ၼႂ်းဝၼ်းတီႈ 9 / 9/ 2025  မိူင်းၵမ်ႊပေႃႊတီႊယႃႊ (ၵမ်ႊပူႊၶျႃႊ)  ပိုတ်ႇဝၢင်းႁိူဝ်းမိၼ်မႂ်ႇ ဢၼ်လႅၼ်ႈၵူႈမိူင်းမိူင်း ၊ သၢင်ႈဝႆႉ ၵိုင်ႇငိုၼ်း ဢမေႊရိၵၼ်ႊ 2000 လၢၼ်ႉ တေႃႇလႃႇ  ဝႃႈၼႆ။

ဝၢင်းႁိူဝ်းမိၼ်မႂ်ႇၼႆႉ မီးၸိုဝ်ႈဝႃႈ Techo မီးဝႆႉၾၢႆႇၼွၵ်ႈ ဝဵင်းလူင် ၾၼွမ်ႊပိၼ်ႊ (Phnom Penh) ယၢၼ်ၵႆဝဵင်း မွၵ်ႈ 12 လၵ်း။

 တၢင်းၵႂၢင်ႈဝၢင်းႁိူဝ်းမိၼ်မႂ်ႇၼႆႉ မီး 6400 ဢေႊၶိူဝ်ႊ၊ မီးသဵၼ်ႈတၢင်းလႅၼ်ႈ  ႁိူဝ်းမိၼ် 3 သဵၼ်ႈ။ ယႂ်ႇလိူဝ်သေ ဝၢင်းႁိူဝ်းမိၼ်ၵဝ်ႇ ဢၼ်မီးသဵၼ်ႈတၢင်းလႅၼ်ႈႁိူဝ်းမိၼ်  သဵၼ်ႈလဵဝ် ဢၼ်မီးဢႃယုႁိုင်ၼၢၼ်းမႃး ႁိမ်းၸမ်ၶၢဝ်းတၢင်း 70 ပီၼၼ်ႉ ဝႃႈၼႆ။

ဝၢင်းႁိူဝ်းမိၼ်ၵဝ်ႇ ၵမ်ႊပူႊၶျႃႊၼႆႉ မိူဝ်ႈပီ 2024 ၼၼ်ႉ ႁပ်ႉလႆႈၵူၼ်းဢွၵ်ႇၶၢဝ်းတၢင်း 4.75 လၢၼ်ႉ  (ၸမ်  5 လၢၼ်ႉ ) ၵေႃႉၵူၺ်း။ ဝၢင်းႁိူဝ်းမိၼ်မႂ်ႇၼႆႉသမ်ႉ ယၢမ်းလဵဝ် ႁပ်ႉလႆႈၵူၼ်းဢွၵ်ႇၶၢဝ်းတၢင်း 13 လၢၼ်ႉၵေႃႉ။ ပေႃးထိုင်ပီ 2050 မႃးၸိုင် တေတိူဝ်းၶႂၢၵ်ႈၵႂႃႇ ႁႂ်ႈႁပ်ႉလႆႈ ၶႅၵ်ႇဢွၵ်ႇၶၢဝ်းတၢင်း ထိုင် 50 လၢၼ်ႉၵေႃႈ ဝႃႈၼႆ။ ဝၢင်းႁိူဝ်းမိၼ်မႂ်ႇၼႆႉ လူင်ပွင်ၸိုင်ႈ ၵမ်ႊပူႊၶျႃႊ တင်း ၶွမ်ႊပၼီႊ ၵမ်ႊပူႊၶျႃႊ ၸိူဝ်းမီးဝႆႉတီႈ ၼွၵ်ႈမိူင်း ႁူမ်ႈၵၼ်သေ လူင်းတိုၼ်းလၢင်းဝႆႉ၊ ယူႇတီႈ ၶွမ်ႊပၼီႊၾၢႆႇၵေႃႇသၢင်ႈ မိူင်းၶႄႇ ႁပ်ႉပုၼ်ႈၽွၼ်း ၵေႃႇသၢင်ႈပၼ်ဝႆႉ ၼႆယဝ်ႉ။