သိုၵ်းမၢၼ်ႈ  ၼမ်းၸတ်းပၢင်လိူၵ်ႈတင်ႈႁွပ်ႈသွင် ၼႂ်းဝၼ်းတီႈ 11/01/2026 ၼႆႉ ၵူၼ်းမိူင်းသူၼ်ၸႂ် ဢမ်ႇထုၵ်ႇၸႂ်သေတႃႉ ၵွပ်ႈပိူဝ်ႈမီးလွင်ႈသုၵ်ႉၸႂ်ယွၼ်ႉမၼ်းလႄႈ ၶႂ်ႈႁႂ်ႈၸဵဝ်းယဝ်ႉတူဝ်ႈ  ၸဵဝ်းတူဝ်ႈၼႃႇယဝ်ႉဝႃႈၼႆ ။

ဢၼ်တေလိူၵ်ႈတင်ႈၵမ်းသွင်ၼႆႉ မိူင်းတႆးပွတ်းၸၢၼ်းပႃး 9 ဝဵင်း ၊ ပွတ်းဢွၵ်ႇ 6 ဝဵင်းလႄႈ ပွတ်းႁွင်ႇ 2 ဝဵင်း ။ ၸဵမ်မိူဝ်ႈ လိူၵ်ႈတင်ႈႁွပ်ႈၼိုင်ႈၼၼ်ႉၵေႃႈ ဢမ်ႇႁၼ်ၽွၼ်းပၢင်ႈဢၼ်ၵူၼ်းမိူင်းတေလႆႈၸႂ်ယႂ်ႇ ။ ပႃႇတီႇဢၼ်သိုၵ်းမၢၼ်ႈယူႇလင်ၵမ်ႉယၼ်ပၼ်ၵူၺ်း ဢၼ်ဢွင်ႇပေႉဝႆႉ ။

ၸင်ႇၼၼ်လႄႈ ႁွပ်ႈသွင်ၼႆႉၵေႃႈ ၵူၼ်းမိူင်းဢမ်ႇမီးတၢင်းလိူၵ်ႈ ၵႃႈလႆႈႁဵတ်းၸွမ်း။ ၼမ်ႉတွၼ်းမီး ဢမ်ႇမီးတႄႉ ဝႆႉၵမ်းၼိုင်ႈ တႃႇယူႇလွတ်ႈၵႂႃႇလႆႈၼႂ်းၵႄႈငဝ်းလၢႆးဝၢၼ်ႈမိူင်းဢမ်ႇသုၵ်းဢမ်ႇလိပ်းၼႆႉ လမ်ႇလွင်ႈ ၼႆ ၵူၼ်းမိူင်းပွတ်းၸၢၼ်းၵေႃႉၼိုင်ႈလၢတ်ႈ။

မိူၼ်ၼင်ႇ ပွတ်းတၢင်းၸႄႈဝဵင်းမွၵ်ႇမႆႇၼႆႉ ၽွင်းသိုၵ်းမၢၼ်ႈၶိၼ်ၸတ်းပၢင်လိူၵ်ႈတင်ႈယူႇၼႆႉ ၾၢႆႇဢိူင်ႇၵိူၼ်ႇတူလူင်ၼၼ်ႉ  သိုၵ်းမၢၼ်ႈ လႄႈ PNLO  ယိုဝ်းၵၼ်  ဢမ်ႇထၢတ်ႇ ။

ၾၢႆႇသိုၵ်းမၢၼ်ႈၵေႃႈ ထႅမ်ႁႅင်းသိုၵ်း ဢဝ်လွင်ႈႁူမ်ႇလူမ်ႈတီႈဝဵင်းမွၵ်ႇမႆႇဝႆႉတင်းၼမ် ၼႆ ၵူၼ်းမွၵ်ႇမႆႇ ၵေႃႉၼိုင်ႈလၢတ်ႈၼင်ႇၼႆ –

