တႃႇၶိုၼ်ႈယႂ်ႇမႂ်ႇသုင်လႆႈ ၼႂ်းၵၢပ်ႈယၢမ်းလဵဝ် တၵ်းလူဝ်ႇမီးၼႅင်ႈသၢၼ်ၵႂၢင်ႈၶႂၢင် ။ လူဝ်ႇသၢင်ႈလွင်ႈမိုတ်ႈၵိုဝ်း ၊ လူဝ်ႇမီးမိၵ်ႈသႁၢႆလီၼမ် ၼႆ ၵႆႉလႆႈငိၼ်းၸိူင်ႉၼႆ ။ မၢင်ၸိူဝ်း ဢဝ်ၶေႃႈဢၢင်ႈဝႃႈ သၢင်ႈလွင်ႈမိုတ်ႈၵိုဝ်းၵၼ် သၢင်ႈလွင်ႈၸမ်ၸႂ်ၵၼ်ၼႆသေ ဢဝ်သူပ်းဢဝ်ၵႂၢမ်း ယဝ်ႉယွၵ်ႇၵၼ် ပူၼ်ႉတီႈ ထိုင်တီႈၽိတ်းၸႂ် ၵၼ်ၵေႃႈမီး။

လွင်ႈ လၢတ်ႈၸႃ လွင်ႈႁဵတ်းသၢင်ႈမၢင်တွၼ်ႈ ပေႃးဢမ်ႇၾၢင်ႉၵေႃႈ ၸၢင်ႈပဵၼ်လွင်ႈလူလၢႆၵၼ် ။ ၵၢပ်ႈယၢမ်းလဵဝ် သင်ဢမ်ႇႁၢၼ်ႉၸႂ်မႃး ၸၢင်ႈယိုၼ်ႈလိူင်ႈ ဢဝ်တၢင်းၽိတ်းလႆႈ တၢင်းႁဵတ်းတၢင်းလၢတ်ႈသေၵေႃႉၵေႃႉ ။ ပၢႆပီ 2025 ၼႆႉ ထႆးတႄႉ မၵ်းမၼ်ႈပိူင်မႂ်ႇထႅင်ႈဝႃႈ ၽႂ်ပူၼ်ႉပႅၼ်တင်းသူပ်းတင်းၵႂၢမ်း တင်းႁဵတ်းတင်းသၢင်ႈ တေႃႇၵူၼ်းသေၵေႃႉၵေႃႉၸိုင် ၽိတ်းပၵ်းပိူင်ၼႆယူႇ ။ ပိူင်ၸိူဝ်းၼႆႉ ႁူမ်ႇငမ်းလႆႈပႃး ၼိူဝ်ၾဵတ်ႉသ် ၼိူဝ်လၢႆးလူးၵွၼ်ႇ ။

ၵူၼ်းၼႂ်းမိူင်းတႆးၼႆႉ ၸဵမ်မိုၼ်ႉသိုၼ်းၵွၼ်ႇ ၽူႈလဵပ်ႈႁဵၼ်းပိုၼ်းၶဝ် ၵႆႉတႅမ်ႈမၢႆဝႆႉဝႃႈ ပဵၼ်ၵူၼ်းသႅၼ်းဢၼ် မေႃၵဵင်ၸႂ် ၊ မေႃႁၵ်ႉႁူမ်ၸူမ်းပႅင်းၵူၼ်းတီႈၸမ်တီႈၵႆ ၊ ပႆႇႁူႉၸၵ်းၵၼ်ၵေႃႈ ၵႆႉယုမ်ႉယၢႆႈတၵ်ႉၸူးၵၼ်သေ သၢင်ႈလွင်ႈမိုတ်ႈၵိုဝ်းငၢႆႈ ၼႆၸိူဝ်းၼႆႉ ။ ၾိင်ႈၸိူဝ်းၼႆႉ ၵႃႈၵွၼ်ႇပူၼ်ႉမႃးတႄႉဝႃႈ ပဵၼ်ၾိင်ႈလီႁၵ်ႉသႅၼ်းၼိုင်ႈ ဝႃႈၼႆသသေတႃႉ ၵၢပ်ႈယၢမ်ႈလဵဝ် သမ်ႉမီးၽေးၼႂ်းၵႄႈမၼ်းမႃး ။

