ၵူၼ်းဢၼ်ဝူၼ်ႉဝႃႈ ၵူဝ်လႆႈႁွတ်ႈထိုင်ဝၼ်းၸၼ် ၼႆၼၼ်ႉ ဢမ်ႇၸႂ်ႈဝႃႈ မီးၸဝ်ႈၵဝ်ႇၵေႃႉလဵဝ် ၵူၺ်း။ ပေႃးမႃး ဝူၼ်ႉတူၺ်းၸိုင် ဝၼ်းၸၼ်ၼႆႉ ပဵၼ်ဝၼ်းဢၼ်တေလႆႈၵႂႃႇႁဵတ်းၵၢၼ်၊ တေလႆႈၶိုၼ်ႈလုမ်း ၶိုၼ်ႈႁူင်းႁဵၼ်းၶိုၼ်း။ တႃႇတေႁွတ်ႈထိုင်ၶိုၼ်း ဝၼ်းလိုဝ်ႈထႅင်ႈ ၵမ်းၼိုင်ႈ ၼၼ်ႉ တေလႆႈ ႁဵတ်းၵၢၼ်ထႅင်ႈ/ပႂ်ႉထႅင်ႈပဵၼ် 5 ဝၼ်းၵွၼ်ႇ။ ၵွပ်ႈၼႆ ဝၼ်းသဝ်/ဝၼ်းတိတ်ႉၼႆႉ မိူၼ်ၼင်ႇ ဢမ်ႇ တၼ်းလႆႈ  လိုဝ်ႈႁိူဝ်ႉသင်လီလီသေ သုတ်းသဵင်ႈၵႂႃႇ။ ပေႃးၼၼ် ထုၵ်ႇလီၵႄႈလိတ်ႈ လွင်ႈ ၸႂ် ဢမ်ႇၶႂ်ႈၵႂႃႇ ႁဵတ်းၵၢၼ် ၼႂ်းဝၼ်းၸၼ်ၼၼ်ႉ ၸိူင်ႉႁိုဝ်?

ပေႃးၸမ်တေထိုင် ဝၼ်းၸၼ်ၼႆႉ ၸွင်ႇဢွၼ်ၵၼ်ပဵၼ်ၼႆၽွင်ႈႁိုဝ်

ပေႃးမီးၸႂ်ၵူဝ် ဢမ်ႇၶႂ်ႈႁႂ်ႈႁွတ်ႈထိုင်ဝၼ်းၸၼ်ၼႆ တေႁွင်ႉဝႃႈ Monday blues ။ ပွင်ႇဝႃႈ ပၼ်ႁႃ ၼႆႉ ၾၢင်ႁၢင်ႈမၼ်းၶႂ်ႈငၢႆးၵၼ်တင်း တၢင်းပဵၼ်ထၢတ်ႈၸႂ်တူၵ်း ၊ တၢင်းပဵၼ် မေႃမႆႈၸႂ်ၼမ်လူၼ်ႉ ပူၼ်ႉတီႈ ၸိူဝ်းၼႆႉ။ 

မိူၼ်ၼင်ႇ ပေႃးႁွတ်ႈထိုင်မႃး ၼႂ်းၶမ်ႈဝၼ်းဢႃးတိတ်ႉၼၼ်ႉၼႆ –

• တေၶီငဝ်
• ဢူၼ်ႈဢွၼ်ႇ မိူၼ်ဢမ်ႇမီးႁႅင်း
• ၸႂ်လမ်/ၸႂ်ပွတ်းငၢႆႈ
• မႆႈၸႂ်ဝႆႉထႃႈ တေႁဵတ်းႁိုဝ်ၶၢမ်ႈပူၼ်ႉႁႂ်ႈယဝ်ႉၵႂႃႇၼိုင်ႈဝူင်ႈ
• ဢမ်ႇလီယူႇလီသဝ်း
• ဢမ်ႇၶႂ်ႈၵိၼ်ၶႂ်ႈယႅမ်ႉ
• ၼွၼ်းဢမ်ႇလပ်း
• တူဝ်ၶိင်းၸဵပ်းမူၺ်ႈ
• ႁူဝ်ၶႆႈ ၊ ႁူဝ်တႃၶိုၼ်ႈ
• သေလၢႆၶိုၼ်း ဝၼ်းသဝ်ဝၼ်းတိတ်ႉ ဢၼ်သဵင်ႈယဝ်ႉၵႂႃႇ ၸိူဝ်းၼႆႉႁွင်ႉဝႃႈ Monday blues။

