ၵူၼ်းမိူင်း 132 ၵေႃႉ ဢွၼ်ၵၼ်ပၢႆႈၽေးသိုၵ်း ဢွၵ်ႇမႃးသွၼ်ႈဝႆႉတီႈ ဢိူင်ႇမၢၼ်ႈၸၢမ် – မိူင်းမူႉ ၸႄႈဝဵင်းၼမ်ႉတူႈ ထႅင်ႈ ယွၼ်ႉၸုမ်းသိုၵ်းဢူၺ်းလီ တင်း RCSS ပဵၼ်ပၢင်တိုၵ်းၵၼ် ဝႃႈၼႆ။

ဝၼ်းတီႈ 05/08/2018 ယၢမ်းၵၢင်ၼႂ် TNLA တင်း RCSS ပဵၼ်ပၢင်တိုၵ်းၵၼ်ႁိမ်း ဝၢၼ်ႈပၢင်ၵုတ်ႇ ဢိူင်ႇ ပၢင်သေႃႉ ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ၵူၼ်းမိူင်း ဝၢၼ်ႈၵွင်းႁုင်း ၊ ဝၢၼ်ႈသၢမ်ၶႃ ဢိၵ်ႇထႅင်ႈ လၢႆလၢႆဝၢၼ်ႈ ဢွၼ်ၵၼ်ပၢႆႈဢွၵ်ႇမႃးသွၼ်ႈဝႆႉတီႈ ဢိူင်ႇမၢၼ်ႈၸၢမ် – မိူင်းမူႉ ဝႃႈၼႆ။

လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၾၢႆႇၸွႆႈထႅမ်ၵူၼ်းပၢႆႈၽေးသိုၵ်း ၸႄႈဝဵင်းၼမ်ႉတူႈ လၢတ်ႈတီႈ ၽူႈတွႆႇ ႁွၵ်ႈဝႃႈ “ ၵူၼ်းပၢႆႈၽေးဢၼ်ႁွတ်ႈၽႅဝ်တီႈ ဢိူင်ႇမၢၼ်ႈၸၢမ် မိူင်းမူႉၼၼ်ႉ ပဵၼ်ၵူၼ်းဝၢၼ်ႈ ဢၼ်ယူႇ ၸွမ်းသၢပ်ႇ တၢင်း ၸိူဝ်းၼၼ်ႉ လုၵ်ႉတီႈဝၢၼ်ႈပၢင်လူင် မႃးတၢင်းၾၢႆႇ ဝၢၼ်ႈၵွင်းႁုင်း ဝၢၼ်ႈသၢမ်ၶႃ ၶဝ်ၸိူဝ်းၼႆႉ ပၢႆႈမႃးမီးတီႈ မၢၼ်ႈၸၢမ် မီး 132 ၵေႃႉ” ဝႃႈၼႆ။

သိုပ်ႇလၢတ်ႈဝႃႈ မိူဝ်ႈၼႆႉတႄႉ သဵင်ၵွင်ႈဢမ်ႇတႅၵ်ႇၼင်ႇၵဝ်ႇ တေလႆႈဝႃႈလီဝႆႉယူႇ။ မိူဝ်ႈဝႃး ၵူၼ်းပၢႆႈၽေးႁဝ်းၶႃႈ ဢွၼ်ၵၼ်ပွၵ်ႈမိူဝ်းၵႂႃႇ ထူဝ်ႈ 2 လမ်း။ တေလႆႈဝႃႈ ၵူၼ်းပၢႆႈၽေးႁဝ်း မိူဝ်းမိူဝ်းမႃးမႃးၼၼ်ႉၶႃႈယဝ်ႉ ပေႃးပၢင် တိုၵ်း ယဵၼ်ၼႆၵေႃႈ ဢွၼ်ၵၼ်မိူဝ်းသေ ပေႃးငဝ်းလၢႆးဢမ်ႇၶႂ်ႈလီၼႆၵေႃႈ ဢွၼ်ၵၼ်ဢွၵ်ႇမႃး။ ၵူၺ်းၵႃႈ ဢွၵ်ႇမႃးတင်းမူတ်း တႄႉ တေဢမ်ႇမီးၼင်ႇၵဝ်ႇ ယွၼ်ႉဝႃႈ ပႂ်ႉႁိူၼ်း/ ပႂ်ႉဝၢၼ်ႈၽွင်ႈ ဢွၵ်ႇမႃးၽွင်ႈ။ ဢၼ်ဢွၵ်ႇမႃး ၵမ်ႈၼမ် ပဵၼ်လုၵ်ႈ ဢွၼ်ႇ ၼၢင်းယိင်း လႄႈ ၵူၼ်းထဝ်ႈ။ ၵူၼ်းမိူင်းဢၼ်ပႂ်ႉ တီႈဝၢၼ်ႈၼၼ်ႉ ယွၼ်ႉၵူဝ်ၶူဝ်းႁေႃၶူဝ်း ႁိူၼ်းလူႉႁၢႆၵေႃႈပိူင် ၼိုင်ႈ ဢွၼ်ၵၼ်ပႂ်ႉ” ဝႃႈၼႆ။

တၢင်းပွတ်းဢိူင်ႇပၢင်လူင်၊ ဢိူင်ႇပၢင်သေႃႉၼႆႉ သိုၵ်းမၢၼ်ႈ၊ သိုၵ်း TNLA, သိုၵ်း SSPP, သိုၵ်း RCSS တူင်ႉၼိုင်ၵႂႃႇမႃး လိူဝ်ၼၼ်ႉ ၵႆႉလႆႈၶဵင်ႈၶႅင်ၵၢၼ်သိုၵ်းတေႃႇၵၼ်ယူႇတႃႇသေႇ။ ၵဵဝ်ႇၵပ်းလွင်ႈၼႆႉ ၵူၼ်းမိူင်း ၼႂ်းပိုၼ်ႉတီႈ လႆႈဢွၼ် ၵၼ်ဢွၵ်ႇယၢၼ်ႁိူၼ်းယေး ၼပ်ႉႁူဝ်ပၢၵ်ႇ ဝႃႈၼႆ။

ၼႂ်းႁူဝ်လိူၼ်ဢေႃႊၵၢတ်ႊၼႆႉၵူၺ်း ၵူၼ်းမိူင်း ဢိူင်ႇပၢင်လူင် ၸႄႈဝဵင်းၼမ်ႉတူႈ ဢွၼ်ၵၼ်ပၢႆႈၽေးႁွတ်ႈၽႅဝ်ၵႂႃႇ တၢင်းၸႄႈဝဵင်းသီႇပေႃႉ ႁူဝ်ၵူၼ်းၼပ်ႉပၢၵ်ႇသေတႃႉ ၵမ်ႈၼမ်တႄႉပွၵ်ႈၶိုၼ်းဝၢၼ်ႈၽႂ်မၼ်းယဝ်ႉ ဝႃႈၼႆ။