မိူင်းႁူမ်ႈတုမ် ဢၼ်တပ်ႉသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းဝႆႉယၢမ်းလဵဝ်ၼႆႉ တေႃႇဢွင်ႇသၢၼ်းၸူႉၵျီႇ လႆႈလွင်ႈယုမ်ႇယမ်ၵမ်ႉထႅမ်တီႈၵူၼ်းၼုမ်ႇ ၼမ်လိူဝ်ပိူၼ်ႈ မီး 68% ၼႆ – ၸုမ်းၾၢႆႇၶူၼ်ႉၶႂႃႇ Blue Shirt Initiative (BSI) ပိုၼ်ၽၢဝ်ႇဝႆႉၼင်ႇၼႆ။

ၸုမ်း Blue Shirt Initiative (BSI) လႆႈဢဝ်တၢင်းႁူဝ်ၶေႃႈ ဢၼ်ဝႃႈ -“လွင်ႈၵူၼ်းၼုမ်ႇယုမ်ႇယမ် ၼိူဝ်မုၵ်ႉၸုမ်းလႄႈ ၽူႈဢွၼ်ႁူဝ်” ၼႆသေ ၵဵပ်းသဵၼ်ႈမၢႆ တွင်ႈထၢမ်ၵၢင်ၸႂ်ၵူၼ်း ၼုမ်ႇဝႆႉ ၵဵဝ်ႇလူၺ်ႈၼႂ်းၶၢဝ်းတၢင်း ပၢင်တိုၵ်းၶၢဝ်းႁွင် (ၼူၺ်ႇဢူးတေႃႇလၢၼ်ႇယေး) ႁိုင်မႃးၶၢဝ်းတၢင်း 4 ပီပၢႆ လႄႈ ဢိင်ၼိူဝ်ၵၢၼ်မိူင်း ဢၼ်ပဵၼ်ယူႇ ၼႂ်းမိူင်းမၢၼ်ႈယၢမ်းလဵဝ်”- ဝႃႈၼႆ။

ၼႂ်းၼၼ်ႉ ၸႅၵ်ႇၽႄဝႆႉသွင်တွၼ်ႈ။ မုၵ်ႉၸုမ်း ဢမ်ႇၼၼ် ၽူႈဢွၼ်ႁူဝ် ဢၼ်ၵူၼ်းၼုမ်ႇယုမ်ႇယမ်တမ်းၸႂ်လႄႈ ဢၼ်ဢမ်ႇမီးလွင်ႈယုမ်ႇယမ်။

ၼႂ်းၼၼ်ႉ ၸုမ်းလူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ (NUG) ယူႇဝႆႉၾၢႆႇဢၼ်ၵူၼ်းမိူင်းယုမ်ႇယမ် မီး 48%၊ ၵူၼ်းၼုမ်ႇၸိူဝ်းယုမ်ႇယမ်ၼိူဝ် ၸုမ်းသိုၵ်း PDF ၸိူဝ်းယူႇဝႆႉၾၢႆႇတႂ်ႈ NUG ၵုမ်းၵမ် ၼၼ်ႉသမ်ႉမီး 57% ဝႃႈၼႆ။

ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇတႄႉ ယူႇဝႆႉၼႂ်းၾၢႆႇ ဢၼ်ၵူၼ်းၼုမ်ႇ ဢမ်ႇမီးလွင်ႈယုမ်ႇယမ် မီးထိုင် 80%။ ၵူၼ်းၼုမ်ႇ ၸိူဝ်းဢမ်ႇမီးလွင်ႈယုမ်ႇယမ်ၼိူဝ် တပ်ႉသိုၵ်းမၢၼ်ႈသမ်ႉ မီး 77% ၼႆယဝ်ႉ။

ၼႂ်းသဵၼ်ႈမၢႆတွင်ႈထၢမ်ၵၢင်ၸႂ်ၵူၼ်းၼုမ်ႇၼၼ်ႉ ပႃးဝႃႈ တၢင်းႁၼ်ထိုင်ၼိူဝ် ၸုမ်းသိုၵ်းဢူၺ်းလီပွတ်းႁွင်ႇ 3 ၸုမ်းလႄႈ သိုၵ်းဝႃႉ (UWSA) ။ ၵူၼ်းၼုမ်ႇၸိူဝ်းမီးလွင်ႈယုမ်ႇယမ်ၼိူဝ်ၶဝ် 4 ၸုမ်း ၼႆႉသမ်ႉမီး 31% ၼႆယဝ်ႉ။

ၽိုၼ်လိၵ်ႈႁၢႆးငၢၼ်းဢၼ်ၼႆႉ ၵဵပ်းမၢႆဝႆႉတႄႇဢဝ် ၼႂ်းဝၼ်းတီႈ 21 ထိုင် ဝၼ်းတီႈ 25 (ၶၢဝ်းတၢင်း 5 ဝၼ်း) လိူၼ်မၢတ်းၶျ် ပီ 2025 ။ လႆႈတွင်ႈထၢမ်ၵၢင်ၸႂ်ၵူၼ်းၼုမ်ႇ 3,128 ၵေႃႉ ၼႂ်း 237 ၸႄႈဝဵင်းၼႆ – ၸုမ်းBSI ပိုၼ်ၽၢဝ်ႇဝႆႉၼင်ႇၼႆ။

ဢၢင်ႈဢိင် – BBC