ၵၢပ်ႈပၢၼ် မိူဝ်ႈပၵ်းပိူင်ၸိုင်ႈမိူင်းပႆႇမီးတႄႉ ၽိတ်းသင်မႃးၵေႃႈ တၢင်ႇလဝ်ႈလၢတ်ႈ တီႈၸဝ်ႈတီႈၶုၼ် မွၵ်ႈၼၼ်ႉၵူၺ်း ပႆႇမီးၽိုၼ်လိၵ်ႈမၢႆတမ်းဝႆႉပၼ်တႅတ်ႈၼႅတ်ႈ။ ၵၢပ်ႈယၢမ်းလဵဝ်တႄႉ ပၵ်းပိူင်ၵေႃႈ ဝၢၼ်ႈလႂ်မိူင်းၼၼ်ႉ ၾၢႆႇပၢၼ်ႇပွင်ၽွင်းငမ်းၶဝ် ဢွၼ်ၵၼ်ၶူင်ဢွၵ်ႇမၵ်းမၼ်ႈမႃးဢၼ်ၼိုင်ႈယဝ်ႉဢၼ်ၼိုင်ႈ ။
မၵ်းမၼ်ႈ ပိူင်ယဝ်ႉၵေႃႈ တၵ်းတေလႆႈႁဵတ်းၸွမ်း ။ ၵူၺ်းၵႃႈ ပပ်ႉ ၽိုၼ် ဢၼ်တႅမ်ႈဝႆႉ ပၵ်းပိူင်ၸိူဝ်းၼႆႉ ၵႃႈပေႉၶႂ်ႈမီးဝႆႉလၢႆဢၼ် ပေႃးၸိုင်ႈမိူင်းဢမ်ႇၼိမ်သဝ်းတႄႉ မၼ်းဢမ်ႇႁူမ်ႇငမ်း ႁႄႉၵင်ႈသင်ၵူၼ်းမိူင်းတဵမ်တီႈ ။

မိူၼ်ၼင်ႇ ပိူင်ဢၼ်ပူၼ်ႉပႅၼ်တၢင်းၵႃႇမၼႆႉ ၼႂ်းမိူင်းႁူမ်ႈတုမ်မၢၼ်ႈၵေႃႈ မီးဝႆႉယူႇသေတႃႉ ဢိင်ၼိူဝ်ဝၢၼ်ႈမိူင်းယုင်ႈသေ ဢမ်ႇမီးလွင်ႈႁုၼ်ႈမုၼ်း Update ၊ ပၵ်းပိူင်ဢမ်ႇလႆႈယူႇၼိူဝ်ၸဝ်ႈဢႃႇၼႃႇ ။ ၸဝ်ႈဢႃႇၼႃႇ ၶဝ်ၵူၺ်း ဢၼ်ယူႇၼိူဝ်ပၵ်းပိူင်သေ ၸတ်းပွင် ။ၸင်ႇၼၼ် ၵူၼ်းမိူင်းၵေႃႈ ဢမ်ႇသူၼ်ၸႂ် ဢမ်ႇသူႈၼပ်ႉယမ် ။
ၵူၺ်းၵႃႈ ပၵ်းပိူင်သင်ၵေႃႈယဝ်ႉ သင်ႁူႉၵႅမ်တူဝ်ဝႆႉၵေႃႈ ၸၢင်ႈဢဝ်ၵႅတ်ႇၶႄတူဝ်ၽွင်းထူပ်းပၼ်ႁႃမႃး ။ ၸဵမ်ဢဝ် ပၵ်းပိူင် ဢၼ်ၵဵဝ်ႇလူၺ်ႈ ပူၼ်ႉပႅၼ်တၢင်းၵႃႇမ ၸိူဝ်းၼႆႉ ။ ၾၢႆႇမၢၼ်ႈဝႃႈ လိင်ပိုင်းဆိုင်ရာ ထိပါးနှောင့်ယှက်မှု ၾၢႆႇထႆးဝႃႈ การคุกคามทางเพศ ။

