ဝၼ်းတီႈ 02/07/2025 သိုၵ်းမၢၼ်ႈပိုၼ်ၽၢဝ်ႇ ယုၵ်ႉယွင်ႈမွပ်ႈပၼ်ၸၼ်ႉ ၼၢင်းၸိူင်းလႄႈ ၼၢင်းယိင်း ၸိုဝ်ႈလိုဝ်းၼႂ်းမိူင်းႁူမ်ႈတုမ် တႃႇ 153 ၵေႃႉ ပဵၼ်ၼၢင်းယိင်းႁတ်းႁၢၼ်လႄႈ ၵတ်ႉၶႅၼ်ႇၼႂ်းၸိုင်ႈမိူင်း တီႈဝဵင်းၼေႇပျီႇတေႃႇ မိူင်းမၢၼ်ႈထုင်ႉပဵင်း။

ၼႂ်းၼၢင်းယိင်းၸိူဝ်းၼၼ်ႉ ၶဝ်ႈပႃးဝႆႉ တေႃႇၸေႃးမျႃႉရႃႇၸႃႇလိၼ်း ႁူဝ်ပဝ်ႈ ပႃႇတီႇလွတ်ႈလႅဝ်းမိူင်းရၶႅင်ႇ (ALP) ၊ ၵႅမ်ႁူဝ်ပဝ်ႈ တပ်ႉသိုၵ်းလွတ်ႈလႅဝ်းၸိူဝ်ႉၸၢတ်ႈယၢင်းၽိူၵ်ႇ (ၶွင်ႇသီႇၶၵ်ႉၵၢၼ်ငမ်းယဵၼ်) KNLA -PC ၼေႃႇၵပေႃႇထူးလႄႈ ၽူႈၵွၼ်းႁွင်ႈၵၢၼ်/ ပႃႇမွၵ်ႉၶ တွၵ်ႊတိူဝ်ႊ တေႃႇပူဝ်ႇ လႆႈႁပ်ႉသူးႁတ်းႁၢၼ် ၸၼ်ႉဝုၼ်ႇၼၵျေႃႇထိၼ်ႇ။

ၼွၵ်ႈလိူဝ် ၼၢင်းယိင်းၸိူဝ်းလႆႈႁပ်ႉသူး ဝုၼ်ႇၼၵျေႃႇထိၼ်ႇ သၢမ်ၵေႃႉၼၼ်ႉ ယင်းမီးပႃး ႁူဝ်ၼႃႈ ၸုမ်းၼၢင်းယိင်း ပိဝ်ႇၸေႃးထီး တေႃႇတီႇတႃႇယူႉမုၼ်ႇလႄႈ ၽူႈႁွင်ႉၵႂၢမ်း လီႇလီႇၼၢႆႇၵျေႃႇၶဝ် လႆႈႁပ်ႉသူးႁတ်းႁၢၼ် ၼႂ်းၸုမ်းပလိၵ်ႈ ၵူၺ်းဢမ်ႇၵႃး ၼၢင်းယိင်း 150 ပၢႆ လႆႈႁပ်ႉသူးႁတ်းႁၢၼ်ၸွမ်းထႅင်ႈၵွၼ်ႇ။

ၽူႈႁွင်ႉၵႂၢမ်း လီႇလီႇၼၢႆႇၵျေႃႇၼႆႉ မိူဝ်ႈပီ 2023 လိူၼ်ဢေႊပရိူဝ်ႊၼၼ်ႉ ၺႃးမၢပ်ႇၼႄးဝႃႈ ပဵၼ်ၵူၼ်း ပၼ်ၶၢဝ်ႇၾၢႆႇသိုၵ်းမၢၼ်ႈၼႆသေ ၸုမ်းယိပ်းၵွင်ႈၵၢင်ႇၸိူဝ်းတေႃႇသူႈသိုၵ်းမၢၼ်ႈ ငွႆးယိုဝ်းတီႈၾၢႆႇၼႃႈ ႁိူၼ်းတိူၵ်ႈမၼ်းၼၢင်း တီႈၸႄႈဝဵင်းယၼ်ႇၵိၼ်း တိူင်းတႃႈၵုင်ႈ။

ၼၢင်းၸိူင်းၵဝ်ႇၵႄႇ တေႃႇသူၺ်ႇၸိၼ်ႇထၢႆႉ လႆႈႁပ်ႉသူးၾၢႆႇပၢႆးမွၼ်း ၸၼ်ႉၼိုင်ႈ၊ ၼၢင်းၸိူင်းမၢၼ်ႈ ၸူဝ်းမျႅတ်ႉတူႇၸႃႇလႄႈ မေႇတိၼ်ႇၸႃႇဢူးၵေႃႈ လႆႈႁပ်ႉသူး ၵတ်ႉလႅၼ်ႇၼႂ်းလိူင်ႈၶၵ်ႉၵၢၼ်ၵူၼ်း (လူမှုထူးချွန်) ၸၼ်ႉၼိုင်ႈ။

