မိူဝ်ႈဝၼ်းတီႈ 16/09/2025 ၽူႈမီးၸၼ်ႉ ၼႂ်းတပ်ႉသိုၵ်းမိူင်းဢိၼ်ႊတီႊယႃႊ ႁွင်ႈၵၢၼ်ၾၢႆႇတပ်ႉၼမ်ႉ၊ တပ်ႉလူမ်း (တပ်ႉၵၢင်ႁၢဝ်)၊ တပ်ႉပႆလိၼ်တႃႇ 120 ၵေႃႉ ႁွတ်ႈၽႅဝ်တီႈဝဵင်းလူင်ၼေႇပျီႇတေႃႇ မိူင်းမၢၼ်ႈထုင်ႉပဵင်း။
ၵႅမ်ၽူႈၵွၼ်းတိူင်းသိုၵ်း ငဝ်ႈၸိုင်ႈသိုၵ်းမၢၼ်ႈ တီႈၼေႇပျီႇတေႃႇ ၸွမ်သိုၵ်း ၼေႇဢွင်ႇၸူဝ်း ပႂ်ႉႁပ်ႉတွၼ်ႈ ။
COL SHRIKANT JETHI ၸဝ်ႈသိုၵ်းလူင် သျရီႊၶၢၼ်ႉ ၵျေႊတီႊ ဢွၼ်ၼမ်းဢဝ် ၸုမ်းတူဝ်တႅၼ်း ၽူႈမီးၸၼ်ႉၼႂ်းတပ်ႉသိုၵ်းမိူင်းဢိၼ်ႊတီႊယႃႊ မႃးႁွတ်ႈမိူင်းမၢၼ်ႈ ပိူဝ်ႈတႃႇဢႅဝ်ႇယဵမ်ႈလဵပ်ႈႁဵၼ်း ၼႂ်းမိူင်းမၢၼ်ႈထုင်ႉပဵင်းသေ တေယူႇၼႂ်းမိူင်းမၢၼ်ႈ ႁိုင်ၶၢဝ်းတၢင်း 4 ဝၼ်း တေႃႇထိုင်ဝၼ်းတီႈ 19/09/2025 ၼႆယဝ်ႉ။
ပိူဝ်ႈတႃႇပဵၼ်ၵၢၼ်ႁၵ်ႉသႃမိုတ်ႈၵိုဝ်း ၸိုင်ႈမိူင်းတင်းသွင်ၾၢႆႇၼၼ်ႉ ၾၢႆႇမိူင်းမၢၼ်ႈၵေႃႈ သူင်ႇတူဝ်တႅၼ်း ၽူႈမီးၸၼ်ႉ လႄႈ ၵူၼ်းသိုၵ်း ၼႂ်းတပ်ႉသိုၵ်းမၢၼ်ႈ ဢွၵ်ႇၶၢဝ်းတၢင်းၵႂႃႇလဵပ်ႈႁဵၼ်းၼႂ်းမိူင်းဢိၼ်ႊတီႊယႃႊ တႃႇ 120 ၵေႃႉ မိူၼ်ၵၼ်။ ၵေႃႉဢွၼ်ၼမ်း ၸုမ်းတူဝ်တႅၼ်းတပ်ႉသိုၵ်းမိူင်းမၢၼ်ႈ ၾၢႆႇႁွင်ႈၵၢၼ်တပ်ႉၼမ်ႉ၊ တပ်ႉလူမ်း (တပ်ႉၵၢင်ႁၢဝ်)၊ တပ်ႉပႆလိၼ်ၵႂႃႇၼၼ်ႉ ပဵၼ်ၸွမ်သိုၵ်း ၸႃႇၼီႇဢွင်ႇ ၼႆယဝ်ႉ။
လႆႈႁူႉဝႃႈ ၸုမ်းတူဝ်တႅၼ်း ၽူႈမီးၸၼ်ႉၼႂ်းတပ်ႉသိုၵ်းတင်းသွင်မိူင်း တေဢႅဝ်ယဵမ်ႈ လဵပ်ႈႁဵၼ်းၼႂ်းၸိုင်ႈမိူင်း မိူင်းဢိၼ်ႊတီႊယႃႊ လႄႈ မိူင်းမၢၼ်ႈ တင်ႈတႄႇ ဝၼ်းတီႈ 16 ထိုင် ဝၼ်းတီႈ 19 မိူၼ်ၵၼ် တင်းသွင်ၾၢႆႇ ၼႆယဝ်ႉ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