 “ ပၢင်တိုၵ်းပွတ်းတၢင်း ၵိူၼ်ႇတူလူင်ၵေႃႈ ပဵၼ်ႁႅင်းလႄႈ ၶဝ်ၵူဝ်မၼ်းလၢမ်းမႃးၽႅဝ်ၸွမ်းဝဵင်း ၸင်ႇၼၼ်လႄႈ ၶဝ်ထႅမ်ႁႅင်းသိုၵ်းၶဝ်မႃးဝႆႉ ။ တေပဵၼ် ပလိၵ်ႈၶဝ် ပျီႇတူႉၸိတ်ႉၶဝ်ၸိူဝ်းၼႆႉ။ပျီႇတူႉၸိတ်ႉ တေပႃး PNO လႄႈ ပျီႇတူႉၸိတ်ႉဝၢၼ်ႈႁၢတ်ႇ ” – ဝႃႈၼႆ။

ယွၼ်ႉပဵၼ်ပၢင်တိုၵ်းၼႆႉသေ ဢိူင်ႇဢၼ်မီးၼႂ်းမွၵ်ႇမႆႇ 8 ဢိူင်ႇၼႆႉ တေၸတ်းလႆႈပၢင်လိူၵ်ႈတင်ႈ 7 ဢိူင်ႇၵူၺ်း ။ ႁူင်းတွတ်ႈၶႅပ်းၵၢင်ၸႂ် ႁၢင်ႈႁႅၼ်းဝႆႉ 33 တီႈ ၵူၼ်းတွတ်ႈမၼ်း လၢမ်းၶၢတ်ႈဝႆႉ မီး 29000 ပၢႆ ၼႆ ၵူၼ်းပိုၼ်ႉတီႈလၢတ်ႈ။

ဢၼ်ၶဝ်ႈၶႄႉၶႅင်ႇၵၢၼ်လိူၵ်ႈတင်ႈၼႂ်းမွၵ်ႇမႆႇၼႆႉ မီး 3 ပႃႇတီႇ ပဵၼ် ပႃႇတီႇသိူဝ်ၽိူၵ်ႇ ၊ ပႃႇတီႇသၢင်ႈသီႈ လႄႈ ပႃႇတီႇပဢူဝ်း PNO ။ ပႃႇတီႇသိူဝ်ၽိူၵ်ႇၼၼ်ႉ ၵမ်ႈၼမ်ႁၼ်ဝႃႈ ပဵၼ်ပႃႇတီႇဢၼ်ၵဵဝ်ႇၶွင်ႈၸၢဝ်းတႆးဝႃႈၼႆသေတႃႉ ၼေႃႇတႅၼ်းၽွင်း ဢၼ်ၶဝ်ႈလိူၵ်ႈတင်ႈသမ်ႉ ဢမ်ႇၸႂ်ႈၵူၼ်းပိုၼ်ႉတီႈလႄႈ ၵူၼ်းမိူင်းဢမ်ႇႁတ်းယုမ်ႇယမ်ပၼ်ႁႅင်း ဝႃႈၼႆ။

ၵူၼ်းမွၵ်ႇမႆႇၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ တႃႇဝႃႈ တွတ်ႈပၼ်သိူဝ်ၽိူၵ်ႇၼႆၵေႃႈ ၼေႃႇတႅၼ်းမၼ်းသမ်ႉ ဢမ်ႇၸႂ်ႈၵူၼ်းမိူင်းႁဝ်း ။ ပဵၼ်ၵူၼ်းတၢင်ႇတီႈႁေ ၶဝ်ႈမႃးလိူၵ်ႈတင်ႈၵူၺ်း။ လုၵ်ႉတႃႈၵုင်ႈၸိူဝ်းပုၼ်ႉမႃးၼႆဢေႃႈ” –  ဝႃႈၼႆ။

ပၢင်လိူၵ်ႈတင်ႈ ဢၼ်သိုၵ်းမၢၼ်ႈၼမ်းၸတ်းၼႆႉ ၸဵမ်မိူဝ်ႈပႆႇတႄႇၵေႃႈ ၵူၼ်းမိူင်းသမ်ႉပေႃး ယုင်ႈယၢင်ႈၸွမ်း ။ ၽိူဝ်ႇဝႃႈ တႄႇယဝ်ႉၼႆၵေႃႈ သမ်ႉယိင်ႈၶႅၼ်းႁဵတ်းႁႂ်ႈၵူၼ်းမိူင်းဢမ်ႇမီးၸႂ်ယုမ်ႇယမ်ၼပ်ႉထိုဝ်။