မိူဝ်ႈပူၼ်ႉမႃး ပီ 2022 ၼၼ်ႉ သိုၵ်းမၢၼ်ႈ မွပ်ႈသူးၵတ်ႉလႅၼ်ႇၼႂ်းလိူင်ႈၶၵ်ႉၵၢၼ်ၵူၼ်း (လူမှုထူးချွန်) ပၼ် ၶႅင်ႇတိၼ်းၵျီႇသေတႃႉ တၢမ်တူဝ်ၼၢင်းၸိူင်းဢမ်ႇယွမ်းႁပ်ႉဢဝ်သူးလႄႈ ၾၢႆႇသိုၵ်းမၢၼ်ႈ ယၢမ်ႈယိုတ်း ဢဝ်ၶိုၼ်းသူးၸၼ်ႉၼၼ်ႉယူႇ ဝႃႈၼႆ။

ၵဵဝ်ႇလူၺ်ႈလွင်ႈ သိုၵ်းမၢၼ်ႈ မွပ်ႈပၼ်သူးလူင်ႉလႅၼ်ႇ၊ ၵတ်ႉၶႅၼ်ႇ ၼၢင်းယိင်းၸိုဝ်ႈလိုဝ်းလင် ၼႂ်းမိူင်းႁူမ်ႈတုမ် (မိူင်းမၢၼ်ႈ) ၸိူဝ်းၼႆႉသေ ၽူႈၶၢၼ်ပၢၵ်ႇ တပ်ႉသိုၵ်းလွတ်ႈလႅဝ်း ၵူၼ်းမိူင်း (PLA) တေႃႇၼီႇၼီႇၵျေႃႇ လၢတ်ႈၼႄဝႃႈ – “ႁဝ်းၶႃႈတႄႉ ဢမ်ႇၶႂ်ႈၸိုဝ်ႈလိုဝ်းလႄႈ ဢမ်ႇၶႂ်ႈပဵၼ်ၵူၼ်းၵိုၵ်းပိုၼ်း ၼႂ်းပၢၼ်ၶီႈၶႃႈသိုၵ်းမၢၼ်ႈ။ သူးၸိူဝ်းၼႆႉ ပေႃးမႃးပၼ်ႁဝ်းၵေႃႈ ႁဝ်းဢမ်ႇႁပ်ႉ။ ၶဝ်ၵေႃႈ ဢမ်ႇပၼ်ႁဝ်းၼင်ႇၵဝ်ႇ။ ႁဝ်းၶႃႈၼႆႉ ဢမ်ႇၸႂ်ႈဝႃႈႁဵတ်းၵၢၼ် ယိူင်းဢၢၼ်းတႃႇလႆႈသူးသင်။ ပေႃးၵူၼ်းမိူင်းႁၵ်ႉႁဝ်းၵေႃႈ ပဵင်းပေႃးၸႂ်ယဝ်ႉ။ သူး ဢၼ်လႆႈမႃးယွၼ်ႉႁဝ်းၵႂႃႇယုၵ်ႉယွင်ႈ ၸုမ်းသိုၵ်းၸိူဝ်းၶႃႈႁႅမ်တၢႆလႄႈ ပေႉၵိၼ်လူလၢႆၵူၼ်းမိူင်းၼၼ်ႉတႄႉ မိူၼ်ၵၼ်တင်းဢဝ်ၸိုဝ်ႈသဵင်လႄႈ ၵုင်ႇသိၵ်ႈၶႃႇၸဝ်ႈၵဝ်ႇ လူင်းမိူင်းငရၢႆးထိုင်ၸၼ်ႉဢဝီႇၸိၵူၺ်းဢိူဝ်ႈ”- ဝႃႈၼႆ။

ၼႂ်းပီ 2025 လိူၼ်ၵျူႊလၢႆႊၼႆႉ သိုၵ်းမၢၼ်ႈ ပၼ်သူးဝုၼ်ႇၼၵျေႃႇထိၼ်ႇ 3 ၵေႃႉ၊ ယေးပလ (ရဲဗလ) 65 ၵေႃႉ၊ ယေးၵျေႃႇၸႂႃႇ (ရဲကျော်စွာ) 2 ၵေႃႉ၊ ၾၢႆႇၵတ်ႉလႅၼ်ႇၵၢၼ်ၸတ်းပွင် (စီမံထူးချွန်) ၸၼ်ႉသွင် 2 ၵေႃႉ၊ ၸၼ်ႉသၢမ် 15 ၵေႃႉ၊ ၾၢႆႇၵတ်ႉလႅၼ်ႇ ၼႂ်းၵၢၼ်တူင်ႇဝူင်းၵူၼ်း (လူမှုထူးချွန်) ၸၼ်ႉၼိုင်ႈ 9  ၵေႃႉ၊ ၸၼ်ႉသွင် 4 ၵေႃႉ၊ ၸၼ်ႉသၢမ် 44 ၵေႃႉ၊ သူး ၵတ်ႉလႅၼ်ႇၾၢႆႇသူၼ်ႁႆႈၼႃး 1 ၵေႃႉ၊ ၾၢႆႇၶၵ်ႉၵၢၼ်မၢၵ်ႈမီး 4 ၵေႃႉ၊ ၾၢႆႇပၢႆးမွၼ်း 4 ၵေႃႉ၊ ၾၢႆႇလိၵ်ႈလၢႆး 1 ၵေႃႉ ႁူမ်ႈသဵၼ်ႈ ၼၢင်းယိင်းၸိူဝ်းလႆႈႁပ်ႉသူးၵတ်ႉလႅၼ်ႇ မီးယူႇ 151 ၵေႃႉ။

တႅမ်ႈ – ၽူၺ်းၼုမ်ႇ