ၵွပ်ႈသင်လႄႈ ၶၢၼ်ႉၵႂႃႇႁဵတ်းၵၢၼ် ၼႂ်းဝၼ်းၸၼ်

ၵူၼ်းၵမ်ႈၼမ် တေဢွၼ်ၵၼ်ဝႃႈ ပေႃးလႆႈႁဵတ်းၵၢၼ် ဢၼ်ၸဝ်ႈၵဝ်ႇႁၵ်ႉ/ဢၼ်ၸဝ်ႈၵဝ်ႇ လႆႈၸႂ်ၼႆ မီးတၢင်းသိူဝ်းၸႂ်ၼႆယူႇ ။ ၵူၺ်းၵႃႈ မၢင်ၸိူဝ်းၵေႃႈ ႁဵတ်းၵၢၼ်ယူႇသေတႃႉ ဢမ်ႇမီး တၢင်း သိူဝ်းၸႂ် ၼႂ်းၼႃႈၵၢၼ်ဢၼ်ၸဝ်ႈၵဝ်ႇႁဵတ်း။ သင်တီႈႁဵတ်းၵၢၼ် မီးလွင်ႈၶွင်ႈၶမ်ၼမ် ၊ မီးႁႅင်းဢီး ၼမ်ၸိုင် ၵႂႃႇႁဵတ်းၵၢၼ်ယူႇသေတႃႉ ၸႂ်တေဢမ်ႇၸိုၼ်ႈပၢင်ႇလႆႈ။

ပိူင်လူင်မၼ်း ၵူၼ်းၸိူဝ်းႁဵတ်းၵၢၼ် 5 ဝၼ်းသေ လႆႈလိုဝ်ႈဝၼ်းသဝ် ဝၼ်းတိတ်ႉၼၼ်ႉ ယိုင်ႈ ၶႅၼ်းၵႆႉပဵၼ် Monday blues။ ၵူၺ်းၵႃႈ ၽူႈလူင်ႉလႅၼ်ႇ ၵမ်ႈၽွင်ႈၵေႃႈ သမ်ႉလၢတ်ႈဝႃႈ Monday blues ၼႆႉဢမ်ႇၸႂ်ႈဝႃႈပဵၼ်မႃးယွၼ်ႉၵၢၼ်ဢၼ်လဵဝ်ၵူၺ်း။ ယွၼ်ႉဝႃႈၵၢၼ်တုမ်ႉတွပ်ႇၼိူဝ် လွင်ႈ ၼၵ်းၸႂ်/ၶမ်ၸႂ်ၵူၼ်းႁဝ်း ၵေႃႉၼိုင်ႈလႄႈၵေႃႉၼိုင်ႈဢမ်ႇမိူၼ်ၵၼ်။ ပွင်ႇဝႃႈတႄႉၵေႃႈ သင်ၵူၼ်း ၵေႃႉၼိုင်ႈ ဢမ်ႇမီးတၢင်း သိူဝ်းၸႂ် ၼႂ်းၼႃႈၵၢၼ်တႄႉတႄႉၸိုင် ဢမ်ႇၵွမ်ႉၵႃး ဝၼ်းၸၼ် ဝၼ်းလဵဝ် ၵူၺ်း ၊ ဝၼ်း ၵူႈဝၼ်းၼႆႉ တိုၼ်းတေပဵၼ် Monday blues ယူႇ။