ပေႃးတူၺ်းပွတ်းတၢင်းမိူင်းပၼ်ႇၵေႃႈ ၼင်ႇၼၼ် လၢတ်ႈဝႃႈ တွတ်ႈလႆႈလူင်ႈၼႃႈယူႇၼႆသေ သမ်ႉဢမ်ႇႁဵတ်းႁႂ်ႈမၼ်းလူင်ႉလႅင်းၼိူဝ်ၵူၼ်းမိူင်း ။ ၵူၼ်းမိူင်းမၢင်ၸိူဝ်းၶႂ်ႈတွတ်ႈယူႇၵေႃႈ ၶႅပ်းတႃႇတွတ်ႈမၼ်းသမ်ႉ ဢမ်ႇၵုမ်ႇထူၼ်ႈလႄႈ ဢမ်ႇပၼ်တွတ်ႈ ဝႃႈၼႆ။

ၵူၼ်းမိူင်းပၼ်ႇၵေႃႉၼိုင်ႈလၢတ်ႈၼႄဝႃႈ- “ၶႅပ်းၵၢင်ၸႂ် တႃႇတွတ်ႈလူင်ႈၼႃႈ တီႈမိူင်းပၼ်ႇၼႆႉ  ၵူၼ်းၶႂ်ႈတွတ်ႈသမ်ႉမီးၼမ်ယူႇ ဝႂ်မၼ်းသမ်ႉဢမ်ႇၸေးၵေႃႉမၼ်း။ၵူၼ်းထဝ်ႈမၢင်ၸိူဝ်းၵေႃႈဝႃႈ ပေႃးဢမ်ႇလႆႈတွတ်ႈလူင်ႈၼႃႈၵေႃႈ တေဢမ်ႇၵႂႃႇတွတ်ႈယဝ်ႉဝၼ်းလိူၵ်ႈတင်ႈၼၼ်ႉ။ ယွၼ်ႉဝႃႈ တေၶဝ်ႈထႅဝ်သေၸုၵ်းႁိုင်ၵေႃႈ ပၢႆးယူႇလီဢမ်ႇၶႅမ်ႉ ” – ဝႃႈၼႆ။

ၸဵမ်မိူဝ်ႈပႃႇတီႇၶဝ် လူင်းမႃးသူၼ်းတုမ်ၵေႃႈ ၵူၼ်းမိူင်းတႄႉ  သူၼ်ၸႂ်လွင်ႈၶူဝ်းတွၼ်ႈၶဝ်ၵူၺ်း ။ ၵမ်ႈၽွင်ႈဝႃႈ ၶႂ်ႈလႆႈၶူဝ်းတွၼ်ႈ ဢၼ်ပႃႇတီႇၶဝ်မႃးပၼ်လႄႈ ၵႂႃႇၶဝ်ႈႁူမ်ႈပၢင်သူၼ်းတုမ်ၶဝ်ၵူၺ်း ။ ပေႃးတွတ်ႈတႄႉၵေႃႈ တေတွတ်ႈပၼ်ပႃႇတီႇတႆးၶိုၼ်းယူႇၼႆ – ၵူၼ်းမိူင်းပၼ်ႇသိုပ်ႇလၢတ်ႈ ။

ဝဵင်းၵၢတ်ႇလေႃႉ ၸိုင်ႈတႆးပွတ်းၸၢၼ်းၼၼ်ႉၵေႃႈ ၵူၼ်းမိူင်းဝူၼ်ႉၵႂင်ၸွမ်းပၢင်လိူၵ်ႈတင်ႈ ။ မႆႈၸႂ်ပႃးဝႃႈ သင် ပႃႇတီႇပဢူဝ်း PNO ဢွင်ႇပေႉ ၵူဝ်ၶဝ်လူင်းၵဵပ်းၶွၼ်ႇလိူဝ်ႁႅင်း ၊ ၵူဝ်ၶဝ်ထၢင်ႇႁၢင်ႈၵဵပ်းငိုၼ်းၵဵပ်းၵူၼ်း – ၵူၼ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈၼင်ႇၼႆ။

ပွတ်းတၢင်းဝၢၼ်ႈငႂ်ႈ(ယႂႃႇငၢၼ်ႇ) ၸိုင်ႈတႆးပွတ်းၸၢၼ်းၵေႃႈ သိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း ထႅမ်ႁႅင်းသိုၵ်း မႃးတၢင်းဝၢၼ်ႈၼပၢၼ်းၵျီး ၼႄၶေႃႈဢၢင်ႈဝႃႈ ဢဝ်ႁူမ်ႇလူမ်ႈ။