ပေႃးတူၺ်း မိူင်းႁူမ်ႈတုမ်မၢၼ်ႈတႄႉ မီးဝႆႉၼႂ်း ပိူင် ရာဇသတ်ကြီး မတ်ႉတႃ 292 ၊ 293 ၊ 294 ၸိူဝ်းၼႆႉလႄႈ မတ်ႉတႃ 354 လႄႈ 509 ။ ပၵ်းပိူင်ၸိူဝ်းၼႆႉ တေႁူမ်ႇငမ်းလႆႈ တၢင်းၽိတ်း မိူၼ်ၼင်ႇ ပေႉၵိၼ်လူလၢႆ ၼၢင်းယိင်း ၊ တၢင်းၽိတ်းသႅၼ်းလဵၵ်ႉ သႅၼ်းယႂ်ႇ ပိူင်းၼႄဝႆႉတင်းၼမ်တင်းလၢႆ ။

ၼႂ်းတွၼ်ႈ မတ်ႉတႃ 509 ၼၼ်ႉ ပိူင်းဝႆႉဝႃႈ သင်ၸႂ်ႉ ၵႂၢမ်းလၢတ်ႈ ၊ လွင်ႈတူင်ႉၼိုင်ႁဵတ်းသၢင်ႈသေပိူင်ပိူင်သေ ႁဵတ်းႁႂ်ႈၼၢင်းယိင်းသေၵေႃႉၵေႃႉ တုမ်ႉတိူဝ်ႉသရေႇၼႃႈတႃၸိုင် မီးတၢင်းၽိတ်း ၼႆယူႇ။

ၵမ်ႈၼမ် ပိူင်းၼႄ ၾၢႆႇၵူၼ်းၸၢႆး ၽိတ်းၼိူဝ် ၼၢင်းယိင်းၵမ်ႈပႃႈၼမ် ။ ပေႃးဢဝ် ပၵ်းပိူင်လၢႆၸိုင်ႈမိူင်း မိူင်းၸိူဝ်းမီးပၵ်းပိူင်ႁူမ်ႇငမ်းဝႃႈဝႆႉတႄႉ တႃႇႁူမ်ႇငမ်းလႆႈတင်းယိင်းၸၢႆး ၊ ပႃးၸဵမ် LGBTQ + လဵၵ်ႉယႂ်ႇၼုမ်ႇထဝ်ႈ ၼၼ်ႉ ၶိုၼ်းမူၼ်ႉမႄးမႄႇၶႂၢၵ်ႈ ၸိူဝ်းၼႆႉပႃး။

ပေႃးတူၵ်ႇထိုင် ၶေႃႈဢၼ်ဝႃႈ ပေႉၵိၼ်လူလၢႆၵၼ်မႃးၼႆႉ ၵမ်ႈၼမ် တေႁၼ်ဝႃႈ ပဵၼ်လွင်ႈပေႃႉထုပ်ႉ မိပ်ႇငႅၼ်း လိူတ်ႈတူၵ်း ယၢင်ဢွၵ်ႇ ၸိူင်ႉၼႆၵူၺ်း ။
ၵၢပ်ႈယၢမ်းလဵဝ် လွင်ႈပေႉၵိၼ်လူလၢႆဢၼ်ဝႃႈၼႆ ဢမ်ႇၵွမ်ႉပိူင်ပဵၼ်ၾၢႆႇၼွၵ်ႈၵူၺ်း ၵဵဝ်ႇၵပ်းလွင်ႈတုမ်ႉတိူဝ်ႉပၢႆးၸႂ် ၊ တုမ်ႉတိူဝ်ႉသရေႇၼႃႈတႃ ၸိူဝ်းၼႆႉၵေႃႈ ၼပ်ႉပဵၼ်တၢင်းၽိတ်းလႆႈ ။

ၵူၼ်းၼႂ်းမိူင်းတႆးႁိုဝ် မိူင်းႁူမ်ႈတုမ်မၢၼ်ႈပတ်းပိုၼ်ႉတႄႉ ပေႃးၵဵဝ်ႇ လၢႆးလၢတ်ႈၸႃ ၊ လၢႆးတူင်ႉတိၼ်တူင်ႉမိုဝ်း လၢႆးဝႆႉဝၢင်းၼႃႈတႃႁၢင်ႈၾၢင်ၸိူဝ်း ၵမ်ႈၼမ် တေဢမ်ႇဝႆႉၼၵ်း။
မၢင်ပွၵ်ႈ ယွၼ်ႉသူပ်းယွၼ်ႉၵႂၢမ်းလႄႈသင် ၊ ယွၼ်ႉ ပိူင်ၾၢင်ၸဝ်ႈၵဝ်ႇလႄႈသင်သေ ထိုင်တီႈ ပေႃးလႆႈ လႆႈၽိတ်းၽႅၵ်ႇၵၼ် ။ ၵမ်ႈၼမ် တေၽိတ်းၵၼ်ယွၼ်ႉ ၵႂၢမ်းတႂ်ႈသိၼ်ႈတႂ်ႈသိူဝ်ႈ ။

