မိူင်းထႆးႁၢင်ႈႁႅၼ်း တေသူင်ႇတူဝ်တႅၼ်းၵေႃႉၼိုင်ႈ တႃႇပႂ်ႉတူၺ်းၸွမ်း ပၢင်လိူၵ်ႈတင်ႈၼႂ်းမိူင်းႁူမ်ႈတုမ်မၢၼ်ႈ ဢၼ်တေၸတ်းႁဵတ်း ၼႂ်းႁၢင်လိူၼ်တီႊသႅမ်ႊပိူဝ်ႊၼႆႉ – ၽွင်းလူင် ၾၢႆႇၼွၵ်ႈမိူင်း မိူင်းထႆး တွပ်ႇလၢတ်ႈဝႆႉတီႈသိုဝ်ႇၶၢဝ်ႇ ၼင်ႇၼႆ။

တႃႇတေသုတ်ႉၶၢႆႉလႅၵ်ႈလၢႆႈၸူး ၵၢၼ်ၽွင်းငမ်းၵူၼ်းမိူင်းၼႆသေ သိုၵ်းမၢၼ်ႈပိုၼ်ၽၢဝ်ႇဝႆႉဝႃႈ တေၸတ်းႁဵတ်းပၢင်လိူၵ်ႈတင်ႈ ၶၵ်ႉတွၼ်ႈၼိုင်ႈၵႂႃႇ ၼႂ်းဝၼ်းတီႈ 28/12/2025။

ၽွင်းလူင် ၾၢႆႇၼွၵ်ႈမိူင်း မိူင်းထႆးလၢတ်ႈဝႃႈ – ဢိင်ၼိူဝ်ငဝ်းလၢႆးယၢမ်းလဵဝ်သေ ပၢင်လိူၵ်ႈတင်ႈ ဢၼ်သိုၵ်းမၢၼ်ႈတေၸတ်းႁဵတ်းၼႆႉ ဢမ်ႇမီးလွင်ႈတဵမ်ထူၼ်ႈသေတႃႉ ပဵၼ်သဵၼ်ႈတၢင်းတႃႇတေသုတ်ႉၶၢႆႉလႅၵ်ႈလၢႆႈၸူး လွင်ႈလီ၊ လွင်ႈငမ်းယဵၼ်။ လွင်ႈမိူင်းထႆး တေသူင်ႇတူဝ်တႅၼ်းၵႂႃႇၼႆႉ ဢမ်ႇၸႂ်ႈဝႃႈမၵ်းမၼ်ႈပၢင်လိူၵ်ႈတင်ႈ ဢၼ်သိုၵ်းမၢၼ်ႈတေၸတ်း၊ မိူင်းထႆး တေသိုပ်ႇၶဝ်ႈဢွၵ်ႇၵပ်းသိုပ်ႇၵၼ်တင်း မိူင်းမၢၼ်ႈၵႂႃႇ မိူၼ်ၵဝ်ႇၵူၺ်း ဝႃႈၼႆ။

ယူႇတီႈၸုမ်းဢႃႊသီႊယၼ်ႊတႄႉ ယွၼ်ႉမီးလွင်ႈမႆႈၸႂ် ၵူဝ်မိူၼ်ၼင်ႇၵႂႃႇၵမ်ႉထႅမ်ပၢင်လိူၵ်ႈတင်ႈသိုၵ်းမၢၼ်ႈ ဢၼ်ဢမ်ႇပႃးၸုမ်းၾၢႆႇသၢၼ်ၶတ်းၶဝ်ၼႆလႄႈ တေဢမ်ႇသူင်ႇတူဝ်တႅၼ်းၵႂႃႇပႂ်ႉတူၺ်းၸွမ်းယဝ်ႉ ဝႃႈၼႆ။