ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်း ဢွၼ်ၼမ်းၸတ်းႁဵတ်းယူႇၼႆႉ ဢႃႊသီႊယၼ်ႊ ဢမ်ႇမၵ်းမၼ်ႈပဵၼ်တၢင်းၵၢၼ်ၼႆ ၽွင်းလူင်ၵၢၼ်ၼွၵ်ႈမိူင်း မိူင်းမလေးသျႃႊ တူၵ်ႇတၵ်ႉ လၢတ်ႈၵႂႃႇ မိူဝ်ႈဝႃး ဝၼ်းတီႈ 20 လိူၼ်ထူၼ်ႈၼိုင်ႈၼႆႉ ၼင်ႇၼႆ။

သိုၵ်းမၢၼ်ႈၼႆႉ ယႅၵ်ႈ 3ၵမ်းသေ ၸတ်းႁဵတ်းပၢင်လိူၵ်ႈတင်ႈ ၼႂ်းၼႃႈတီႈၶဝ်ၵုမ်းၵမ် ပတ်ႉပိုၼ်ႉမိူင်းႁူမ်ႈတုမ်။ ယၢမ်းလဵဝ် ပၢင်လိူၵ်ႈတင်ႈၸတ်းႁဵတ်းယဝ်ႉတူဝ်ႈၵႂႃႇ 2 ၵမ်း။ ၼႂ်းဝၼ်းတီႈ 25 ဝူင်ႈၼႆႉ တေၸတ်းႁဵတ်းထႅင်ႈ ပဵၼ်ပွၵ်ႈၵမ်း 3။

ၵဵဝ်ႇၵပ်းပၢင်လိူၵ်ႈတင်ႈၼႆႉသေ ယူႇတီႈ ဢႃႊသီႊယႅၼ်ႊ ဢမ်ႇၵမ်ႉထႅမ်၊ တူဝ်တႅၼ်းပႂ်ႉတူၺ်းပၢင်လိူၵ်ႈတင်ႈၵေႃႈ ဢမ်ႇလႆႈသူင်ႇၵႂႃႇၼႆ မိတ်ႊသ်တႃႊ မူဝ်ႊႁႃႊမတ်ႊ လၢတ်ႈၵႂႃႇ ၼင်ႇၼႆ။

မိူဝ်ႈပၢင်ၵုမ် ႁူဝ်ၼႃႈၸိၵ်းၸွမ် ဢႃႊသီႊယၼ်ႊ ဢၼ်ၸတ်းႁဵတ်းတီႈ ဝဵင်းၵႂႃႊလႃႊလမ်ႊပူႊ မိူင်းမလေးသျႃႊ ၼႂ်းပီၵၢႆၼၼ်ႉ သိုၵ်းမၢၼ်ႈ ယၢမ်ႈတုၵ်းယွၼ်းဝႃႈ – ႁႂ်ႈသူင်ႇတူဝ်တႅၼ်း တႃႇပႂ်ႉတူၺ်းၸွမ်းပၢင်လိူၵ်ႈတင်ႈ။ ဢိင်ၼိူဝ်ၶေႃႈၼၼ်ႉသေ ၾၢႆႇဢႃႊသီႊယၼ်ႊ ပၢၵ်ႈပႅတ်ႈ။

ၵူၺ်းၵႃႈ ၸိုင်ႈမိူင်းၶဝ်ႈၸုမ်းဢႃႊသီႊယၼ်ႊၵမ်ႈၽွင်ႈလႄႈ မိူၼ်ၼင်ႇ မိူင်းထႆး၊ ဢိၼ်ႊတီႊယိူဝ်ႊ၊ လၢဝ်း၊ ၾလိပ်ႉပိၼ်ႊ၊ ရတ်ႉသျႃႊ၊ ၼီႊပေႃႊ၊ ပႃႊၵိတ်ႊသတၢၼ်ႊၸိူဝ်းၼႆႉတႄႉ သူင်ႇတူဝ်တႅၼ်းၵႂႃႇပႂ်ႉတူၺ်းပၢင်လိူၵ်ႈတင်ႈသိုၵ်းမၢၼ်ႈယူႇ ၼႆယဝ်ႉ။