ဢိင်ၼိူဝ်လွင်ႈၼႆႉ ၼင်ႇႁိုဝ် ပေႃးတေႁႄႉၵင်ႈလႆႈ လွင်ႈလူလၢႆပၢႆးတူဝ်ပၢႆးၸႂ်ၵၼ်ၼၼ်ႉ မိူင်းထႆးတႄႉ ၶိုၼ်းမႄးမႄႇၶႂၢၵ်ႈ ပၵ်းပိူင် ဢၼ်ပူၼ်ႉပႅၼ်တၢင်းၵႃႇမၸိူဝ်းၼႆႉ ထႅင်ႈယူႇ။
1) Verbal harassment ဢဝ်သူပ်းဢဝ်ၵႂၢမ်းသေ လၢတ်ႈၶိတ်ႈလၢတ်ႈပၢႆႇ ၊ လၢတ်ႈ ယွၵ်ႇ ၵိူဝ်ႉ ၶူဝ် လဵၼ်ႈ ၊ သူၼ်းဢီး ႁႂ်ႈၵူၼ်းသေၵေႃႉၵေႃႉ လႆႈတၢင်းၵူဝ်တၢင်းဢၢႆ လၢတ်ႈႁႂ်ႈၸူၵ်ႉၸႂ် လၢတ်ႈႁႂ်ႈသေၵေႃႉၵေႃႉ ဢမ်ႇမီးလွင်ႈႁူမ်ႇလူမ်ႈ ။ တင်ႈၶေႃႈထၢမ် ဢၼ်ႁဵတ်းႁႂ်ႈသေၵေႃႉၵေႃႉယူႇယၢပ်ႇၸိူဝ်းၼႆႉ။

2) Gesture-based harassment ဢၼ်ဢဝ် ပိူင်ၾၢင်တူင်ႉၼိုင်တူဝ်ၶိင်းသေ လူလၢႆ ၊ (ၼႄတိၼ်ၼႄမိုဝ်းလူၺ်ႈမီးၸႂ်ၶႂ်ႈလူလၢႆ ၊ ဝႆႉၼႃႈတႃဢၼ်ၶႂ်ႈၼႄလွင်ႈလူလၢႆ ၸိူဝ်းၼႆႉ) ။
တင်ႈၸႂ် ၶႂ်ႈၼႄလွင်ႈပႅင်းၸင်း ၊ လွင်ႈဢမ်ႇႁၢၼ်ႉၸႂ် မိူၼ်ၼင်ႇ ပၵ်းတႃသႂ်ႇ လိူၵ်ႇတႃသႂ်ႇ ၊ ၽိဝ်လူမ်း ဢဝ်သူပ်းဢဝ်ပၢၵ်ႇ တိုင်ႈဢွၵ်ႇသဵင်ၵိူဝ်ႉလဵၼ်ႈ ၼႄပိူင်ၾၢင် ဢမ်ႇၼပ်ႉယမ် ၊ မိတ်းသူပ်းမိတ်းပၢၵ်ႇ ၊ ႁူႇၼႃႈႁူႇတႃ ၊ လပ်းတႃၸင်းသႂ်ႇၸိူဝ်းၼႆႉ ။ သင်ဝႃႈ သေၵေႃႉၵေႃႉ ဢမ်ႇႁၢၼ်ႉၸႂ် တၢင်ႇယိုၼ်ႈဢဝ်တၢင်းၽိတ်းလႆႈ။

