မိူဝ်ႈဝၼ်းတီႈ 15 လိူၼ်တီႊသႅမ်ႊပိူဝ်ႊ ယၢမ်းၵၢင်ၼႂ်မွၵ်ႈ 8 မူင်း တူဝ်တႅၼ်းသိုၵ်းမၢၼ်ႈယိုတ်းမိူင်း- လူင်ပွင်ၸိုင်ႈမိူင်းထႆး- လူင်ပွင်ၸိုင်ႈမိူင်းၶႄႇ သၢမ်ၸိုင်ႈမိူင်း ႁူပ်ႉဢုပ်ႇဢူဝ်းၵၼ် ၵၢၼ်ၽဵဝ်ႈမူၺ်ႉၵျႃႊၽျႅၼ်ႉ ၸုမ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊ တီႈဝဵင်းမျႃႉဝတီႇ မိူင်းယၢင်းၽိူၵ်ႇ။

ပၢင်ႁူပ်ႉထူပ်းဢုပ်ႇဢူဝ်းၵၼ်ၼႆႉ ၸတ်းႁဵတ်းၵႂႃႇတီႈႁူင်းႁေႃလွင်ႈငမ်းယဵၼ် ၶူဝ်မၢႆ (2) လႅၼ်လိၼ် မိူင်းမၢၼ်ႈ- မိူင်းထႆး ဝဵင်းမျႃႉဝတီႇ။ တူဝ်တႅၼ်းၾၢႆႇသိုၵ်းမၢၼ်ႈ ပဵၼ်ၽူႈၼမ်း ၼႂ်း 2 ၼႂ်းၶွမ်ႊမတီႇ ၵႂၢတ်ႇလၢင်ႉၽဵဝ်ႈမူၺ်ႉၵၢၼ်ၵျႃႊၽျႅၼ်ႉ၊ ၽူႈၵုမ်းတပ်ႉၸုမ်းပလိၵ်ႈမိူင်းႁူမ်ႈတုမ် လႄႈ ၵႅမ်ၽူႈၵုမ်း၊ ႁူဝ်ပဝ်ႈ ၶွမ်ႊမတီႇ ၾၢႆႇၸတ်းၵၢၼ်ၸႄႈတွၼ်ႈမျႃႉဝတီႇ လႄႈ ၾၢႆႇၵၢၼ်ၽွင်းငမ်း ၶဝ်ႈႁူမ်ႈဢုပ်ႇဢူဝ်းၸွမ်း။

ၾၢႆႇတူဝ်တႅၼ်းလူင်ပွင်ၸိုင်ႈမိူင်းၶႄႇတႄႉ ပဵၼ်ၵႅမ်ၽွင်းလူင် (လက်ထောက်ဝန်ကြီး) ႁွင်ႈၵၢၼ်ၽွင်းလူင်ၾၢႆႇ ႁူမ်ႇလူမ်ႈၵူၼ်းမိူင်းၶႄႇ Mr. Liu Zhong Yi လႄႈ တူဝ်တႅၼ်းၾၢႆႇလူင်ပွင်ၸိုင်ႈမိူင်းထႆး ပဵၼ် ၸွမ်သိုၵ်း ၵျီႊရၽူပ်ႊ ၽူႊရီးၻဵတ်ႊ – ၵႅမ်ၽူႈၵွၼ်းပလိၵ်ႈ တီႈႁွင်ႈၵၢၼ်လူင်ၾၢႆႇပလိၵ်ႈမိူင်းထႆး ။

တီႈပၢင်ဢုပ်ႇဢူဝ်းၼၼ်ႉ ၾၢႆႇသိုၵ်းမၢၼ်ႈ တုၵ်းယွၼ်းႁႂ်ႈတူဝ်တႅၼ်းလူင်ပွင်ၸိုင်ႈမိူင်းၶႄႇ ႁွင်ႉဢဝ်ၶိုၼ်း ၵူၼ်းမိူင်းၶႄႇ ၸိူဝ်းထုၵ်ႇတီႉၺွပ်းၵုမ်းၶင်ဝႆႉ ယွၼ်ႉတၢင်းၽိတ်းႁဵတ်း ၵၢၼ်ၵဵဝ်ႇၵွင်ႉတင်း ၵၢၼ်လွၵ်ႇလႅၼ် ၵိၼ်ငိုၼ်းတင်းဢွၼ်ႊလၢႆး (ၵျႃႊၽျႅၼ်ႉ) ၼႂ်းၸႄႈမိူင်းယၢင်းၽိူၵ်ႇ ဝႃႈၼႆ။

