ၵၢင်ႉၵႄႇႁွင်ႉၵူၼ်းမိူင်းတူၼ်ႈတီးၸူၵ်းမႄး တႃႇၾိုၵ်းၵၢၼ်သိုၵ်းၸုပ်ႈ 15 ယဝ်ႉဢမ်ႇႁိုင် ၼႂ်းႁၢင်လိူၼ် ၵျူႊလၢႆႊ ၼႆႉ  သိုၵ်းမၢၼ်ႈဢႅဝ်ႇႁႃတီႉၺွပ်း ၵူၼ်းမိူင်းတီႈဝဵင်းတူၼ်ႈတီး   ယၢမ်းၵၢင်ၶမ်ႈၵၢင်ၶိုၼ်း  ။

ၼႂ်းဝၼ်းတီႈ15/7/2025 ယၢမ်းၵၢင်ၶမ်ႈ 9 မူင်း ပလိၵ်ႈမၢၼ်ႈ တီႉၺွပ်း ၵူၼ်းၸၢႆး မွၵ်ႈ 20 ၵေႃႉတၢင်းၾၢႆႇႁွင်ႇၵၢတ်ႇလူင်လႄႈ ၼႂ်းပွၵ်ႉၵၢၼ်ႇဢွၵ်ႉ ၸိူဝ်းၼၼ်ႉ။  

ၽူႈၸၢႆးၵူၼ်းပိုၼ်ႉတီႈ ဢၼ်ႁူႉလွင်ႈတၢင်းၼၼ်ႉ လၢတ်ႈၽူႈတွႆႇႁွၵ်ႈဝႃႈ -“  ၼႂ်းဝဵင်း တူၼ်ႈတီး တႄႉဢမ်ႇတီႉ ၶဝ်တီႉၼႂ်းပွၵ်ႉသၢပ်ႇဝဵင်း တီႈၼႂ်းၵိဝ်ႇၼႂ်းငွၼ်ႈဢၼ်ၶၢတ်ႇသၢႆတႃၵူၼ်း၊ ၽွင်း ၵၢင်ၶိုၼ်း လပ်းသိင်ႇၸိူဝ်းၼႆႉ။  မိူဝ်ႈဝၼ်းတီႈ 15 ၵၢင်ၶမ်ႈၼႆႉ တၢင်းၵၢတ်ႇလႄႈတၢင်းပွၵ်ႉ ၵၢၼ်ႇဢွၵ်ႉၸိူဝ်းၼၼ်ႉၾႆးဢမ်ႇမႃးလႄႈ ၶဝ်ၶဝ်ႈတဝ်ၼႂ်းပွၵ်ႉ ပိူင်းၾႆးထၢတ်ႈသေ ႁႃတီႉ ၵူၼ်းၵႂႃႇ မႃးၸွမ်းတၢင်း။ ၸိူဝ်းတၼ်းပၢႆႈလွတ်ႈၵေႃႈလွတ်ႈ။ ဢၼ်ႇၺႃးတီႉၵေႃႈၺႃး။ လႆႈၵႂႃႇမွၵ်ႈ 20 ၵေႃႉၼႆႉၼႆ။ တေႃႇထိုင်တလဵဝ် ၵူၼ်းႁိူၼ်းၶဝ်ယင်းပႆႇလႆႈတၢင်းၵပ်းသိုပ်ႇၼႆဝႃႇ။ ”-ဝႃႈၼႆ ။

ၼႂ်းဝၼ်းတီႈ 15/7/2025 ၼၼ်ႉၵူၺ်းၼင်ႇၵဝ်ႇ ယၢမ်းၵၢင်ၶမ်ႈ 8 မူင်း သိုၵ်းမၢၼ်ႈ တီႉၵူၼ်း  ၼႂ်းပွၵ်ႉ ၵၼ်ႇတႃႇ 2 ၵေႃႉ ၊ ၼႂ်းပွၵ်ႉၸိင်ႇပၢၼ်း 4 ၵေႃႉ ။ ပဵၼ်ၵူၼ်းၵႂႃႇႁဵတ်းၵၢၼ်သေပွၵ်ႈႁိူၼ်းၶိုၼ်း ဝႃႈၼႆ။  

ၵူၼ်းၸၢႆးဢႃယု 30 ပၢႆ ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၵူၼ်းဢၼ်ပွၵ်ႈမႄးတႃႇၾိုၵ်းၵၢၼ်သိုၵ်းသေ ၸိူဝ်းဢမ်ႇၶႂ်ႈၵႂႃႇၸိူဝ်းၼၼ်ႉ ၵၢင်ႉၵႄႇဝႃႈ ပေႃးပၼ်ငိုၼ်း ဢမ်ႇၵႂႃႇၵေႃႈလႆႈၼႆသေၵဵပ်းငိုၼ်းတီႈၶဝ်။ ၵၢင်ႉၵႄႇသမ်ႉၶိုၼ်းလႄႇလမ်းႁႃတီႉၵူၼ်းၼႂ်းၵိဝ်ႇၼႂ်းငွၼ်ႈယၢမ်းၵၢင်ၶမ်ႈၵၢင်ၶိုၼ်းၼၼ်ႉၼႃႇ။ ၵူၼ်းဢၼ်ႁဵတ်းၵၢၼ်ႁႃၵိၼ်ဝၼ်းလႂ်ဝၼ်းၼၼ်ႉၵူၺ်းယဝ်ႉယၢပ်ႇၵိၼ်းလိူဝ်ႁႅင်း”- ဝႃႈၼႆ။