3) Online harassment လူလၢႆၼိူဝ်ဢွၼ်ႊလၢႆႊ( ၼႂ်းၼႅင်ႈသိုဝ်ႇ Platform လၢႆသႅၼ်း ) – ၸဵမ်ဢဝ် သူင်ႇသဵင် ၊ သူင်ႇၶေႃႈၵႂၢမ်း ႁိုဝ် တႅမ်ႈလိၵ်ႈ သူင်ႇ ၽူတ်ႉတၢင်ႇ ဢၼ်ၵဵဝ်ႇတႂ်ႈသိၼ်ႈတႂ်ႈသိူဝ်ႈပၼ်တၢင်ႇၵေႃႉ ၊ တႅမ်ႈတၢင်ႇ ၊ တႅမ်ႈသူင်ႇဢၼ်တုမ်ႉတိူဝ်ႉၵူၼ်းတင်းၼမ် ၸိူဝ်းၼႆႉ ။

4) Physical harassment ပူၼ်ႉတိၼ်ပူၼ်ႉမိုဝ်း – ဢမ်ႇလႆႈၶေႃႈတူၵ်းလူင်းလႆႈၸႂ်ၵၼ်သေ ၵွတ်ႇ ၊ တိူဝ်ႉ ၊ ယိပ်း ၸိူဝ်းၼႆႉ ။
5) Harassment involving abuse of power ၸႂ်ႉဢၢမ်းၼၢတ်ႈသေ ပူၼ်ႉပႅၼ် လူလၢႆ ။ တူဝ်ယၢင်ႇမၼ်း မိူၼ်ၼင်ႇ ၽူႈမီးၸၼ်ႉ သုၵ်ႉၵဝ်း ၵူၼ်းဢၼ်တႅမ်ႇလိူဝ်သေ ၸဝ်ႈၵဝ်ႇ ၊ ဢဝ်ၶေႃႈဢၢင်ႈ တၢင်ႇၸိူဝ်ႉတၢင်ႇပိူင်သေ လူလၢႆတၢင်း ၵႃႇမ ။

ဢၼ်လၢတ်ႈမႃးၸိူဝ်းၼႆႉ ပဵၼ်ပိူင် မိူင်းထႆး မႄးမႄႇၶႂၢၵ်ႈ ႁႂ်ႈႁူမ်ႇငမ်းလႆႈ ၵၢၼ်လူလၢႆၵူႈၶၵ်ႉတွၼ်ႈ ။ ဢမ်ႇလူဝ်ႇဝႃႈ ႁႂ်ႈမီးပိူင်ၵူၺ်း လွင်ႈႁဵတ်းသၢင်ႈၸိူဝ်းၼႆႉ မၼ်းဢမ်ႇမီးၽွၼ်းလီသင်လႄႈ ၵိုင်ႇလီ ငိူင်ႉဝႄႈ ယူႇ ၼႆ ၵူၼ်းႁဵတ်းၵၢၼ်တူင်ႇၵူၼ်းၵေႃႉၼိုင်ႈလၢတ်ႈ။
ပိူင်ဢၼ် မႄႇၶႂၢၵ်ႈမႂ်ႇ ၼႆႉ မိူင်းထႆး ပိုၼ်ႇၽၢဝ်ႇ မၵ်းမၼ်ႈၸႂ်ႉပိူင်မၼ်း မိူဝ်ႈဝၼ်းတီႈ 30/12/2025 ၼႆႉ။

သင်ဝႃႈ ႁဵတ်းသေၵေႃႉၵေႃႉ သုၵ်ႉႁူသုၵ်ႉၸႂ် ၸိုင် ပႆႇၼပ်ႉပႃးတၢင်းၽိတ်းဢၼ်လူလၢႆတၢင်းၵႃႇမ တေႃႉတႄႉ ႁဵတ်းႁႂ်ႈသေၵေႃႉၵေႃႉ ယူႇယၢပ်ႇ မွၵ်ႈၼၼ်ႉၵူၺ်းၵေႃႈ မီးတူတ်ႈတၢမ်ႇၶွၵ်ႈ 1 ပီ (ႁိုဝ်) ငိုၼ်းထႆး 20000 (2 မိုၼ်ႇ)ဝၢတ်ႇ (ႁိုဝ်) တင်းသွင်ပိူင် သင်မီးၵူၼ်းယိုၼ်ႈတၢင်ႇဢမူႉၶၻီး ။