ၼၢင်းယိင်းၼႂ်းပိုၼ်ႉတီႉလၢတ်ႈၽူႈတွႆႇႁွၵ်ႈဝႃႈ – “ ၶဝ်(သိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း) ထႅမ်ႁႅင်းသိုၵ်းယူႇသေႇသေႇ။  မိူဝ်ႈၽုၵ်ႈတေပဵၼ်ပၢင်လိူၵ်ႈတင်ႈလႄႈ ၶဝ်ၵေႃႈၶႅၼ်း ထႅမ်ႁႅင်း ၶဝ်ႈမႃး ဝႃႈတႃႇဢဝ်ႁူမ်ႇလူမ်ႈၼႆ ၊ ပေႃးထႅမ်ႁႅင်းသိုၵ်းမႃးၼိုင်ႈပွၵ်ႈၼႆႉ ၵႆႉမႃးယူႇတီႈၵျွင်း မုၼ်ႇၸဝ်ႈ ၸိူဝ်းၼႆႉ”- ဝႃႈၼႆ ။

ယၢမ်းလဵဝ်ၵေႃႈသိုၵ်းမၢၼ်ႈလႄႈ ပျီႇတူႉၸိတ်ႉထႅမ်ႁႅင်းသိုၵ်းၶဝ်ႈမႃး ပႂ်ႉဝႆႉၸွမ်းႁူင်းတွတ်ႈၶႅပ်း ၵၢင်ၸႂ် ၼႂ်းဝၢၼ်ႈၼႂ်းဢိူင်ႇ-ၼိုင်ႈတီႈႁႅင်းသိုၵ်းဢမ်ႇယွမ်း 20 ၵေႃႉ – ၵူၼ်းပိုၼ်ႉတီႈလၢတ်ႈၼင်ႇၼႆ။

ပေႃးသိုၵ်းမၢၼ်ႈၶဝ်ႈမႃးၼိုင်ႈၵမ်းၼႆ ၶၢၼ်းႁႂ်ႈၵူၼ်းမိူင်း ၵူၼ်းပိုၼ်ႉတီႈ ႁုင်ၶဝ်ႈၽၵ်းသူင်ႇပၼ်၊ ၶၢၼ်းၵူၼ်းဝၢၼ်ႈမႃးလုမ်းလႃးပၼ်လွင်ႈယူႇလွင်ႈၵိၼ်ၶဝ် ႁဵတ်းႁႂ်ႈ ၵူၼ်းပိုၼ်ႉတီႈယူႇယၢပ်ႇ ၵိၼ်းၸႂ် ဝႆႉဝႃႈၼႆ ။  

ပွတ်းတၢင်းသီႇပေႃႉ ၸိုင်ႈတႆးပွတ်းႁွင်ႇၵေႃႈ တေပႃးလိူၵ်ႈတင်ႈ ၼႂ်းႁွပ်ႈသၢမ်မႃးလႄႈ ပႃႇတီႇသၢင်ႇသီႈၶဝ် ဢွၼ်ၵၼ်လူင်းသူၼ်းႁူၺ်းၵူၼ်းမိူင်းလူၺ်ႈဢဝ်တၢင်းၵိၼ်တၢင်းယမ်ႉမႃးယွၵ်ႇဢဝ်ၸႂ်ၵူၼ်းမိူင်းၼႆယူႇ။

ၵူၼ်းပိုၼ်ႉတီႈလၢတ်ႈဝႃႈ – “ ၶဝ်ဢဝ် ၶဝ်ႈသၢၼ် ၊ ၼမ်ႉမၼ်း ၊ ၵမ်ႇပီႉ ၊ ပႃႁႅင်ႈ ၸိူဝ်းၼႆႉ မႃးယွၵ်ႇဢဝ်ၵူၼ်းမိူင်း ။ ၶဝ်မႃးႁူၺ်းသူၼ်းမိူဝ်ႈဝၼ်းတီႈ 7/01/2026 တီႈႁူင်းႁဵၼ်းၵုၼ်ၸၢၵ်ႈလဵၵ်းၼၼ်ႉ ။ ၵူၼ်းမိူင်းၶဝ်ႈႁူမ်ႈ 250 ၵေႃႉ ” – ဝႃႈၼႆ ။

