ၸဝ်ႈၸၢင်းတူၼ်ၼိုင်ႈ ယူႇဝဵင်းယႂႃႇငၢၼ်ႇၸိုင်ႈတႆးပွတ်းၸၢၼ်း ၵိုင်ႉၵၢင်ႉႁၢႆၵႂႃႇလႆႈၶၢဝ်းတၢင်း 10 ဝၼ်းပၢႆယဝ်ႉ ပႆႇႁၼ်ၶိုၼ်း ပဵၼ်ၽႂ်တီႉၵႂႃႇ – ႁၢႆၵႂႃႇမီးလႂ် ၽႂ်ပႆႇႁူႉငိူၼ်ႈငဝ်ႈမၼ်း – ဝႃႈၼႆ။
မုၼ်ၸဝ်ႈဢၼ်ႁၢႆၵႂႃႇၼႆႉ ဢႃယုမီးၸမ် 60 ပီယဝ်ႉ။ မၼ်းၸဝ်ႈပဵၼ်ၵူၼ်းဝၢၼ်ႈ တပိၼ်ႇပျေႃႇ ဝဵင်းယႂႃႇငၢၼ်ႇ။ ၸင်ႇႁႃၼုင်ႈသၢင်ႇၵၢၼ်းသေမႃးယူႇတီႈဝတ်ႉၵျွင်း လႆႈ 6 ပီၵူၺ်း ၊ ဝၢႆးမၼ်းၸဝ်ႈႁၢႆယဝ်ႉ သိုၵ်းမၢၼ်ႈထႅမ်ႁႅင်းသိုၵ်းၶဝ်ႈမႃးတူင်ႉၼိုင်ၼႂ်းဝၢၼ်ႈၵူႈဝၼ်း-ၼႆ ၼၢင်းယိင်း ၵူၼ်းပိုၼ်ႉတီႈဝဵင်းယႂႃႇငၢၼ်ႇလၢတ်ႈၽူႈတွႆႇႁွၵ်ႈ ၼင်ႇၼႆ။
“မုၼ်ႇၸဝ်ႈပႃးၼၼ်ႉ မၼ်းၸဝ်ႈပဵၼ်သိုၵ်းမၢၼ်ႈထၢၵ်ႈ။ လႆႈႁူႉဝႃႈ မီးလွင်ႈၵပ်းသိုပ်ႇၸူးၵၼ် တင်း သိုၵ်းမၢၼ်ႈယူႇတႃႇသေႇ။ ၵူၼ်းၼုမ်ႇပိုၼ်ႉတီႈတႄႉလၢတ်ႈဝႃႈမၼ်းၸဝ်ႈပၼ်ၶၢဝ်ႇၸူးသိုၵ်းမၢၼ်ႈၼႆသေ ဢမ်ႇပေႃးလႆႈၸႂ်မၼ်းၸဝ်ႈ။ ၵူၺ်းၵႃႈပဵၼ်ၸုမ်းလႂ်တီႉမၼ်းၸဝ်ႈၵႂႃႇတႄႉဢမ်ႇႁူႉ။ တၼ်းမႃးတီႉၵႂႃႇ ဝၼ်းလႂ်တႄႉတႄႉၵေႃႈဢမ်ႇတၼ်းႁူႉ။ ၵႃးမုၼ်ၸဝ်ႈတီႈၵျွင်းၼၼ်ႉၵေႃႈၵွႆႇဝႆႉ”- ဝႃႈၼႆ ။
မုၼ်ၸၢင်းၸဝ်ႈပႃးၼႆႉႁၢႆၵႂႃႇ ၸဵမ်မိူဝ်ႈႁၢင်လိူၼ် ၵျႃၼ်ႊ ။ တေႃႇထိုင် ဝၼ်းမိူဝ်ႈၼႆႉ ၶၢဝ်းတၢင်းၽၢၵ်ႇလိူၼ်ယဝ်ႉ ၽႂ်ၵေႃႈ ပႆလႆႈတၢင်းၵပ်းသိုပ်ႇမၼ်းၸဝ်ႈ။
ဝၢႆးမၼ်းၸဝ်ႈႁၢႆဝၼ်းသွင်ဝၼ်းၵူၺ်း သိုၵ်းမၢၼ်ႈဢဵၼ်ႁႅင်း 50 ပၢႆ ၶဝ်ႈမႃးတူင်ႉၼိုင်ၼႂ်းဝၢၼ်ႈတပိၼ်ႇပျေႃႇ ။ သိုပ်ႇၶိုၼ်ႈၵႂႃႇတၢင်းဝၢၼ်ႈတၽၢၼ်းပိၼ်ႇ ၊ ဝၢၼ်ႈလွႆငိုၼ်းၸိူဝ်းၼႆႉထႅင်ႈ – ၵူၼ်းပိုၼ်ႉတီႈလၢတ်ႈၼင်ႇၼႆ။