ၵူၼ်းၸိူဝ်းပဵၼ် Monday blues ၼႆႉ ပေႃးပဵၼ်ဝၼ်းၸၼ်ၼႆ ၸႂ်ၶဝ်တေတိူဝ်းသုၵ်ႉသၢၵ်ႉႁႅင်း ။ ႁဵတ်းၼၼ်သေ ၸႂ်တေၸိုၼ်ႈပၢင်ႇမႃးၶိုၼ်းၵမ်းလွႆးလွႆး ။ ပေႃးပဵၼ်ဝၼ်းသုၵ်းတႄႉ ပဵၼ်ဝၼ်း ဢၼ်ၶဝ် မီးတၢင်းသိူဝ်းၸႂ်လိူဝ်ပိူၼ်ႈ။ ယွၼ်ႉၶဝ်ဝူၼ်ႉဝႃႈ ၶၢဝ်းယၢမ်းၼႂ်းဝၼ်းလိုဝ်ႈၼႆႉ ၶဝ်ၶႂ်ႈ ႁဵတ်းသင်ၵေႃႈ ဢဝ်ၸႂ်ၶဝ်ဝႃႈၵူၺ်း  ဢမ်ႇဝႃႈ တေၼွၼ်းလိုၵ်းလုၵ်ႉလႃႈ ၊ ဢွၵ်ႇဢႅဝ်ႇလႄႇ တၢင်း ၼွၵ်ႈၸိူဝ်းၼႆႉ ဢမ်ႇမီးၵူၼ်းတေမႃးပႂ်ႉဝႃႈသင်။

ၵူၺ်းၵႃႈ ၾၢင်ႁၢင်ႈဢၼ်ႁဵတ်းႁႂ်ႈပဵၼ်မႃး Monday blues ၼႆႉၵေႃႈ ၵေႃႉၼိုင်ႈလႄႈ ၵေႃႉၼိုင်ႈ တေမီးလွင်ႈပိူင်ႈၵၼ်ဢိတ်းဢွတ်း။

တေႁဵတ်းႁိုဝ်ၵႄႈလိတ်ႈ လွင်ႈဢမ်ႇၶႂ်ႈၵႂႃႇႁဵတ်းၵၢၼ် ၼႂ်းဝၼ်းၸၼ်

ဝၼ်းၸၼ်ၼႆႉ ဢမ်ႇၶႂ်ႈႁႂ်ႈမၼ်းႁွတ်ႈမႃးထိုင်ၼႆသေတႃႉၵေႃႈ  တိုၼ်းတေဢမ်ႇဝႄႈလွတ်ႈလႆႈ ။ ၵွပ်ႈၼႆ ၵုမ်ႇၼင်ႈငဝ် ဝူၼ်ႉၼမ်ၶမ်ၸႂ်ယူႇၵေႃႈ  ဢမ်ႇပႆႇယဝ်ႉ။ ၼင်ႇႁိုဝ် တေပဵၼ်ဝၼ်းၸၼ် ဢၼ်မီးတၢင်းသိူဝ်းၸႂ်ၼၼ်ႉ တေလႆႈႁဵတ်းႁိုဝ်  ?

1. ၵၢၼ်ငၢၼ်း ဢၼ်တေလႆႈႁဵတ်းၵူႈဝၼ်းၼၼ်ႉ ႁႂ်ႈႁဵတ်းၵႂႃႇပုင်ႇမၢၼ်ႇ

ၵမ်ႈၼမ်တႄႉ  ပေႃးပဵၼ်ဝၼ်းလိုဝ်ႈၼႆႉ တေဢမ်ႇမီးဝႆႉၶပ်းမၢႆ တႅတ်ႈတေႃး မိူၼ်ၼင်ႇ ဝၼ်းႁဵတ်းၵၢၼ်။ ပေႃးပဵၼ် ဝၼ်းႁဵတ်းၵၢၼ်တႄႉ ၶၢဝ်းလႂ်တေႁဵတ်းသင်ၼႆ တိုၼ်းမီးဝႆႉ   ၵမ်း လဵဝ် ယူႇယဝ်ႉ။