မိူၼ်ၼင်ႇမိူင်းတႆးပွတ်းဢွၵ်ႇၼႆႉၵေႃႈ တေႃႈၼၼ် ပႆႇလိူၵ်ႈတင်ႈယဝ်ႉတူဝ်ႈသေတႃႉ ၵူၼ်းမိူင်းပေႃးလၢမ်းၶၢတ်ႈႁၼ်ဝႃႈ ပႃႇတီႇသၢင်ႇသီႈၵူၺ်း ဢၼ်တေဢဝ်တီႈယူႇဝႆႉတင်းပိုၵ်း။ ၵူၼ်းမိူင်းၵေႃႈ ဢမ်သူၼ်ၸႂ်လႄႈ သိုၵ်းမၢၼ်ႈၶႂ်ႈၸတ်းၸိူင်ႉႁိုဝ်ၵေႃႈ ၸတ်းဝႃႈၼႆ။

မိူၼ်ၼင်ႇ တီႈမိူင်းပဵင်းၼၼ်ႉ လၢတ်ႈဝႃႈ တွတ်ႈလႆႈၶႅပ်းၵၢင်ၸႂ်လူင်ႈၼႃႈၼႆသေ ပႃႇတီႇသၢင်ႇသီႈဢၼ်ယူႇတႂ်ႈသိုၵ်းမၢၼ်ႈၵူၺ်းမီးသုၼ်ႇပၼ်ၵူၼ်းမိူင်းတွတ်ႈလူင်ႈၼႃႈ ။ ပႃႇတီႇတၢင်ႇဢၼ် ဢမ်ႇႁူႉဢမ်ႇႁၼ်သင်ၸွမ်း ၼႆ ၵူၼ်းပိုၼ်ႉတီႈလၢတ်ႈၼင်ႇၼႆ။

ပၢင်လိူၵ်ႈတင်ႈ ၵမ်းထီႉသွင်ၼႆႉ ၸႄႈဝဵင်းၸိူဝ်းတေလႆႈၸတ်းႁဵတ်းပၢင်လိူၵ်ႈတင်ႈ ၼႂ်းမိူင်းတႆး ပဵၼ် 17 ၸႄႈဝဵင်း။ မိူင်းတႆးပွတ်းၸၢၼ်း ပဵၼ်ၸႄႈဝဵင်းယႂႃႇငၢၼ်ႇ၊ ၸႄႈဝဵင်းသီႇသႅင်ႇ၊ ၸႄႈဝဵင်း ၵၢတ်ႇလေႃႉ၊ ၸႄႈဝဵင်းလွၵ်ႉၸွၵ်ႇ၊ ၸႄႈဝဵင်းၵုၼ်ႁဵင်၊ ၸႄႈဝဵင်းမိူင်းပၼ်ႇ၊ ၸႄႈဝဵင်းမွၵ်ႇမႂ်ႇ၊ ၸႄႈဝဵင်းမိူင်းၵိုင် ၊ ၸႄႈဝဵင်းလၢႆးၶႃႈ ပဵၼ် 9 ၸႄႈဝဵင်း ။

ၼႂ်းမိူင်းတႆးပွတ်းဢွၵ်ႇသမ်ႉပဵၼ် ၸႄႈဝဵင်းမိူင်းၶၢၵ်ႇ၊ ၸႄႈဝဵင်းမိူင်းတူၼ်၊ ၸႄႈဝဵင်းမိူင်းယွင်း၊ ၸႄႈဝဵင်းမိူင်းယၢင်း၊ ၸႄႈဝဵင်းမိူင်းပဵင်း၊ ၸႄႈဝဵင်းမိူင်းၽျၢၵ်ႈ  6 ၸႄႈဝဵင်း။ ၼႂ်းမိူင်းတႆးပွတ်းႁွင်ႇ သမ်ႉပဵၼ်  ၸႄႈဝဵင်းတၢင်ႉယၢၼ်း၊ ၸႄႈဝဵင်းမိူင်းယႆ   2 ၸႄႈဝဵင်း။