ၽွင်းၶဝ်ႈဝၢၼ်ႈမႃးၼၼ်ႉၵေႃႈသိုၵ်းမၢၼ်ႈ ဢဝ်ရူတ်ႉၵႃးၵူၼ်းဝၢၼ်ႈၸႂ်ႉ၊ ဢဝ်တၢင်းၵိၼ်တၢင်းယမ်ႉလႄႈ ၵႆႇလဝ်ႈၶဝ်ႈၼိူဝ်ႉၼႂ်းႁၢၼ်ႉတၢင်းၵိၼ်ၵူၼ်းဝၢၼ်ႈ လူၺ်ႈဢမ်ႇၸၢႆႇၵႃႈၸၢႆႇႁူဝ်သင်။ ၵူၼ်းဝၢၼ်ႈၵေႃႈဢမ်ႇၸၢင်ႈႁဵတ်းႁိုဝ် ပဵၼ်ဢၼ်ယၢပ်ႇၵိၼ်းၶၢၼ်ၸႂ်တႄႉတႄႉ ဝႃႈၼႆ။
ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ပေႃးၶဝ်ထူဝ်းသိုၵ်းၶဝ်ႈဝၢၼ်ႈမႃး ၶဝ်ဢဝ်တၢင်းၵိၼ်ၵူၺ်းဢမ်ႇၵႃႈႁိုဝ်၊ ၶဝ်တီႉၺွပ်းၵူၼ်းၸၢႆးၼႂ်းဝၢၼ်ႈသေ ထဵတ်ႈထဵတ်ႈထၢမ်ထၢမ်ပႃး။ ၶဝ်ၶႂ်ႈလႆႈ ၶႂ်ႈၵိၼ်သင်ၵေႃႈၸႂ်ႉၵူၼ်းဝၢၼ်ႈႁႃပၼ်။ ရူတ်ႉၵႃးၵေႃႈၸႂ်ႉၵူၼ်းဝၢၼ်ႈထႅမ် ၼမ်ႉမၼ်းပၼ်သေ ဢဝ်ၵႂႃႇၸႂ်ႉ ၵႂႃႇမီးယူႇတီႈလႂ်ၵေႃႈဢမ်ႇႁူႉ တေႃႇထိုင်ယၢမ်းလဵဝ် ပႆႇမႃးသူင်ႇၶိုၼ်းၸဝ်ႈမၼ်း။ ၵႂႃႇၵႂႃႇမႃးမႃး ၶဝ်ႈၶဝ်ႈဢွၵ်ႇဢွၵ်ႇဝၢၼ်ႈယူႇၵူႈဝၼ်းယဝ်ႉ ”- ဝႃႈၼႆ ။
ယၢမ်းလဵဝ် တီႈဝဵင်းယႂႃႇငၢၼ်ႇ သိုၵ်းမၢၼ်ႈ ၵႆႉထူဝ်းသိုၵ်းၶဝ်ႈၼႂ်းဝၢၼ်ႈ ပၵ်းပၢင်သဝ်းဝႆႉ တၢင်းၶဝ်ႈဢွၵ်ႇဝဵင်း ၵူတ်ႇထတ်းၵူၼ်းဝၢၼ်ႈၶဝ်ႈ/ဢွၵ်ႇ ႁၢဝ်ႈႁႅင်း။ တေၵႂႃႇႁဵတ်းၵၢၼ်ၼႂ်းသူၼ်ၼႂ်းႁိူၵ်ႈၵေႃႈပဵၼ်ဢၼ်ယၢပ်ႇၽိုတ်ႇ ဢမ်ႇမီးလွင်ႈႁူမ်ႇလူမ်ႈ ဝႃႈၼႆ။
မိူၼ်ၼင်ႇၼႆ ၼႂ်းလိူၼ် ၵျူႊလၢႆႊ ဝၼ်းတီႈ 2 ယၢမ်းၵၢင်ၶမ်ႈ 8 မူင်း ၽွင်းသိုၵ်းမၢၼ်ႈ ထႅမ်ႁႅင်းသိုၵ်း ၶဝ်ႈၾၢႆႇႁွင်ႇဝဵင်းယႂႃႇငၢၼ်ႇၼၼ်ႉ ၵူတ်ႇထတ်း တီႉၺွပ်းလုၵ်ႈႁဵၼ်းၵႂႃႇ 2 ၵေႃႉ ထိုင် ဝၼ်းတီႈ 3 လိူၼ်ၵျူႊလၢႆႊ ၸင်ႇပွႆႇပၼ်ၶိုၼ်း ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