ပေႃးပဵၼ်ဝၼ်းလိုဝ်ႈၵၢၼ်သမ်ႉ ၵမ်ႈၼမ် တေလုၵ်ႉလႃႈ ၊ တေဢွၵ်ႇၵႂႃႇဢႅဝ်ႇလႄႇတၢင်း ၼွၵ်ႈ ၸွမ်းဢူၺ်းၵေႃႉ ၊ မၢင်ၸိူဝ်းဢမ်ႇၸၢင်ႈႁဵတ်းသင်ၵေႃႈ တေသိုပ်ႇၼွၼ်းၶူတ်းၼႂ်း ၽႃႈသေ တူၺ်းၾူၼ်း(မိုဝ်းထိုဝ်) ၊ တူၺ်းၸိူင်း။ ဢမ်ႇလူဝ်ႇလႆႈႁဵတ်းသင်တႄႉတႄႉလႄႈ မိူၼ်ၶႂ်ႈၸပ်းၶၢၼ်ႉသေ ဢဝ်တၢင်းယၢမ်ႈၵူၼ်းလူႉ ။

ႁဵတ်းၼႆသေ ပေႃးႁွတ်ႈထိုင်ၶိုၼ်းဝၼ်းၸၼ်သမ်ႉ တေလႆႈယူႇၶိုၼ်း ၼႂ်းၶွပ်ႇၼႂ်းပိူင်လႄႈ ၵမ်ႈၼမ် တေဢွၼ်ၵၼ်သုၵ်ႉၸႂ်။ ၵွပ်ႈၼၼ်ႉလႄႈ ၼင်ႇႁိုဝ်တေဢမ်ႇပဵၼ်ၼၼ် ပဵၼ် ဝၼ်းလိုဝ်ႈသေတႃႉ လီမီးဝႆႉၶပ်းမၢႆသေဢၼ်ဢၼ်ယူႇ။ တီႈဢေႇသုတ်း ၶၢဝ်းလုၵ်ႉၶၢဝ်း ၼွၼ်းႁႂ်ႈမႅၼ်ႈၸွမ်းၶၢဝ်းယၢမ်း။

• ယႃႇႁဵတ်းၵၢၼ်ၼႂ်းဝၼ်းလိုဝ်ႈ

ၼႂ်းဝၼ်းလိုဝ်ႈၼၼ်ႉ သင်ဢမ်ႇလိုဝ်ႈႁိူဝ်ႉလီလီသေ ၵုမ်ႇႁဵတ်းၵၢၼ်ယူႇၸိုင် မိူၼ်ၼင်ႇဝႃႈ ဢမ်ႇတၼ်းႁူႉသင်သေ ၵမ်းၼိုင်ႈၵူၺ်း ႁွတ်ႈၵႂႃႇထိုင်ၶိုၼ်းဝၼ်းၸၼ်ထႅင်ႈ။ ၵွပ်ႈၼၼ် ၶၢဝ်းလိုဝ်ႈၵေႃႈလိုဝ်ႈ ၊ ၶၢဝ်းႁဵတ်းၵၢၼ်ၵေႃႈ ႁႂ်ႈႁဵတ်းၵၢၼ်တဵမ်တီႈ ။

• ႁႂ်ႈၶၢဝ်းလုၵ်ႉၶၢဝ်းၼွၼ်း မၢၼ်ႇမႅၼ်ႈၸွမ်းၶၢဝ်းယၢမ်း

မိူၼ်ၼင်ႇ လၢတ်ႈမႃးမိူဝ်ႈၸဝ်ႉၼၼ်ႉ ပေႃးပဵၼ်ဝၼ်းလိုဝ်ႈၼႆ ၶၢဝ်းၼွၼ်း ၊ ၶၢဝ်းလုၵ်ႉ တေတူၵ်းလိုၼ်း။ ၵွပ်ႈၼၼ် သင်ပဵၼ်လႆႈတႄႉ ႁႂ်ႈလုၵ်ႉ/ၼွၼ်း မိူၼ်ၼင်ႇဝၼ်းႁဵတ်းၵၢၼ် ။ သင်ၶႂ်ႈတူၵ်းလိုၼ်းၼႆၵေႃႈ ယႃႇႁႂ်ႈတူၵ်းလိုၼ်းလိူဝ် 1 – 2 ၸူဝ်ႈမူင်း ။

