မိူဝ်ႈဝၼ်းတီႈ 11/06/2025 ယၢမ်းၵၢင်ၼႂ် ၶႃႈႁၢပ်ႇၵၢၼ် တႂ်ႈသိုၵ်းမၢၼ်ႈ 3 ၵေႃႉ ထုၵ်ႇၸုမ်းဢမ်ႇႁူႉၾၢႆႇ တီႉၺွပ်းၵႂႃႇ တီႈၼိူဝ်သဵၼ်ႈတၢင်း တူၼ်ႈတီး – ယႂႃႇငၢၼ်ႇ ၸိုင်ႈတႆးပွတ်းၸၢၼ်း တေႃႇထိုင်ယၢမ်းလဵဝ် ပႆႇ ႁူႉဝႃႈ ပဵၼ်ၸုမ်းလႂ်တီႉၺွပ်းၵႂႃႇ။
ၵူၼ်းပိုၼ်ႉတီႈ ဝဵင်းယႂႃႇငၢၼ်ႇ လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈဢေႃႈ ၊ ၶႃႈႁၢပ်ႇၵၢၼ်ၶုၼ် တီႈလုမ်းၽွင်း ငမ်းၵူႈလွင်ႈလွင်ႈ ထုၵ်ႇၺွပ်းၵႂႃႇ 3 ၵေႃႉ။ ထၢင်ႇတႄႉ ပဵၼ်ၸုမ်း PDF ၶဝ်ၵူၺ်း ၺွပ်းၵႂႃႇ။ လွင်ႈၼႆႉ ႁဝ်း ၶႃႈ ပႆႇယိုၼ်ယၼ်။ တေပဵၼ်လွင်ႈ တႃႇၾိုၵ်းၵၢၼ်သိုၵ်းၼႆႉၵူၺ်း ထၢင်ႇတႄႉ။ ဢၼ်ထုၵ်ႇတီႉၺွပ်းၵႂႃႇ ၼၼ်ႉ ပဵၼ်ၸၢႆးႁႃႉယိင်းႁႃႉ ယင်းပႆႇႁူႉၶႃႈ”- ဝႃႈၼႆ။
ဝၢႆးလင် ၶႃႈႁၢပ်ႇၵၢၼ် တႂ်ႈသိုၵ်းမၢၼ်ႈ ထုၵ်ႇတီႉၺွပ်းၵႂႃႇယဝ်ႉ ၾၢႆႇသိုၵ်းမၢၼ်ႈ ဢဝ်ဢဵၼ်ႁႅင်းၸမ် 100 ထူဝ်းသိုၵ်း ၶဝ်ႈၼႂ်းဝၢၼ်ႈမျႃႉသေႇတီႇ (မြစေတီ) လႄႈ မျႃႉတဵင်းတၢၼ်ႇ (မြန်သိန်းတန်) ။ မိူဝ်ႈဝၼ်း တီႈ 12/01/2025 ၼၼ်ႉၵေႃႈ ၾၢႆႇသိုၵ်းမၢၼ်ႈ ၶဝ်ႈပၵ်းတပ်းၼႂ်းဝၢၼ်ႈသေ လႄႇသွၵ်ႈတဝ်ႈႁိူၼ်း ယေးၵူၼ်း ဝၢၼ်ႈ ဝႃႈၼႆ။
“တေႃႈလဵဝ် ၾၢႆႇတၢင်းဝၢၼ်ႈမျႃႉသေႇတီႇၼၼ်ႉ ၾၢႆႇသိုၵ်းမၢၼ်ႈ ဢဝ်ဢဵၼ်ႁႅင်းၸမ် 100 ၶဝ်ႈပၵ်းတပ်ႉဝႆႉ ၊ ယဝ်ႉၵေႃႈ ၶဝ်ႈသွၵ်ႈတဝ်ႈၼႂ်းႁိူၼ်းယေးၵူၼ်းမိူင်း ၊ ပေႃးသိုၵ်းမၢၼ်ႈၶဝ်ႈပၵ်းတပ်ႉၸိူင်ႉၼၼ် ၵူၼ်းပိုၼ်ႉ တီႈၵေႃႈ ၵႂႃႇမႃးႁႃၵိၼ်ယၢပ်ႇဢေႃႈ။ တၢင်းဝၢၼ်ႈမျႃႉတဵင်းတၢၼ်ႇၼႆႉၵေႃႈ သိုၵ်းမၢၼ်ႈၶဝ်ႈဢဝ်တီႈယူႇဝႆႉ မိူၼ်ၵၼ်”- ၵူၼ်းပိုၼ်ႉတီႈ ဝဵင်းယႂႃႇငၢၼ်ႇ သိုပ်ႇလၢတ်ႈၼႄၼင်ႇၼႆ။
တေႃႇထိုင်ဝၼ်းမိူဝ်ႈၼႆႉ ၾၢႆႇသိုၵ်းမၢၼ်ႈ ထႅမ်ႁႅင်းသိုၵ်း ၶဝ်ႈၼႂ်းမူႇဝၢၼ်ႈ ဢၼ်မီးၾၢႆႇဢွၵ်ႇဝဵင်းယႂႃႇငၢၼ်ႇ ၼၼ်ႉသေ ၶဝ်ႈပၵ်းတပ်ႉၼႂ်းဢိူင်ႇၼႂ်းဝၢၼ်ႈဝႆႉ ဝႃႈၼႆ။
ၼႂ်းဝၼ်းတီႈ 13/06/2025 ပူၼ်ႉမႃးၼႆႉ ၵေႃပွင်ၵၢၼ်တႅၼ်းတၢင်သၽႃးမိူင်းႁူမ်ႈတုမ် (CRPH) တႅပ်း တတ်းပၵ်းပိူင် တေဢဝ်လိူင်ႈ ၵူၼ်းဢမ်ႇၶဝ်ႈႁူမ်ႈႁဵတ်းသၢင်ႈ ၼႂ်းၵၢၼ်ႁဵတ်း CDM ၵႂႃႇ ဝႃႈၼႆ။
ဝၢႆးတႅပ်းတတ်းပၵ်းပိူင်ႇၼၼ်ႉယဝ်ႉ ၼႂ်းဝၼ်းတီႈ 15/06/2025 ယၢမ်းၵၢင်ၼႂ် 9 မူင်းၼၼ်ႉ မေႃယွၼ်လႄႈ တင်းၽူဝ်မၼ်းၼၢင်း ၺႃးၵွင်ႈယိုဝ်းတၢႆထင်တီႈ ၼႂ်းၸႄႈဝဵင်းၺွင်ႇဢူး တိူင်းဝဵင်းလိူဝ်ႇ (မၼ်းတလေး) ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