မိူဝ်ႈဝၼ်းတီႈ 12/08/2025 ယၢမ်းၵၢင်ၼႂ် သိုၵ်းမၢၼ်ႈ ယိုတ်းမိူင်း ၸတ်းႁဵတ်းပၢင်ၵုမ်လူင် ၶွမ်ႊမသျိၼ်ႊ ၵတ်းယဵၼ်သႃႇယႃႇလႄႈ ၵၢၼ်ႁူမ်ႇလူမ်ႈၸိုင်ႈမိူင်း တီႈဝဵင်းလူင်ၼေႇပျီႇတေႃႇ။

ၼႂ်းပၢင်ၵုမ်လူင်ၼၼ်ႉ တၢမ်တူဝ် ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ဢွၼ်ၼမ်းၸတ်းႁဵတ်းသေ မီးၵႅမ်ႁူဝ်ပဝ်ႈ ၵႅမ်ၸွမ်ၸိၵ်းသိုၵ်းမၢၼ်ႈ ၸူဝ်းဝိၼ်း၊ ၽူႈၶဝ်ႈၸုမ်းၶွမ်ႊမသျိၼ်ႊ၊ ၸွမ်ၽွင်းလူင်ၸိုင်ႈမိူင်း ဢူးၺူဝ်ႇၸေႃး ၸိူဝ်းၼႆႉ ၶဝ်ႈႁူမ်ႈၸွမ်း။

မိၼ်းဢွင်ႇလၢႆႇ မွၵ်ႇလၢတ်ႈၵႂႃႇ ၼႂ်းပၢင်ၵုမ်လူင်ၼၼ်ႉဝႃႈ -“တေၶတ်းၸႂ်ၸတ်းႁဵတ်းပၢင်လိူၵ်ႈ ပတ်းပိုၼ်ႉ ၸိုင်ႈမိူင်း ႁႂ်ႈပေႃးဢွင်ႇမၢၼ်၊ ပဵၼ်ႁိုဝ်ၵေႃႈ တိုၼ်းတေၸတ်းႁဵတ်းပၢင်လိူၵ်ႈတင်ႈ ႁႂ်ႈပေႃးလႆႈ၊ ၼင်ႇႁိုဝ် သဵၼ်ႈမၢႆၶႅပ်းၵၢင်ၸႂ် တေဢမ်ႇမီးလွင်ႈၽိတ်းပိူင်ႈၼၼ်ႉၵေႃႈ တေႁၢင်ႈႁႅၼ်းလူင်ႈၼႃႈၵႂႃႇ။ ပိူဝ်ႈတႃႇတေၸတ်းႁဵတ်းပၢင်လိူၵ်ႈတင်ႈၵႂႃႇလႆႈၵူႈၸႄႈဝဵင်း လွတ်ႈလွတ်ႈလႅဝ်းလႅဝ်းၼၼ်ႉၵေႃႈ ၾၢႆႇတပ်ႉပႆလိၼ်၊ တပ်ႉၼမ်ႉ၊ တပ်ႉၵၢင်ႁၢဝ် (တပ်ႉလူမ်း) လႄႈ ငဝ်ႈငုၼ်းတိူင်းသိုၵ်းၵူႈတီႈ တေၽႅၼ်ၸတ်းၵၢၼ်သိုၵ်းသေ ဢဝ်ႁူမ်ႇလူမ်ႈ ၵႂႃႇ ၼႂ်းပိုၼ်ႉတီႈလႂ်ပိုၼ်ႉတီႈၼၼ်ႈ”- ဝႃႈၼႆ။

ၼင်ႇႁိုဝ် ၽူႈတႅၼ်း ၼႂ်းၸုမ်းသိုၵ်းမၢၼ်ႈ တေၶဝ်ႈၵႂႃႇဢဝ်ဢွင်ႈတီႈယူႇလႆႈ ၼႂ်းလုမ်းသၽႃး တႃႇ 50 % (ဝၢၵ်ႈ) ၼၼ်ႉၵေႃႈ မိၼ်းဢွင်ႇလၢႆႇ တေၶတ်းၸႂ်ႁဵတ်းသၢင်ႈၵႂႃႇ ၼႆယဝ်ႉ။