သင်ဝႃႈ ပဵၼ်ၵူၼ်းဢၼ် ဢမ်ႇတူၺ်း ၵႃႇလတေႇသသေ ၸွမ်းသုၵ်ႉယုင်ႈဢူၼ်ၵဝ်းၵူၼ်းသေၵေႃႉၵေႃႉယူႇတႃႇသေႇ ၊ သင်ဝႃႈ ၵႂႃႇတူင်ႉၼိုင် ၵႂႃႇလၢတ်ႈႁႂ်ႈသေၵေႃႉၵေႃႉ ယူႇယၢပ်ႇၼႂ်းၵူႈဝၼ်းဝၼ်းၸိုင် မီးတူတ်ႈတၢမ်ႇၶွၵ်ႈ 2 ပီ (ႁိုဝ်) 40000 (4မိုၼ်ႇ) ဝၢတ်ႇ (ႁိုဝ်) ၺႃးတူတ်ႈတၢမ်ႇ တင်းသွင်ပိူင် ။

သင်ႁဵတ်းႁႂ်ႈ ၵူၼ်းသေၵေႃႉၵေႃႉ လႆႈတၢင်းဢၢႆ ၼႂ်းၾၢႆႇၼႃႈၵူၼ်းၼမ် ဢမ်ႇဝႃႈ တၢင်းၼွၵ်ႈလႄႈၼႂ်းဢွၼ်ႊလၢႆႊ ( ပႃးၸဵမ် ဢၼ်ၸႂ်ႉလွၵ်းလၢႆးၾၢႆႇၶွမ်ႊၽိဝ်ႊတိူဝ်ႊသေ ႁဵတ်းၵူႈလွင်ႈလွင်ႈ) ။ တူဝ်ယၢင်ႇမၼ်း ဢဝ်ႁၢင်ႈဢဝ်သဵင်သေၵေႃႉၵေႃႉ မႃးၸတ်းမႃးၶိုင်သေ ႁဵတ်းႁႂ်ႈလႆႈတၢင်းဢၢႆ။ ဢၼ်ၼႆႉ တၵ်းၺႃး တၢမ်ႇၶွၵ်ႈ 3 ပီ (ႁိုဝ်) တၢမ်ႇငိုၼ်း 60000 (6မိုၼ်ႇ)ဝၢတ်ႇ (ႁိုဝ်) တူတ်ႈတၢမ်ႇ တင်းသွင်ပိူင် ။

သင်ဝႃႈ ၵူၼ်းဢဵၼ်ႁႅင်းယႂ်ႇ ပေႉၵိၼ်ၵူၼ်းဢူၼ်ႈဢွၼ်ႇလိူဝ် ႁိုဝ် ၵူၼ်းဢၼ်ၸၼ်ႉထၢၼ်တႅမ်ႇလိူဝ် – တူဝ်ယၢင်ႇမၼ်း ပေႃႈလဵင်ႉ ပေႉၵိၼ်လူလၢႆ တိူဝ်ႉၼိူဝ်ႉတိူဝ်ႉၼင် လုၵ်ႈလဵင်ႉ ၊ ၶူးသွၼ်မေႃသွၼ် ပေႉၵိၼ်လူလၢႆ ပူၼ်ႉပႅၼ် တၢင်းၵႃႇမ လုၵ်ႈႁဵၼ်း ၸိူဝ်းၼႆႉတႄႇၵႂႃႇ ။ တၢမ်ႇၶွၵ်ႈ 3 ပီ ႁိုဝ် ငိုၼ်းထႆး 60000 (6 မိုၼ်ႇ) ႁိုဝ် တင်းသွင်ပိူင်။
ၽႂ်သေဢမ်ႇဝႃႈ သင်ပူၼ်ႉပႅၼ်မႅၼ်ႈလုၵ်ႈဢွၼ်ႇ ဢႃယု 15 ပီလူင်းတႂ်ႈ ႁႂ်ႈလႆႈတၢင်းၵူဝ်တၢင်းဢၢႆၸိုင် တၵ်းၺႃး တၢမ်ႇၶွၵ်ႈ 5 ပီ ႁိုဝ် ငိုၼ်းထႆး 100000 (1 သႅၼ်)ဝၢတ်ႇ ႁိုဝ် တင်းသွင်ပိူင်။ၼႆႉပဵၼ်တၢမ်ႇဢၼ်သုင်သုတ်း ၼႆ လူင်ပွင်ၸိုင်ႈထႆး ပိုၼ်ၽၢဝ်ႇဝႆႉၼင်ႇၼႆ။

