ဝၢႆးလင်ပၢင်လိူၵ်ႈတင်ႈ ပွၵ်ႈၵမ်းသွင်ယဝ်ႉ တေႃႇထိုင်ဝၼ်းတီႈ 19 လိူၼ်ၵျႅၼ်ႊၼိဝ်ႊရီႊ ပီ 2026 ၼႆႉ ၵူၼ်းမိူင်း ၸိူဝ်းၺႃးသိုၵ်းမၢၼ်ႈတီႉၺွပ်းဢဝ်လိူင်ႈ ယွၼ်ႉသေႃႇသူၼ်း ယႃႉ ၵဝ်း ပၢင်လိူၵ်ႈတင်ႈ မီးၵႂႃႇ 404 ၵေႃႉယဝ်ႉ ဝႃႈၼႆ။
လွင်ႈၼႆႉ ၽွင်းလူင်ၾၢႆႇၼႂ်းမိူင်း ၸွမ်သိုၵ်း ထုၼ်းထုၼ်းၼွင်ႇ လၢတ်ႈၵႂႃႇတီႈၼႂ်းပၢင်ၵုမ် ႁၢင်ႈႁႅၼ်းတႃႇဢဝ်ႁူမ်ႇလူမ်ႈ ပၢင်လိူၵ်ႈတင်ႈ ပွၵ်ႈၵမ်း 3 ဢၼ်ၸတ်းႁဵတ်းတီႈငဝ်ႈငုၼ်း လုမ်းပလိၵ်ႈမိူင်းမၢၼ်ႈ (မိူဝ်ႈဝႃး) ဝၼ်းတီႈ 21/1/2026 ၼင်ႇၼႆ။
ယွၼ်ႉသေႃႇသူၼ်းယႃႉၵဝ်းပၢင်လိူၵ်ႈတင်ႈ ၼႆသေ ပိုတ်ႇဢဝ်လိူင်ႈဝႆႉ 331 လိူင်ႈ၊ ၼႂ်းၼၼ်ႉပႃး ၵူၼ်းၸၢႆး 324 ၵေႃႉလႄႈ ၼၢင်းယိင်း 80 ၵေႃႉ။
ပၢင်လိူၵ်ႈတင်ႈပွၵ်ႈၵမ်း 3 ၼႆႉ တေၸတ်းႁဵတ်းၼႂ်းဝၼ်းတီႈ 25 /1/2026 ၼႆႉ၊ တီႈ 63 ၸႄႈဝဵင်း ပတ်းပိုၼ်ႉမိူင်းမၢၼ်ႈ။ ၵူၼ်းၸိူဝ်းသေႃႇသူၼ်းယႃႉၵဝ်းပၢင်လိူၵ်ႈတင်ႈၼၼ်ႉ တေသိုပ်ႇဢဝ်လိူင်ႈၵႂႃႇထႅင်ႈ ဝႃႈၼႆ။
ၸွမ်သိုၵ်း ထုၼ်းထုၼ်းၼွင်ႇ လၢတ်ႈဝႃႈ – ပၢင်လိူၵ်ႈတင်ႈ ပွၵ်ႈၵမ်းၼိုင်ႈၼၼ်ႉ မီးၵူၼ်းတွတ်ႈၶႅပ်းၵၢင်ၸႂ် 52.13%၊ ပွၵ်ႈၵမ်းသွင်သမ်ႉ မီး 55.95% လႄႈ ပွၵ်ႈၵမ်သၢမ်ၵေႃႈ ၼင်ႇ ႁိုဝ်တေၸတ်းႁဵတ်းဢွင်ႇမၢၼ်ၵႂႃႇလႆႈၼၼ်ႉ တေတိူဝ်းၶဵင်ႈၶႅင်ဢဵၼ်ႁႅင်းၾၢႆႇႁူမ်ႇလူမ်ႈၵႂႃႇ ဝႃႈၼႆ။
ၼင်ႇႁိုဝ်တေဢမ်ႇမီးလွင်ႈသုၵ်ႉယုင်ႈဢူၼ်ၵဝ်း ၽွင်းၶၢဝ်းပၢင်လိူၵ်ႈတင်ႈၼႆသေ မိူဝ်ႈဝၼ်းတီႈ 29 လိူၼ်ၵျူႊလၢႆႊ ပီ 2025 ၼၼ်ႉ သိုၵ်းမၢၼ်ႈပိုၼ်ၽၢဝ်ႇၸႂ်ႉတိုဝ်း ပၵ်းပိူင်မၢႆမီႈ ၾၢႆႇၵႅတ်ႇၶႄႁႄႉၵင်ႈပၼ် ပၢင်လိူၵ်ႈတင်ႈ။ ယွၼ်ႉသေႃႇသူၼ်းယႃႉၵဝ်းပၢင်လိူၵ်ႈတင်ႈၼႆသေ ၼႂ်းၶၢဝ်းတၢင်း 6 လိူၼ် သိုၵ်းမၢၼ်ႈတီႉၺွပ်းၵူၼ်းမိူင်း ၼပ်ႉႁူဝ်ပၢၵ်ႇၵေႃႉယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