ႁူဝ်လိူၼ်ၵျူႊလၢႆႊ ဝၼ်းတီႈ 2 ၼႆႉမႃး သိုၵ်းမၢၼ်ႈ သူင်ႇလိၵ်ႈၸူး ၵူၼ်းမိူင်းၸိူဝ်းယူႇၶၢင်ႈတၢင်းရူတ်ႉၾႆး ဢၼ်မီးၼႂ်းပွၵ်ႉၽႃမူၼ်း- တူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ  ဝႃႈပဵၼ်လႅၼ်လိၼ် တႃႈရူတ်ႉၾႆးၼႆသေ ၸႂ်ႉၶၢႆႉပၢႆႈတႃႇလင်ႁိူၼ်း ၸမ် 100  ႁႂ်ႈၶၢႆႉယဝ်ႉၼႂ်းၶၢဝ်းတၢင်း 15 ဝၼ်း  ဝႃႈၼႆ ။ 

ႁိူၼ်းဢၼ် ဢမ်ႇလွတ်ႈတင်းသဵၼ်ႈတၢင်းရူတ်ႉၾႆးၼၼ်ႉ မီးၸမ် 100 လင်။  ၼႂ်းၼၼ်ႉတေပႃး ႁိူၼ်း2 ၸၼ်ႉ ၊ ႁၢၼ်ႉတၢင်းၵိၼ် ၸိူဝ်းၼႆႉပႃး ။ ယၢမ်းလဵဝ် ၸႂ်ႉၵူၼ်းပိုၼ်ႉတီႈ ဢဝ်တၢင်း ၵႃးထုၺ်လိၼ်သေ ၶၢႆႉပၢႆႈဝႃႈၼႆ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ-“ႁိူၼ်း ၸိူဝ်းမီးၸမ် တၢင်းရူတ်ႉၾႆးၼႆႉ ၸႂ်ႉၶၢႆႉမူတ်း ၊ သဵၼ်ႈတၢင်းတီႈလဵၼ်ႈသၵဵၵ်ႉ  ၸိူဝ်းၼႆႉၵေႃႈ ၸႂ်ႉၶၢႆႉ ၊ တလဵဝ် ႁၢၼ်ႉၸိူဝ်းၼႆႉယႃႉယူႇယဝ်ႉ ၊  တိုၼ်းတေလႆႈပၢႆႈပၼ်ယဝ်ႉ ဢမ်ႇပၢႆႈပၼ်ၵေႃႈဢမ်ႇလႆႈ ၊ႁိူၼ်းဢၼ်ၸႂ်ႉၶၢႆႉၼႆႉ မီးၸမ် 100 လင်ဢေႃႈ တင်းၼႆႉ ၊ မၼ်းဢမ်ႇလွတ်ႈၼိူဝ်သဵၼ်ႈတၢင်းရူတ်ႉၾႆးယူဝ်ႉ ၸႂ်ႉၶၢႆႉၼႆႉ”- ဝႃႈၼႆ ။ 

မၼ်းၸၢႆးသိုပ်ႇလၢတ်ႈထႅင်ႈဝႃႈ – တႃႇတေၶၢႆႉဢွၵ်ႇၼၼ်ႉတီႈဝဵင်းတူၼ်ႈတီး  ဢမ်ႇပႆႇပၼ်ႁႅင်းဢီးသေတႃႉ ယၢမ်းလဵဝ် တီႈဝဵင်း ၵၢတ်ႇလေႃႉ ႁိူၼ်းဢၼ်မီးၸမ် သဵၼ်ႈတၢင်းရူတ်ႉၾႆးမွၵ်ႈ 20 ပေႇ ၼၼ်ႉ သိုၵ်းမၢၼ်ႈပၼ်ႁႅင်းဢီး ဢဝ်ၵႃးထူၺ်ႇလိၼ်မႃးထူၺ်ႇယႃႉပႅတ်ႈလႄႈ  ႁဵတ်းႁႂ်ႈၵူၼ်းပိုၼ်ႉတီႈ ယၢပ်ႇၽိုတ်ႇဝႆႉဝႃႈၼႆ ။