သင်ဝႃႈ တူဝ်ၵဝ်ႇ ၺႃးပူၼ်ႉပႅၼ်လူလၢႆ ၸိုင် တႃႇဢဝ်တၢင်းၽိတ်းၽူႈပူၼ်ႉပႅၼ်လႆႈၼၼ်ႉ ဢမ်ႇဝႃႈ ယူႇၼႂ်းမိူင်းႁိုဝ် ၼွၵ်ႈမိူင်း ၸဝ်ႈၵဝ်ႇ လူဝ်ႇလႆႈႁဵတ်းၸွမ်းၼင်ႇ ပႃႈတႂ်ႈၼႆႉ – ၵၢၼ်ႁၢင်ႈႁႅၼ်းၼႆႉ လမ်ႇလွင်ႈသုတ်း။

ပိူင်ပဵၼ်ၵၢၼ်လူလၢႆၼင်ႇပႃႈၼိူဝ်ၼၼ်ႉ သင်လႆႈထူပ်းလႆႈၺႃး တႃႇဢဝ်တၢင်းၽိတ်းၽူႈပူၼ်ႉပႅၼ်လႆႈၼၼ်ႉ ႁႂ်ႈယိုၼ်ယၼ်ဝႃႈ ၸဝ်ႈၵဝ်ႇဢမ်ႇႁၼ်လီ ဢမ်ႇၽွမ်ႉၸွမ်းၼႆ ၵမ်းလဵဝ် ။ ႁႂ်ႈၵဵပ်းသိမ်းငဝ်ႈႁၢၵ်ႈလၵ်းထၢၼ်မၼ်းဝႆႉ ၊ သင်ဝႃႈ လႆႈလၢတ်ႈတေႃႇၵၼ်ၼႂ်းလၢႆႊ ၼႆၵေႃႈ ႁႂ်ႈထၢႆႇၼႃႈၾူၼ်းဝႆႉ ၊ သင်ဝႃႈ ပဵၼ်သဵင်ၵေႃႈ ႁႂ်ႈၵဵပ်း ႁႂ်ႈတီႉသဵင်ၽူႈပူၼ်ႉပႅၼ်ဝႆႉ ၊ ပႃးၸဵမ် သဵင်လႄႈ ငဝ်းတူင်ႉ ႁႂ်ႈၵဵပ်းဝႆႉလီလီ ။

သင်ဝႃႈ လႆႈလၵ်းထၢၼ်သင်ဝႆႉၵေႃႈ ႁႂ်ႈၼႅတ်ႈၵႂႃႇတၢင်ႇလၢတ်ႈၸုမ်းဢၼ်တေလႆႈၸႂ်ယႂ်ႇလႆႈ ။ ၼႂ်းမိူင်းႁူမ်ႈတုမ်မၢၼ်ႈ ၼႂ်းမိူင်းတႆးၸိူဝ်းၼႆႉ ႁူမ်ႈဝႃႈ ပႆႇပဵၼ်မိူင်းဢၼ် ပၵ်းပိူင်ႁူမ်ႇငမ်းလႆႈၵေႃႈ ၸုမ်းတူင်ႇၵူၼ်း ဢၼ်ႁဵတ်းတႃႇၵူၼ်မိူင်းတႄႉတႄႉ ယင်းမီးယူႇလႄႈ ႁႂ်ႈမေႃဢဝ် တီႈၵပ်းသိုပ်ႇ မၢႆၾူၼ်း ၊ ဢီႊမေလ်ႊ ၸိူဝ်းၼႆႉ ဝႆႉႁႂ်ႈတဵမ်ထူၼ်ႈ ။ တႃႇလႆႈလွင်ႈၸွႆႈထႅမ် ၽွင်းထူပ်းၽေး မႃး ။

တႄႇၼႆႉ ၵႂႃႇ ႁႂ်ႈမေႃငိူင်ႉဝႄႈ လၢႆးလၢတ်ႈၸႃ ၊ လၢႆးတူင်ႉၼိုင်ႁဵတ်းသၢင်ႈ ဢၼ်တေၸၢင်ႈပူၼ်ႉပႅၼ် ၼိူဝ်သေၵေႃႉၵေႃႉ ၼၼ်ႉသေၵမ်း ။