလိူၼ်ဢေႊပရိူဝ်ႊၼၼ်ႉ 2 ပုၼ်ႈ။ ၶၢဝ်းတၢင်း ထႅင်ႈ 2 ဝူင်ႈၵေႃႈ တၢင်းပဵၼ် တိုၵ်ႉတေၽႄႈလၢမ်း တိတ်းၸပ်းၵၼ်ဝႆႉႁၢဝ်ႈႁႅင်းယူႇ ဝႃႈၼႆ။
ၸွမ်းၼင်ႇ ၽူႈမီးပုၼ်ႈၽွၼ်းၶဝ် လူင်းၵူတ်ႇထတ်းၼႂ်းပိုၼ်ႉတီႈသေ ၸွမ်းႁူင်းႁဵၼ်း၊ လုမ်းလူင်ပွင်ၸိုင်ႈ၊ ႁူင်းၸၢၵ်ႈႁူင်းၵၢၼ် လႄႈ ၸွမ်းဝတ်ႉဝႃးၸိူဝ်းၼႆႉ ပဵၼ်ဢွင်ႈတီႈယုင်းၽႄႈလၢမ်းၼမ်လိူဝ်ပိူၼ်ႈ။ ၼင်ႇႁိုဝ် ၵူၼ်းပဵၼ်တေယွမ်းလူင်းၵႂႃႇၼၼ်ႉ ၽူႈမီးပုၼ်ႈၽွၼ်းၶဝ် လႆႈသိတ်းပၼ် ယႃႈၶႃႈယုင်း၊ ဢွၼ်ၵၼ်တီႇၽဵဝ်ႈၸွမ်း ဢွင်ႈတီႈ ယုင်း တေၸၢင်ႈၽႄႈလၢမ်း ၸဵမ်ၸိူဝ်းၼႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