ၵူၼ်းဢၼ်ထုၵ်ႇသိုၵ်းမၢၼ်ႈတီႉၺွပ်းလႆႈၼၼ်ႉ ၵမ်ႈၼမ် ထုၵ်ႇသူင်ႇၵူတ်ႇထတ်း ပၢႆးယူႇလီ တီႈဝဵင်းဢွင်ႇပၢၼ်းယဝ်ႉ သူင်ႇၵႂႃႇၾိုၵ်းၵၢၼ်သိုၵ်း ဝဵင်းၵဵင်းတုင် ၊ ၵူၼ်းၸိူဝ်း ထုၵ်ႇတီႉၺွပ်းၵႂႃႇ ဢမ်ႇမီးၽႂ်ပွၵ်ႈ မႃးၶိုၼ်း ပေႃႈမႄႈပဵၼ်ၼမ်ႉႁူၼမ်ႉတႃ။ ၵမ်ႈၽွင်ႈဝႃႈ ထုၵ်ႇသူင်ႇၼႃႈသိုၵ်းၵမ်းသိုဝ်ႈၼႆလႄႈ  ၽႂ်ၵေႃႈဢမ်ႇၶႂ်ႈၵႂႃႇၾိုၵ်းၵၢၼ်သိုၵ်း – ၵူၼ်းပိုၼ်ႉတီႈလၢတ်ႈ ။

ၾၢႆႇတင်းသိုၵ်းမၢၼ်ႈပိုၼ်ၽၢဝ်ႇ  ဝၼ်းတီႈ 13 လိူၼ်ၵျူႊလၢႆႊၼႆႉဝႃႈ-  ၾိုၵ်းသွၼ်ပၼ်  ၵၢၼ်သိုၵ်း ၼိုင်ႈၸုပ်ႈၼႆႉႁူဝ်ၵူၼ်း 5000 ၵေႃႉ ၊ ၸုပ်ႈ 15 ၼႆႉ တီႈဝဵင်းၵဵင်းတုင် တႄႇၾိုၵ်း သွၼ်ၵၢၼ်သိုၵ်းပၼ်ဝႆႉယူႇယဝ်ႉ ဝႃႈၼႆ။

ၾၢႆႇၼိုင်ႈ တီႈဝဵင်းတူၼ်ႈတီးၼႆႉ မၢႆမီႈသိုၵ်း မႃႊသျႄႊလေႃႊ ဢၼ်ဢွၵ်ႇဝႆႉၸဵမ်မိူဝ်ႈသိုၵ်းမၢၼ်ႈတႄႇယိုတ်းဢႃႇၼႃႇၸိုင်ႈမိူင်းပုၼ်ႉၼၼ်ႉ တိုၵ်ႉမီးယူႇ။ သိုၵ်းပႆႇလူတ်းယွၼ်ႇပူတ်းပၼ်ၶိုၼ်း။ ၵွပ်ႈၼႆသင်ဝႃႈ ၺႃးတီႉၸွမ်းတၢင်း ယၢမ်းၵၢင်ၶမ်ႈၵၢင်ၶိုၼ်းၼႆ တႃႇတေလွတ်ႈၶိုၼ်းပဵၼ်ဢၼ်ယၢပ်ႇၽိုတ်ႇတႄႉတႄႉ- ၼၢင်းယိင်း ၵူၼ်းၶၢႆၶူဝ်းတီႈဝဵင်းတူၼ်ႈတီးလၢတ်ႈၼင်ႇၼႆ။

ယၢမ်းလဵဝ်တီႈဝဵင်းတူၼ်ႈတီး ၵၢင်ႉၵႄႇလႄႈ ပလိၵ်ႈသိုၵ်းမၢၼ်ႈ ၶိူင်ႈ ထႅပ်ႊပလႅတ်ႊ သေ ၶိုၼ်ႈႁိူၼ်းလူင်းႁိူၼ်း ၵူတ်ႇထတ်းသဵၼ်ႈမၢႆၶႅၵ်ႇ   ၼႂ်းပွၵ်ႉၼႂ်းယွမ်ႇ၊ ၸွမ်းႁူင်းႁႅမ်းလႄႈ  ႁူင်းလိုဝ်ႈသဝ်းၸိူဝ်းၼႆႉသေဢမ်ႇၵႃး လႄႇလမ်းႁႃတီႉၺွပ်းၵူၼ်းၼႂ်းပွၵ်ႉၼႂ်းယွမ်ႇပႃးလႄႈ ႁႂ်ႈၾၢင်ႉၵၼ်ၵႂႃႇမႃးၼႆၵူၼ်းပိုၼ်ႉတီႈပၼ်ၾၢင်ႉဝႆႉၼင်ႇၼႆ ။