ၵူၼ်းမိူင်းၶႄႇ ၸိူဝ်းၺႃးတီႉၺွပ်းဝႆႉၼၼ်ႉ ၾၢႆႇမိူင်းမၢၼ်ႈ လႆႈႁပ်ႉပုၼ်ႈၽွၼ်းတူၺ်းထိုင်လဵင်ႉလူဝႆႉ။ ၸၢႆႇပၼ်ၵႃႈၶဝ်ႈၵႃႈၼမ်ႉ ၼိုင်ႈဝၼ်းလႂ် ၼိုင်ႈၵေႃႉ 15,000 ပျႃးလႄႈ တေႃႇ ထိုင်ယၢမ်းလဵဝ် သဵင်ႈၵႂႃႇငိုၼ်းၼပ်ႉမိုၼ်ႇသၢမ်ႁဵင်လၢၼ်ႉယဝ်ႉၼႆ ၸွမ်သိုၵ်းၸေႃႇမိၼ်းထုၼ်း ၽူႈၶၢၼ်ပၢၵ်ႇသိုၵ်းမၢၼ်ႈ ယိုတ်းမိူင်း လၢတ်ႈဝႆႉၼင်ႇၼႆ။

“ၵၢၼ်ႁပ်ႉပုၼ်ႈၽွၼ်းဢဝ် ၵူၼ်းမိူင်းၼွၵ်ႈဝႆႉၼႆႉ ပုၼ်ႈၽွၼ်းယႂ်ႇလူင်ၼၵ်းၼႃပႃးၼႅၼ်ႈၼႃႇလႄႈ ၵူၼ်းမိူင်းၼွၵ်ႈၸိူဝ်းၺႃးတီႉၺွပ်းဝႆႉၼႂ်းမိူင်းႁူမ်ႈတုမ် (မိူင်းမၢၼ်ႈ) လူၺ်ႈတၢင်း ၽိတ်းၵၢၼ်လွၵ်ႇလႅၼ်ၵိၼ် ငိုၼ်းတင်းဢွၼ်ႊလၢႆႊၼႆႉ ၶႂ်ႈႁႂ်ႈၽူႈမီးပုၼ်ႈၽွၼ်းၸိူဝ်းၵဵဝ်ႇၵွင်ႉ မိူင်းၽႂ်မိူင်းမၼ်း မႃးႁွင်ႉဢဝ်မိူဝ်းၶိုၼ်း။” – ၸွမ်သိုၵ်းၸေႃႇမိၼ်းထုၼ်း လၢတ်ႈၼင်ႇၼႆ။

ၸွမ်းၼင်ႇသဵၼ်ႈမၢႆ ဢၼ်သိုၵ်းမၢၼ်ႈယိုတ်းမိူင်းပိုၼ်ၽၢဝ်ႇဢွၵ်ႇဝႆႉၼၼ်ႉ တႄႇလိူၼ်ၵျႅၼ်ႊၼိဝ်ႊရီႊ 30 ဝၼ်း တေႃႇထိုင် ဝၼ်းတီႈ 13 လိူၼ်တီႊသႅမ်ႊပိူဝ်ႊၼႆႉ တီႉၺွပ်းလႆႈဝႆႉၵူၼ်းႁဵတ်းၵၢၼ်ၵျႃႊၽျႅၼ်ႉ ၼႂ်းၸႄႈဝဵင်းမျႃႉဝတီႇ 13272 ၵေႃႉ။ သူင်ႇမွပ်ႈၶိုၼ်းတီႈမိူင်းၽႂ်မၼ်းၵႂႃႇ တႃႇ 11617 ၵေႃႉယဝ်ႉတူဝ်ႈလီငၢမ်း ၼႆယဝ်ႉ။

ၼႂ်းၶၢဝ်းတၢင်းသွင်ပီ ႁဵတ်းၵၢၼ်ၵႂၢတ်ႇလၢင်ႉ ၽဵဝ်ႈမူၺ်ႉၵူၼ်းၸိူဝ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်း တင်း ဢွၼ်ႊလၢႆႊ ၼႂ်းမိူင်းတႆးပတ်းပိုၼ်ႉ လႄႈ မိူင်းယၢင်းၽိူၵ်ႇၼႆႉ တီႉၺွပ်းလႆႈၵူၼ်းမိူင်းၼွၵ်ႈတႃႇ 70196 ၵေႃႉ။ ၼႂ်းၼၼ်ႉ ပဵၼ်ၵူၼ်းမိူင်းၶႄႇ ၼမ်လိူဝ်ပိူၼ်ႈသုတ်း ဝႃႈၼႆ။

ၼင်ႇႁိုဝ် တေၽဵဝ်ႈမူၺ်ႉလႆႈၵူၼ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊၼႆသေ သိုၵ်းမၢၼ်ႈယိုတ်းမိူင်း ၸႂ်ႉၵူၼ်းသိုၵ်း တင်း ၶိူင်ႈၸၢၵ်ႈ ၶဝ်ႈၵႂႃႇတီႉၺွပ်းၵူၼ်း၊ ယႃႉပႅတ်ႈ ႁူင်းၵေႃႇၵၢႆႇ ဢွင်ႈတီႈမီးၸုမ်းၵျႃႊၽျႅၼ်ႉယူႇသဝ်း ၼႂ်း KK Park ၼၼ်ႉ တႃႇ 444 ဢွင်ႈတီႈယဝ်ႉ ဝႃႈၼႆ။