ဝၼ်းတီႈ 25/06/2025 ၼႆႉ ၵူၼ်းၼုမ်ႇတႆး လၢႆမူႇလၢႆၸုမ်း ႁူမ်ႈၵၼ် ပိုၼ်ၽၢဝ်ႇၶွတ်ႇၽွတ်ႈ ၶွၼ်ႊၵရႅတ်ႉၵူၼ်းၼုမ်ႇတႆး Dai Youth Congress (DYC) တႃႇတႆးၵူႈတီႈၵူႈၸုမ်းပဵၼ်ၼမ်ႉၼိုင်ႈၸႂ်လဵဝ် ၶွတ်ႇလိူတ်ႈၵၼ်လႆႈဝႃႈၼႆ။

ၸၢႆးလႅင်းပၢင်ႇ ၽူႈၶၢၼ်ပၢၵ်ႇ ၸုမ်းၶွၼ်ႊၵရႅတ်ႉၵူၼ်းၼုမ်ႇတႆး လၢတ်ႈတီႈၽူႈတွႆႇႁွၵ်ႈဝႃႈ – “ပိူင်လူင်မၼ်းတႄႉ ႁဝ်းၶႃႈ ၶႂ်ႈႁဵတ်းႁႂ်ႈၵူၼ်းၼုမ်ႇတႆး ၸုမ်းတူင်ႇၵူၼ်းတႆး ၵူႈတီႈၵူႈလႅၼ် ဢမ်ႇဝႃႈ ၼႂ်းမိူင်းၼွၵ်ႈမိူင်း ၵွင်ႉသၢၼ်ၵၼ်။ၸဵမ်ဢဝ် ၸုမ်းပႃႇတီႇၵၢၼ်မိူင်းၼႂ်းမိူင်းႁဝ်းလႄႈ ၸုမ်းယိပ်းၵွင်ႈၵၢင်ႇၼႂ်းမိူင်းႁဝ်းၸိူဝ်းၼႆႉ ႁႂ်ႈႁူမ်ႈၵၼ် ႁဵတ်းသၢင်ႈ ၵၢၼ်ငၢၼ်းၵႂႃႇလႆႈၼၼ်ႉ ” – ဝႃႈၼႆ။  

တၢင်းယိူင်းဢၢၼ်းသုင်သုတ်းတႄႉ  တေဢဝ်ၸုမ်းၶွၼ်ႊၵရႅတ်ႉၵူၼ်းၼုမ်ႇတႆး DYC ၼႆႉ တင်ႈပဵၼ်လၵ်း ၵႅၼ်ၵၢင်သေ ႁႂ်ႈၶဝ်ႈသူႇလႆႈ ၵူႈမူႇၵူႈၸုမ်းဢၼ်တူင်ႇၼိုင်တႃႇဝၢၼ်ႈမိူင်းတႆး။ ၼႂ်းၸုမ်းဢၼ်ၶွတ်ႇၽွတ်ႈမႂ်ႇၼႆႉ ဢၼ်ၶဝ်ႈႁူမ်ႈသေ ဢိင်ၼိူဝ်လွင်ႈႁူမ်ႇလူမ်ႈလႄႈ ပႆႇဢွၵ်ႇၸိုဝ်ႈဢွၵ်ႇသဵင်ၵေႃႈ မီးဝႆႉၼမ် ဝႃႈၼႆ။

ဢၼ်ဢွၵ်ႇၸိုဝ်ႈသေ ႁူမ်ႈပိုၼ်ၽၢဝ်ႇၸွမ်းၵၼ်ဝႆႉတႄႉ မီးၸုမ်း Tai Students Union TSU ၊ SL & CC universities of Yangon ၊ Global Shan Network – GSN ၊ TYN(မိူင်းထႆး) တႄႇၵႂႃႇၸိူဝ်းၼႆႉ။

ၼႂ်းလိၵ်ႈပိုၼ်ၽၢဝ်ႇၼၼ်ႉတႄႉ ပႃးဝႆႉဝႃႈ – “ ၸုမ်းဢၼ်တင်ႈမႂ်ႇၼႆႉ မီးမူႇပိူင်ဝႆႉဝႃႈ တႃႇသၢၼ်ၶတ်း ပိူင်ၸဝ်ႈဢႃႇၼႃႇ ၊ တႃႇၵေႃႇတင်ႈႁဵတ်းဢွၵ်ႇမႃး မိူင်းႁူမ်ႈတုမ်ၾႅတ်ႊတရႄႊ ၊ တႃႇႁႂ်ႈလႆႈသုၼ်ႇၶူင်သၢင်ႈၵၢမ်ႇၵျၢမ်ႇမႃႇတူဝ်ၵဝ်ႇ ၊ တႃႇၶိုၼ်းမႄးၵေႃႇတင်ႈၾႅတ်ႊတရႄႊမိူင်းတႆး လႄႈ တႄႇဢဝ်ၸုမ်းၼႆႉ ပဵၼ်လၵ်းသေ သၢင်ႈလွင်ႈၽွမ်ႉႁူမ်ႈၸိူဝ်ႈၸၢတ်ႈတႆး ” – ဝႃႈၼႆဝႆႉ။

တႃႇတေၶွတ်ႇၽွတ်ႈ ၸုမ်းၶွၼ်ႊၵရႅတ်ႉၵူၼ်းၼုမ်ႇတႆး ၼႆႉမႃးၵေႃႈ လႆႈၸတ်းပၢင်ႁူမ်ႈတုမ်ၵူၼ်းၼုမ်ႇတႆး မိူဝ်ႈ ဝၼ်းတီႈ 13/05/2024– 15/05/2024 ၶၢဝ်းတၢင်း 3 ဝၼ်း တီႈလႅၼ်လိၼ်တႆးထႆး တီႈၼိုင်ႈ။

ငဝ်းလၢႆးမိူဝ်ႈလဵဝ်သမ်ႉ လွင်ႈၶဵင်ႇတႃႉၵၢၼ်မိူင်းလႄႈ ၶႂ်ႈတုၵ်းယွၼ်းထိုင် ၽူႈၼမ်းၵၢၼ်လုၵ်ႉၽိုၼ်ႉလူင်တႃႇၸိူဝ်းၶိူဝ်းတႆးတင်းသဵင်ႈ လႄႈ ဢိၵ်ႇတင်း ၸုမ်းၵူၼ်းၼုမ်ႇတႆး ၊ ၽူႈတူင်ႉၼိုင်ၵၢၼ်မိူင်းတႆး တင်းသဵင်ႈ ႁႂ်ႈလႆႈႁူမ်ႈၵၼ်သေ ၵွင်ႉသၢၼ်တင်းၸုမ်းၼႆႉၵႂႃႇသေၵမ်း – ၼႆ ၼႂ်းလိၵ်ႈပိုၼ်ၽၢဝ်ႇ DYC ၼၼ်ႉပႃးဝႆႉၼင်ႇၼႆ။