သိုဝ်ႇၶၢဝ်ႇ မိူင်းၵမ်ႊပေႃႊတီႊယႃႊ ႁၢႆးငၢၼ်းၵႂႃႇ ၼႂ်းဝၼ်းတီႈ 7/1/2026 မိူဝ်ႈဝႃးၼႆႉဝႃႈ ၵမ်ႊပေႃႊတီႊယႃႊ  ဢဝ်တူဝ် ၶျႅၼ်ႊၵျီႉ  ၽူႈမၢၵ်ႈမီးၸၢဝ်းၶႄႇ  ပေႃႈလဵင်ႉၸုမ်းၵျႃႊၽျႅၼ်ႉ ဢၼ်ၶဝ်တီႉၺွပ်းလႆႈဝႆႉၼၼ်ႉ ၶိုၼ်းသူင်ႇမွပ်ႈပၼ်မိူင်းၶႄႇၶိုၼ်းဝႃႈၼႆ။

လူင်ပွင်ၸိုင်ႈမိူင်းၵမ်ႊပေႃႊတီႊယႃႊဝႃႈ မၼ်းၸၢႆးၼႆႉပဵၼ်ပေႃႈလဵင်ႉလူင်ၸုမ်းၵျႃႊၽျႅၼ်ႉ-  ႁႃလွၵ်ႇလႅၼ်ၵိၼ်ငိုၼ်း ၵူၼ်းၼႂ်းလုမ်ႈၾႃႉလႆႈ ၼပ်ႉႁူဝ်လၢၼ်ႉပီႊလီႊယၼ်ႊ တေႃႊလႃႊ ၼႆသေ တီႉၺွပ်း။

 ဢၼ်တီႉသူင်ႇပၼ် မိူင်းၶႄႇၼႆႉ မီးယူႇ 3 ၵေႃႉပဵၼ် ၶျႅၼ်ႊၵျီႉ၊ သျူႊၵျီႉလျႅၼ်ႊ လႄႈ သျွင်ႊၵျီႉ ၼႆ ႁွင်ႈၵၢၼ်ၽွင်းလူင်ၾၢႆႇၼႂ်းမိူင်း မိူင်းၵမ်ႊပေႃႊတီႊယႃႊ ပိုၼ်ၽၢဝ်ႇဝႆႉၼင်ႇၼႆ။

လွင်ႈၼႆႉၵေႃႈ လႆႈႁဵတ်းသၢင်ႈၸွမ်းၼင်ႇ ၽူႈမီးပုၼ်ႈၽွၼ်းမိူင်းၶႄႇတုၵ်းယွၼ်းမႃး- ၸွမ်းၼင်ႇပိူင် ႁူမ်ႈၵၼ်တိုၵ်းတေႃး ၽဵဝ်ႈမူၺ်ႉ ၵၢၼ်ႁဵတ်းၽိတ်းရႃႇၸဝၢတ်ႈၶၢမ်ႈပူၼ်ႉလႅၼ်လိၼ်ၼၼ်ႉၵူၺ်းၼႆ ၵမ်ႊပေႃႊတီႊယႃႊပိုၼ်ၽၢဝ်ႇဝႆႉ  ၼင်ႇၼႆ။  

ၶျႅၼ်ႊၵျီႉၼႆႉလႆႈႁူႉဝႃႈ ၽူႈမီးပုၼ်ႈၽွၼ်း မိူင်းဢမေႊရိၵၼ်ႊတင်း မိူင်းပရိတ်ႊတဵင်ႊ(ဢိင်းၵလဵတ်ႈ)ၵေႃႈ ပိၵ်ႉဢိုတ်းႁႅတ်ႉႁၢမ်ႈ မၼ်းၸၢႆးဝႆႉ။

ဢမေႊရိၵၼ်ႊယိုတ်း  bitcoin မၼ်းၸၢႆး ဢၼ်ၵိုင်ႇၵႃႈၶၼ်ငိုၼ်း  12 ပီႊလီႊယၼ်ႊ တေႃႊလႃႊ  ပၢႆးမၢၵ်ႈမီး Prince Group  ၶွင်မၼ်းၸၢႆးဝႆႉထႅင်ႈ။ ၽူႈတၢင်ၼႃႈၶဝ်လၢတ်ႈဝႃႈ ပဵၼ်လွင်ႈယိုတ်း ဢၼ်မီးၵႃႈၶၼ်ယႂ်ႇလိူဝ်ပိူၼ်ႈ ၼႂ်းပိုၼ်း မိူင်းဢမေႊရိၵၼ်ႊ ၼႆယဝ်ႉ။

မိူၼ်ၼႆ ၸဝ်ႈၼႃႈတီႈၽူႈမီးပုၼ်ႈၽွၼ်းမိူင်းထႆးၵေႃႈလၢတ်ႈဝႃႈ သင်ၼႄသၢၵ်ႈသေႇလၵ်းထၢၼ်လႆႈဝႃႈ မၼ်းၸၢႆး ႁဵတ်းၽိတ်းပူၼ်ႉပႅၼ်ရႃႇၸဝၢတ်ႈတေႉၼႆၸိုင် တေၵူတ်ႇထတ်းၵၢၼ်ပၢႆးမၢၵ်ႈမီး Prince Group ၶွင်မၼ်းၸၢႆး ဢၼ်မီးဝႆႉတီႈၼႂ်းမိူင်းထႆးၼၼ်ႉၵႂႃႇ ဝႃႈၼႆ။

ၶျႅၼ်ႊၵျီႉ ၼႆႉ ၵိူတ်ႇမိူဝ်ႈပီ 1987 တီႈမိူင်းၾူႊၵျႅၼ်ႉ(Fujian) မိူင်းၶႄႇ။ ဝၢႆးလင်ပီ 2010 ၵွၼ်ႇမၼ်းၸၢႆး ပႆႇၶၢႆႉၵႂႃႇယူႇတီႈ မိူင်းၵမ်ႊပေႃႊတီႊယႃႊၼၼ်ႉ လႆႈၶဝ်ႈႁဵတ်းၵၢၼ်တီႈ ၼႂ်းၶွမ်ႊပၼီႊ ဢွၼ်ႊလၢႆႊၵဵမ်းဢၼ်ၼိုင်ႈ၊ ဝၢႆးၼၼ်ႉ ၵိုင်ႉၵၢင်ႉမၢၵ်ႈမီးၶိုၼ်ႈမႃးသေ သိုပ်ႇၶဝ်ႈၵႂႃႇႁဵတ်းၵၢၼ် ၼႂ်းတူင်ႇဝူင်းၵႃႉၶၢႆႁိူၼ်းယေးတီးလိၼ်။ ထိုင်မႃးပီ 2014 မၼ်းၸၢႆး ၸုၼ်ႉပွႆႇပႅတ်ႈ လွင်ႈပဵၼ်ၵူၼ်းမိူင်းၶႄႇသေ လၢႆႈႁပ်ႉပဵၼ်ၵူၼ်းမိူင်း ၵမ်ႊပေႃႊတီႊယႃႊ။ ၵူၺ်းၵႃး ၼႂ်းလိူၼ်တီႊသႅမ်ႊပိူဝ်ႊ ပီၵၢႆၼႆႉ ၾၢႆႇမိူင်းၵမ်ႊပေႃႊတီႊယႃႊ ၶိုၼ်းႁုပ်ႈသိမ်းပႅတ်ႈ လွင်ႈပၼ်ၶႂၢင်ႉပဵၼ်ၵူၼ်းမိူင်းၶဝ်ဝႆႉ ၼႆယဝ်ႉ။