လိူဝ်ၼၼ်ႉသိုၵ်းမၢၼ်ႈၸႂ်ႉ ၵူၼ်းၶၢႆၵၢတ်ႇၼႂ်းၵၢတ်ႇမဵဝ်ႉမ ပူတ်းပႅတ်ႈ ဢၼ်မုင်းႁၢၼ်ႉတၢင်းၶၢႆ ၊ ပၼ်ၶေႃႈဢၢင်ႈဝႃႈ  ပူၼ်ႉမႃးၼိူဝ်သဵၼ်ႈတၢင်းၵူၼ်းပႆ   ဝႃႈၼႆ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“တီႈတူၼ်ႈတီးၼႆႉ ၵႆႉၸႂ်ႉႁဵတ်းမဵဝ်းယဝ်ႉမဵဝ်းၼိုင်ႈ ၊ ဢွၼ်တၢင်းၸႂ်ႉလၢႆႈၸိုဝ်ႈႁၢၼ်ႉပဵၼ်လိၵ်ႈမၢၼ်ႈ ၊ယဝ်ႉၵေႃႈ ၸႂ်ႉၵူၼ်းၶၢႆၵၢတ်ႇပူတ်းပႅတ်ႈဢၼ်မုင်း ၊ တလဵဝ်ၵေႃႈသမ်ႉၸႂ်ႉႁိူၼ်းဢၼ်မီးၸမ်သဵၼ်ႈတၢင်း ရူတ်ႉၾႆးၶၢႆႉထႅင်ႈ ၊ ၵူၼ်းၶၢႆတၢင်းၶၢႆ ႁိမ်းတၢင်း တၢင်းလဵပ်ႈဝဵင်းၼၼ်ႉၵေႃႈ ဢမ်ႇပၼ်ၶၢႆၼႆ ၊ ၵူၼ်းမိူင်းလႆႈယၢပ်ႇလၢႆလၢႆလွင်ႈၼႃႇ”- ဝႃႈၼႆ ။

သဵၼ်ႈတၢင်းရူတ်ႉၾႆးတီႈဝဵင်းတူၼ်ႈတီႈၼႆႉ တႄႇႁဵတ်းမႃးမိူဝ်ႈပီ 2021 ဝၢႆးလင် သိုၵ်းမၢၼ်ႈယိုတ်းမိူင်းမႃး ။ လုၵ်ႉတီႈတၢင်း သူၺ်ႇၺွင်ႇ ၊ ဢေးတႃႇယႃႇ ၊ လတ်းၶဝ်ႈဝဵင်းတူၼ်ႈတီး ယဝ်ႉၶဝ်ႈၵႂႃႇတင်ႁူဝ်ပူင်း လႄႈၵႂၢင်းႁူင်းၾႆးမိၼ် မႃးဝႃႈၼႆ ။

မိူၼ်ၼင်ႇၼႆ တႄႇဝၼ်းတီႈ 20-21/3/2025 မႃး ပလိၵ်ႈမၢၼ်ႈ သိုၵ်းမၢၼ်ႈ  ဝႃႈတေႁဵတ်းတႃႈရူတ်ႉၵႃးဢၼ်မႂ်ႇၼႆသေ ယႃႉႁူဝ်ႉ ၊ ယႃႉလၵ်းသဝ် တီႈလိၼ် ၵူၼ်းဝၢၼ်ႈ တၢင်းပွၵ်ႉၽြႃးၽိူၵ်ႇ (ဘုရားဖြူရပ်ကွက်) ပွၵ်ႉၵၢၼ်ႇၵျီး  (ကံကြီး) ၸိူဝ်းမီးႁိမ်းၸၼ်ႉၸွမ် ပုတ်ႉထ တီႈဝဵင်းတူၼ်ႈတီး – လႆႈႁူႉၼင်ႇၼႆ ။