သင်ၶၢဝ်းယၢမ်း ၼွၼ်းလုၵ်ႉ မၢၼ်ႇမႅၼ်ႈလႄႈ ပဵၼ်ၾိင်ႈယၢမ်ႈၵႂႃႇၸိုင် တေဢမ်ႇလႆႈၵူဝ် ဝႃႈ တေထိုင်ဝၼ်းၸၼ်လႄႈ တေလႆႈလုၵ်ႉၸဝ်ႉၼႆယဝ်ႉ။

• ႁဵတ်းၵၢၼ်လူင်ႈၼႃႈဝႆႉထႃႈ ဢိတ်းဢိတ်း

သင်ပဵၼ်လႆႈတႄႉ ဝၼ်းလိုဝ်ႈၼႆႉ ဢမ်ႇႁဵတ်းၵၢၼ်သင်သေ လိုဝ်ႈႁိူဝ်ႉတဵမ်တီႈၼႆႉ လီလိူဝ် သေပိူၼ်ႈယဝ်ႉ။ ၵူၺ်းၵႃႈ သင်ဢမ်ႇၶႂ်ႈႁႂ်ႈၵၢၼ်ၵႂႃႇၵွင်သႂ်ႇ တီႈၼႂ်းဝၼ်းၸၼ်တႄႉ ၵၢၼ် ဢၼ်လမ်ႇလွင်ႈ ဢမ်ႇႁဵတ်းဢမ်ႇပဵၼ်ၵမ်ႈၽွင်ႈၼၼ်ႉ လီလႆႈႁဵတ်းဝႆႉထႃႈ ၼႂ်းၶမ်ႈဝၼ်း ဢႃးတိတ်ႉၼၼ်ႉယူႇ။

ပေႃးၼၼ်ၸိုင် သင်ထိုင်မႃးဝၼ်းၸၼ် ၵၢၼ်တေဢမ်ႇၼမ်သေ တေဢမ်ႇပေႃးလႆႈသုၵ်ႉ ၸႂ်ႁႅင်း။

• ယႃႇပေႁၢင်ႈႁႅၼ်း ႁဵတ်းၵၢၼ်ၼမ်ႁႅင်းပူၼ်ႉ ၼႂ်းဝၼ်းၸၼ်

ၼႂ်းၼိုင်ႈဝူင်ႈၼႆႉ ဝၼ်းၸၼ်ပဵၼ်ဝၼ်းဢၼ်ၶၢၼ်ႉ ႁဵတ်းၵၢၼ်လိူဝ်သေပိူၼ်ႈသုတ်း။ ပေႃး တေလၢတ်ႈဝႃႈ ပဵၼ်ဝၼ်းဢၼ်ၵၢၼ်ၼမ်လိူဝ်ပိူၼ်ႈသုတ်းၼႆၵေႃႈ တေဢမ်ႇၽိတ်း။ ၵၢၼ်ငၢၼ်းဢၼ်ၶင်ႉၶမ်ဝႆႉသေ လႆႈၵိုတ်းလိုဝ်ႈဝႆႉၼႂ်းဝၼ်းလိုဝ်ႈၼၼ်ႉ တေမႃးၶွၼ်ႈတုမ် သႂ်ႇတီႈၼႂ်းဝၼ်းၸၼ်။ ၵွပ်ႈၼၼ် လွင်ႈသုၵ်ႉၸႂ်ၵေႃႈတေတိူဝ်းၼမ်လိူဝ်တၢင်ႇဝၼ်း။

