မိူဝ်ႈၼႆႉ ဝၼ်းတီႈ 25/01/2026 သိုၵ်းမၢၼ်ႈယိုတ်းမိူင်း ၸတ်းပၢင်လိူၵ်ႈတင်ႈ ပွၵ်ႈၵမ်း 3 ၼႂ်းမိူင်းတႆး ပႃး 9 ၸႄႈဝဵင်း ဝဵင်းၵျွၵ်ႉမႄး ဢၼ်သိုၵ်းမၢၼ်ႈတိုၵ်ႉၶဝ်ႈၵုမ်းၶိုၼ်းပႆႇထိုင် 6 လိူၼ်ၼႆႉၵေႃႈ ၸတ်းႁဵတ်းပႃး။

ဝဵင်းၵျွၵ်ႉမႄး ဢၼ်သိုၵ်းမၢၼ်ႈယိုတ်းဢဝ်လႆႈၶိုၼ်း ၼႂ်းမိုဝ်း ၸုမ်းသိုၵ်းတဢၢင်း TNLA မိူဝ်ႈႁၢင်ပီ 2025 ပူၼ်ႉမႃးၼႆႉ ဢိင်ၼိူဝ်ငဝ်းလၢႆး ၼႂ်းပိုၼ်ႉတီႈသေ သိုၵ်းမၢၼ်ႈဢမ်ႇႁတ်း ၸတ်းပၢင်လိူၵ်ႈတင်ႈ ပတ်းပိုၼ်ႉတင်းဝဵင်း။ ၸတ်းလႆႈၼႂ်းဝဵင်း 9 ပွၵ်ႉလႄႈ 25 ဝၢၼ်ႈဢၼ်မီးၼႂ်းဢိူင်ႇ ၵုင်းမၢၵ်ႇလၢင်း၊ ၵျွၵ်ႉမႄးလူင်၊ မၢၼ်ႈၵျွင်း၊ ၶူဝ်မုင်း လႄႈ ၵျွႆးၵုင်း 5 ဢိူင်ႇ ၵူၺ်းလႄႈ လႆႈဝႃႈၸတ်းလႆႈ 6 % ၶွင်ပိုၼ်ႉတီႈၵူၺ်း ဝႃႈၼႆ။

ၵူၼ်းပိုၼ်ႉတီႈဝဵင်းၵျွၵ်ႉမႄးလၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းၵႂႃႇသႂ်ႇၶႅပ်းၵၢင်ၸႂ် မီးဢိတ်ႉၼိုင်ႈၵူၺ်း။ ၵမ်ႈၼမ်ၵေႃႈ ပဵၼ်ၵူၼ်းၼႂ်းၸုမ်းၶဝ်ၵူၺ်းၼႃႇ။ ၵူၼ်းၼႂ်းပွၵ်ႉ ၼႂ်းဝဵင်းတႄႉတႄႉ ၸိူဝ်းဢမ်ႇၵႂႃႇဢမ်ႇလႆႈၼၼ်ႉ တႄႉယွၼ်ႉဝႃႈလူဝ်ႇၵႂႃႇ ႁဵတ်းၵၢၼ်ႁႃၵိၼ်လဵင်ႉတွင်ႉၽႂ်မၼ်းလႄႈ ဢွၼ်ၵၼ်ၼႅတ်ႈၵႂႃႇသႂ်ႇဝႆးဝႆးသေ ပူၼ်ႉၵႂႃႇၵၢၼ်။ ၽႂ်ၵေႃႈ ဢမ်ႇပေႃးသူၼ် ၸႂ်သင်” – ဝႃႈၼႆ။

ပၢင်လိူၵ်ႈတင်ႈတီႈဝဵင်းၵျွၵ်ႉမႄးဝၼ်းမိူဝ်ႈၼႆႉ ႁူင်းတွတ်ႈၶႅပ်းၵၢင်ၸႂ်မီး 25 ႁူင်း။

တီႈၸႄႈဝဵင်းၵျွၵ်ႉမႄးၼႆႉ မီးဝႆႉ 81 ဢိူင်ႇ လႄႈ ၼိူဝ်ဝဵင်း 9 ပွၵ်ႉ။ မိူၼ်ၼင်ႇ ဝၢၼ်ႈဢိူင်ႇ ဢၼ်ၵႆဝဵင်း လႄႈ တၢင်းမိူင်းငေႃႉ မိူင်းလူင် ၼႂ်းၼႃႈတီႈသိုၵ်းတဢၢင်းၵုမ်းၵမ်ဝႆႉသေ ၶဝ်ႈပႃးၼႂ်းၸႄႈဝဵင်းၵျွၵ်ႉမႄးၼၼ်ႉ သိုၵ်းမၢၼ်ႈ ဢမ်ႇပဵၼ်ၸတ်းပၢင် လိူၵ်ႈတင်ႈ။ ယွၼ်ႉၼၼ် ပေႃးတႅၵ်ႈၼိူင်းၵၼ် တင်းၸႄႈဝဵင်းၼႆ ဢၼ်ၸတ်းပၢင်လိူၵ်ႈတင်ႈလႆႈၼႆႉ မီး 6 % ၵူၺ်း ဝႃႈၼႆ။

ဢၼ်ၶဝ်ႈၶႅင်ႇလိူၵ်ႈတင်ႈ တီႈၸႄႈဝဵင်းၵျွၵ်ႉမႄးၼႆႉ မီးဝႆႉ 2 ပႃႇတီႇၵူၺ်း။ ပဵၼ်ပႃႇတီႇသၢင်ႇသီႈ USDP လႄႈ ပႃႇတီႇ သိူဝ်ၽိူၵ်ႇ USDP။

တီႈၼင်ႈ သၽႃးၸႄႈမိူင်း ၸွမ်းၼင်ႇပိူင် ၽူႈပေႉၵိၼ်ၶၢတ်ႇ FPTP ၼႆႉ ပႃႇတီႇ သိူဝ်ၽိူၵ်ႇ ဢမ်ႇၶဝ်ႈၶႅင်ႇလႄႈ ၾၢႆႇပႃႇတီႇသၢင်ႇသီႈ USDP လႆႈတီႈၼင်ႈဝႆႉ လူၺ်ႈဢမ်ႇမီးၽူႈၶႅင်ႇ ဝႃႈၼႆ။