ၼႂ်းပီ 2025 ပူၼ်ႉမႃးၼႆႉ ယွၼ်ႉလိူင်ႈယိပ်းၵွင်ႈၵၢင်ႇ ၵေႃႇၵၢၼ်ႁၢႆႉသေ တီႈမိူင်းဢမေႊရိၵၼ်ႊ မီးၵူၼ်း မၢတ်ႇၸဵပ်းလူႉတၢႆ 4 မိုၼ်ႇပၢႆ – ၸုမ်း Gun Violence Archive (GVA) ပိုၼ်ၽၢဝ်ႇဝႆႉၼင်ႇၼႆ။
ၸွမ်းၼင်ႇၸုမ်း GVA ၵဵပ်းၶေႃႈမုလ်းဝႆႉသေ ၼႂ်းပီ 2025 ၼၼ်ႉ ၵူၼ်းၸိူဝ်းလူႉတၢႆ ယွၼ်ႉ ယိုဝ်းၵၼ် မီး 14,600 ၵေႃႉ၊ ၵူၼ်းမၢတ်ႇၸဵပ်း မီး 26,100 ပၢႆ။ လိူင်ႈယိပ်းၶိူင်ႈၵွင်ႈ ၵၢင်ႇသေ ပိုတ်းယိုဝ်းဢွင်ႈတီႈၵူၼ်းၵိုၼ်းၶွၼ်ႈသမ်ႉ မီး 407 ၵမ်း ၼႆယဝ်ႉ။
ၼႂ်းလိူင်ႈပိုတ်းယိုဝ်းၵၼ်ၼႆႉ ၵူၼ်းၸိူဝ်းမၢတ်ႇၸဵပ်းလူႉတၢႆ ၵမ်ႈၼမ်ပဵၼ် လုၵ်ႈဢွၼ်ႇ။ လုၵ်ႈဢွၼ်ႇ ဢႃ ယု 11 ၶူပ်ႇလူင်းတႂ်ႈ လူႉတၢႆ 224 ၵေႃႉ၊ လုၵ်ႈဢွၼ်ႇၼႂ်းၵႄႈဢႃယု 12 ထိုင် 17 ၶူပ်ႇသမ်ႉ မၢတ်ႇၸဵပ်း 461 ၵေႃႉ။ ၼႂ်းပီ 2025 ၶၢဝ်းတၢင်းၼိုင်ႈပီ မီးလုၵ်ႈဢွၼ်ႇလူႉတၢႆ 1030 ၵေႃႉ၊ မၢတ်ႇၸဵပ်း 2733 ၵေႃႉ။
ၸုမ်း GVA ၼႆႉ ၵေႃႇတင်ႈမႃး မိူဝ်ႈပီ 2013 ပဵၼ်ၸုမ်းဢၼ်ၵဵပ်းႁွမ်ၶေႃႈမုလ်း ၵဵဝ်ႇလူၺ်ႈလွင်ႈယိပ်းၶိူင်ႈ ၵွင်ႈၵၢင်ႇသေ ၵေႃႇၵၢၼ်ႁၢႆႉ တီႈၼႂ်းမိူင်းဢမေႊရိၵၼ်ႊ မိူၼ်ၼင်ႇ ၶႃႈႁႅမ်ၵူၼ်းတၢႆ၊ ပိုတ်းယိုဝ်းၵွင်ႈၵၢင်ႇ သေ ၵႅတ်ႇၶႄတူဝ်၊ ၶႃႈႁႅမ်တူဝ်တၢႆ ၸိူဝ်းၼႆႉ။
ပီ 2025 ပူၼ်ႉမႃးၼႆႉ တီႈၼႂ်းမိူင်းဢမေႊရိၵၼ်ႊ ၵူၼ်းၸိူဝ်းပိုတ်းယိုဝ်း ၶႃႈႁႅမ်တူဝ်တၢႆၶိုၼ်း မီး 24,000 ပၢႆ။ ၼႂ်းၼိုင်ႈဝၼ်းၼၼ်ႉ မီးၵူၼ်းလူႉတၢႆ ဢမ်ႇၼၼ် မၢတ်ႇၸဵပ်း ယွၼ်ႉပိုတ်းယိုဝ်း ၶိူင်ႈယိပ်းၵွင်ႈၵၢင်ႇ မွၵ်ႈ 110 ၵေႃႉ ၼႆယဝ်ႉ။
ၸွမ်းၼင်ႇ သိုဝ်ႇၶၢဝ်ႇၼႂ်းပိုၼ်ႉတီႈႁၢႆးငၢၼ်းဝႆႉသေ တီႈမိူင်းဢမေႊရိၵၼ်ႊၼႆႉ တႄႇဢဝ်ပီ 2021 မႃး ၵူၼ်းမၢတ်ႇၸဵပ်းလူႉတၢႆ ယွၼ်ႉပိုတ်းယိုဝ်းၶိူင်ႈယိပ်းၵွင်ႈၵၢင်ႇ လူတ်းယွမ်းမႃး ၶၢဝ်းတၢင်း 4 ပီထပ်းၵၼ်။ ၵူၺ်းၵႃႈ ၼႂ်းပီ 2025 ၼႆႉ လွင်ႈၵူၼ်းလူႉတၢႆ ၶိုၼ်းၼမ်ၶိုၼ်ႈမႃး ၼႆယဝ်ႉ။
Source:Reuters
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