သျှိူဝ်ႊၵျိၵျၢင်ႊ (Shé Zhìjiāng- 佘智江) ၵေႃႉပူၵ်းပွင်ဝဵင်းမႂ်ႇ သူၺ်ႇၵူၵ်ႉၵူဝ်ႇ တီႈလႅၼ်လိၼ် ထႆး – မၢၼ်ႈသေ ပၼ်ႇၵၢၼ်ၵျႃႊၽျႅၼ်ႉၼၼ်ႉ မိူင်းထႆးဢဝ်တူဝ်မၼ်းၸၢႆးသူင်ႇပၼ်ၶႄႇ မိူဝ်ႈဝၼ်းတီႈ 12/11/2025 မိူဝ်ႈဝႃးၼႆႉ။

မၼ်းၸၢႆးၼႆႉ ၸိုဝ်ႈလိုဝ်းလင်ဝႆႉဝႃႈ ပဵၼ်ႁူဝ်ၼႃႈ ၸုမ်းလွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ /ၵျႃႊၽျႅၼ်ႉ ၼႂ်းၸဵင်ႇၸၢၼ်းဝၼ်းဢွၵ်ႇၵုၼ်ၶဵဝ်ဢေႊသျႃႊ။ ပဵၼ်ပႃး ႁူဝ်ပဝ်ႈ ၶွမ်ႊပၼီႊ ရထၢႆႉ (Yatai Internationla Holding Group)သေ ပဵၼ်ၵေႃႉလူင်းတိုၼ်း ၼႂ်းၵၢၼ် ပၢင်တေႃႇလွင်း ၵႃႊသီႊၼူဝ်ႊ လႄႈ ၵၢၼ်မၢၵ်ႈမီးၼိူဝ်ဢွၼ်ႊလၢႆႊ ၼႂ်း ၸဵင်ႇၸၢၼ်းဝၼ်းဢွၵ်ႇၵုၼ်ၶဵဝ်ဢေႊသျႃႊ- ၶၢဝ်ႇမိူင်းထႆး မိူင်းၶႄႇ ပိုၼ်ၽၢဝ်ႇဝႆႉၼင်ႇၼႆ။

မၼ်းၸၢႆးၼႆႉထုၵ်ႇၸဝ်ႈၼႃႈတီႈပလိၵ်ႈထႆး တီႉၺွပ်းတီႈ ဝဵင်းလူင်ၵုင်းထဵပ်ႈ မိူင်းထႆး မိူဝ်ႈလိူၼ်ဢေႃႊၵတ်ႉသ် ပီ 2022 လူၺ်ႈတၢင်းၽိတ်း လွၵ်ႇလႅၼ်ၵိၼ်ငိုၼ်းၵူၼ်းမိူင်းၶႄႇၼပ်ႉႁူဝ်ႁဵင်လၢၼ်ႉယႂၼ်ႊ။

ၵဵဝ်ႇၵပ်းလွင်ႈမၢပ်ႇမႂ်ၵူႈလွင်ႈလွင်ႈသေ တူဝ် သျှိူဝ်ႊၵျိၵျၢင်ႊ တႄႉတွပ်ႇထဵင်လၢတ်ႈဝႆႉဝႃႈ – မၼ်းၸၢႆးပဵၼ်ၸဝ်ႈၵၢၼ်ပၢႆးမၢၵ်ႈမီး ၾၢႆႇၵေႃႇသၢင်ႈၵေႃႉၼိုင်ႈၵူၺ်း ဝႃႈၼႆ။ ၵူၺ်းၵႃႈ ၽွင်းမိူဝ်ႈမၼ်းၸၢႆး ၺႃးတီႉၺွပ်းၵုမ်းတူဝ်ဝႆႉ ၼႂ်းၵၢင်ပီ 2024 ၼၼ်ႉ ႁူဝ်ၼႃႈတပ်ႉပႂ်ႉလႅၼ်လိၼ်ယၢင်းၽိူၵ်ႇ (BGF) ၸေႃးၶျိတ်ႉတူႇ ဢွၼ်ႁူဝ်လုၵ်ႈၼွင်ႉပွင်ႈပၢႆသေ ၸတ်းႁဵတ်း ပၢင်ယွၼ်းသူးပၼ် တႃႇမၼ်းၸၢႆး ၼႂ်းၼႃႈတီႈတပ်ႉၸုမ်းၶဝ် ၵုမ်းၵမ်။

သိုဝ်ႇၶၢဝ်ႇထႆး ThaiPBS ၵေႃႈ တႅမ်ႈႁၢႆးငၢၼ်းၵႂႃႇဝႃႈ သျှိူဝ်ႊၵျိၵျၢင်ႊ ဢႃယု 43 ပီၼႆႉ ပဵၼ်ၵေႃႉၵုမ်းၵမ် ဢွင်ႈတီႈပၢင်တေႃႇလွင်း တင်းဢွၼ်ႊလၢႆႊ 239 တီႈ။ လုၵ်ႉတီႈၵၢၼ်ငၢၼ်းၸိူဝ်းၼၼ်ႉသေ မၼ်းၸၢႆးလႆႈငိုၼ်းၶႄႇ ဝႆႉ ဢမ်ႇယွမ်း 2700 လၢၼ်ႉယႂၼ်ႊ (မွၵ်ႈငိုၼ်းထႆး မိုၼ်ႇလၢၼ်ႉဝၢတ်ႇ) ဝႃႈၼႆ။

ၵဵဝ်ႇၵပ်းလွင်ႈၵျႃႊၽျႅၼ်ႉၼႆႉသေ ႁွင်ႈၵၢၼ် ၾၢႆႇပၢၼ်ႇတႃႇငိုၼ်းတွင်း မိူင်းဢမေႊရိၵၼ်ႊၵေႃႈ ပိုၼ်ၽၢဝ်ႇဝႆႉဝႃႈ – ၵူၼ်းမိူင်းဢမေႊရိၵၼ်ႊ ထုၵ်ႇၸုမ်းၵျႃႊၽျႅၼ်ႉ တၢင်းၸဵင်ႇၸၢၼ်းဝၼ်းဢွၵ်ႇၵုၼ်ဢေႊသျႃႊလွၵ်ႇလႅၼ်ၵိၼ်ငိုၼ်း – ဢၼ်လူင်ပွင်ၸိုင်ႈႁူႉၸွမ်းမီးယူႇ မိုၼ်ႇလၢၼ်ႉတေႃႊလႃႊ ( 10 ပီႊလီႊယႅၼ်ႊတေႃႊလႃႊ) ယဝ်ႉလႄႈ – သင်ႇဢိုတ်းႁႅတ်ႉပၢႆးမၢၵ်ႈမီး ၶိူဝ်းၶၢႆႇၼႅင်ႈသၢၼ် ၶွမ်ႊပၼီႊ ရထၢႆႉ ဝႆႉဝႃႈၼႆ။