သင်ပဵၼ်လႆႈတႄႉ ၵၢၼ်ငၢၼ်းဢၼ်ဢမ်ႇလမ်ႇလွင်ႈႁႅင်းၼၼ်ႉ ႁႂ်ႈသုတ်ႉၶၢႆႉၵႂႃႇႁဵတ်း တၢင်ႇဝၼ်း ၊ ၼႂ်းဝၼ်းၸၼ်တႄႉ ႁဵတ်းၵၢၼ်မဝ်မဝ်ၵူၺ်းၵွၼ်ႇ။

• ႁဵတ်းႁႂ်ႈပဵၼ်ဝၼ်းၸၼ် ဢၼ်မီးတၢင်းသိူဝ်းၸႂ်

ပေႃးဝူၼ်ႉဝႃႈ ဝၼ်းၸၼ် တေလႆႈႁဵတ်းၵၢၼ်ၶိုၼ်း ၊ ၵၢၼ်ပဵၼ်ၵေႃႇပဵၼ်ၵွင် ၼႆတေႉ ၸႂ်တိုၼ်းတေသုၵ်ႉသၵ်ႉဢမ်ႇႁၢင်ႉ။ ၵွပ်ႈၼၼ် ႁႂ်ႈလႅၵ်ႈလၢႆႈဝူၼ်ႉတူၺ်းဝႃႈ ဝၼ်းၸၼ်ၼႆႉ တေႁဵတ်းသေလွင်ႈလွင်ႈ ဢၼ်မီးတၢင်းသိူဝ်းၸႂ်။

တူဝ်ယၢင်ႇမၼ်း မိူၼ်ၼင်ႇ ပေႃးလူင်းလုမ်း ၶမ်ႈဝၼ်းၸၼ်ၼၼ်ႉ တေၵႂႃႇၵိၼ်သေ ဢၼ်ဢၼ် ဝၢၼ်ဝၢၼ်၊ ၵႂႃႇမိမ်ႇၼူတ်ႈ Spa ၊ ၼိုင်ႈဝူင်ႈႁဵတ်းတူၺ်းသေမဵဝ်းမဵဝ်း ဢၼ် ဢမ်ႇမိူၼ်ၵၼ်။ တီႈဢေႇသုတ်းတႄႉ တေလႆႈႁႅင်းၸႂ် motivation ယူႇ။

တီႈတႄႉမၼ်းတႄႉ Monday blues ဢၼ်ဝႃႈၼႆႉ ဢမ်ႇၸႂ်ႈတၢင်းပဵၼ်ပၢႆးၸႂ်သင်။ မၼ်း တေၵႆႉပဵၼ်မႃး မိူဝ်ႈၽွင်းလႆႈႁဵတ်းၵၢၼ်သေႁိူဝ်ႉႁႅင်း ၊ ႁဵတ်းၵၢၼ်ယူႇသေ ဢမ်ႇၵျေႃႇၸႂ် သိူဝ်းၸႂ် ၸိူဝ်းၼႆႉၵူၺ်း။ တေႃႈၼင်ႇ ၵူၼ်းၸိူဝ်းဢၼ်ဝႃႈ ႁဵတ်းၵၢၼ်ဢမ်ႇမီး လွင်ႈၶွင်ႈ ၶမ်သင် ၼႆၼၼ်ႉၵေႃႈ ယင်းၸၢင်ႈပဵၼ် Monday blues ယူႇ။ သင်ထိုင် ဝၼ်းၸၼ်သေ လႆႈၼၵ်း ၸႂ်/ႁိူဝ်ႉၸႂ်ႁႅင်းၸိုင် ႁႂ်ႈႁဵတ်းတူၺ်းၼင်ႇ လွၵ်းလၢႆးဢၼ်လၢတ်ႈ ၼႄမႃးၾၢႆႇ ၼိူဝ်ၼၼ်ႉ ။ သင်ငဝ်းလၢႆးႁၢင်ႈႁၢႆႉႁႅင်းတႄႉ ထုၵ်ႇလီၵႂႃႇ ဢုပ်ႇ ဢူဝ်းတီႈမေႃယႃ ယူႇ။

ပိၼ်ႇၽႃႇသႃႇဢဝ်မႃးတီႈ-Hello Sayarwon