ပၢင်လိူၵ်ႈတင်ႈ ဢၼ်မိၼ်းဢွင်ႇလၢႆႇ သိုၵ်းမၢၼ်ႈ ယိုတ်းမိူင်း တေဢွၼ်ၼမ်းၸတ်းႁဵတ်းၵႂႃႇ ၼႂ်းလိူၼ်တီႊသႅမ်ႊပိူဝ်ႊ ပီ 2025 ၼႆႉ သိုၵ်းမၢၼ်ႈ ဢွၵ်ႇၶေႃႈပူင်ႁႂ်ႈၸႂ်ႉတိုဝ်း ၶိူင်ႈၸၢၵ်ႈ (မြန်မာအီလက်ထရောနစ်မဲ ပေးစက် MEVM) ၵႂႃႇသေ ယၢမ်းလဵဝ် ၶႃႈႁၢပ်ႇၵၢၼ်ၶုၼ်သိုၵ်းမၢၼ်ႈ ႁွင်ႈၵၢၼ် ၸိူဝ်းၵဵဝ်ႇၶွင်ႈၼၼ်ႉ တႄႇလူင်းပိုၼ်ႉတီႈ ပၼ်ပၢင်သွၼ် လၢႆးၸႂ်ႉတိုဝ်း ၶိူင်ႈၸၢၵ်ႈၼႆႉၵႂႃႇ ၸွမ်းၸႄႈဝဵင်း ၸိူဝ်းတူၵ်းယူႇ ၼႂ်းၵၢၼ်ဢုပ်ႉပိူင်ႇၽွင်းငမ်းတႂ်ႈသိုၵ်းမၢၼ်ႈ ၼႆယဝ်ႉ။

လိူဝ်ၼၼ်ႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ၵေႃႉယုၵ်ႉယွင်ႈၸဝ်ႈၵဝ်ႇၶိုၼ်ႈ ၸၼ်ႉပဵၼ်ၸွမ်ၸိုင်ႈ ၸူဝ်ႈၶၢဝ်း မိူင်းႁူမ်ႈတုမ်ဝႆႉၼၼ်ႉ ယင်းတိုၵ်းသူၼ်း ၸီႉၸမ်ႈဝႆႉၼၵ်းၼၵ်း ၼႃၼႃထႅင်ႈဝႃႈ တေပၵ်းတႃပႂ်ႉတူၺ်းၶၢဝ်ႇ/ ၶေႃႈမုလ်း လွင်ႈလွၵ်ႇလႅၼ်ၵိၼ်ငိုၼ်း ၼိူဝ်ဢွၼ်ႊလၢႆႊ (ၸုမ်းၵျႃးၽႅၼ်ႉ)၊ လွင်ႈၽဵဝ်ႈမူၺ်ႉ ယႃႈမဝ်းၵမ်၊ ၵၢၼ်ၵႂၢတ်ႇလၢင်ႉလွင်ႈၵႃႉၶၢႆၶူဝ်းၶွင်ၽိတ်းပၵ်းပိူင်မၢႆမီႈၸိူဝ်းၼႆႉ ၵူႈၸွၵ်ႉၵူႈၸဵင်ႇသေ ဝႆႉပဵၼ်လွင်ႈၵၢၼ်ယႂ်ႇသုတ်းၼႂ်းၸိုင်ႈမိူင်းယဝ်ႉ တေတီႉၺွပ်းဢဝ်လိူင်ႈၵႂႃႇ ၸွမ်းၼင်ႇမၢႆမီႈဝၢၼ်ႈမိူင်းမီး ၼႆယဝ်ႉ။

တႅမ်ႈ – ၽူၺ်းၼုမ်ႇ