ယိူင်းဢၢၼ်း ၼင်ႇႁိုဝ်ၸႂ်ႁၵ်ႉၸိူဝ်ႉၸၢတ်ႈ တေမၼ်ႈၵိုမ်း ၼႆသေ ၸၢဝ်းထၼေႃႉ ၸတ်းႁဵတ်း ပွႆးဝၼ်း ၸိူဝ်ႉၸၢတ်ႈၵမ်းႁႅၵ်ႈ တီႈၵျွင်းမုၼ်ၸဝ်ႈ ဝၢၼ်ႈတွင်ႇပူဝ်ႉလႃႉ (တောင်ပို့လှ) ၼႂ်းၸႄႈဝဵင်းၵၢတ်ႇလေႃႉ ၸိုင်ႈတႆးပွတ်းၸၢၼ်း။

ပွႆးဝၼ်းၸိူဝ်ႉၸၢတ်ႈၸၢဝ်းထၼေႃႉၼႆႉ ၸတ်းႁဵတ်း ၼႂ်းဝၼ်းတီႈ 8 – 10 / 3/2025   ၶၢဝ်းတၢင်း 3 ဝၼ်း  ။ ဝၼ်းၼၼ်ႉ  ၵူၼ်းၶဝ်ႈႁူမ်ႈ မီးၸမ် 4000 ၵေႃႉ  ။

ၼၢင်းသိၼ်ႇမႃႇ (ၸၢဝ်းထၼေႃႉ ) လၢတ်ႈၽူႈတွႆႇႁွၵ်ႈဝႃႈ – “ ပဵၼ်တႃႇၸၢဝ်းထၼေႃႉ တေမီးၸႂ်ႁၵ်ႉ ၸိူဝ်ႉ ၸၢတ်ႈ၊ ၼင်ႇႁိုဝ် တေမၢႆတွင်းလႆႈ ပိုၼ်း ၸၢဝ်းထၼေႃႉ၊ ၼင်ႇႁိုဝ် တေႁၵ်ႉသႃ လွင်ႈၾိင်ႈငႄႈ ၾိင်ႈ ထုင်းလႄႈ ပၢႆးမွၼ်း ၸၢဝ်းထၼေႃႉ။ ၵွပ်ႈၼႆလႄႈတႃႇႁႂ်ႈၵူၼ်းၸၢဝ်းထၼေႃႉတင်းသဵင်ႈ မႃးႁူမ်ႈၵၼ် ၼႂ်းပွႆးဝၼ်းၸိူဝ်ႉၸၢတ်ႈ ၼႂ်းဝၼ်းပွႆးၼၼ်ႉ  တွၼ်ႈသူးပၼ်ပႃးသင်ၶၸဝ်ႈလႄႈ ၵူၼ်းဢွင်ႇပူၼ်ႉ ၸၼ်ႉသိပ်း ”- ဝႃႈၼႆ ။

ၸၢဝ်းထၼေႃႉၼႆႉယၢမ်းလဵဝ် ႁူဝ်ၵူၼ်းမီး  4000 ပၢႆ ၊ ယူႇသဝ်းဝႆႉတီႈဝၢၼ်ႈ  ဝၢၼ်ႈတွင်ႇပူဝ်ႉလႃႉ၊ ဝၢၼ်ႈတိတ်ႉဢႄးၵဵတ်ႉ၊ ဝၢၼ်ႈၶျွင်းၶျႃး  ၼႂ်းၸႄႈဝဵင်းၵၢတ်ႇလေႃႉလႄႈ ဝၢၼ်ႈၼွင်ဢႅၼ်ႇၸၢၼ်း၊ ဝၢၼ်ႈၼွင်ဢႅၼ်ႇႁွင်ႇ   ႁိမ်းဝဵင်း ဢေးတႃႇယႃႇ လႄႈ ဝၢၼ်ႈတိတ်ႉပိၼ်ထွင်ႇ ( သစ်ပင်ထောင် ) ၼႂ်းၸႄႈဝဵင်းတူၼ်ႈတီး။

“မိူဝ်ႈဢွၼ်တၢင်း ၸၢဝ်းထၼေႃႉၼႆႉ ၵိုတ်းဝႆႉၵႂၢမ်းလၢတ်ႈမၼ်းဢၼ်လဵဝ်ၵူၺ်း ၊ လိၵ်ႈ  ၶူဝ်းၼုင်ႈတင်းဝႆၸိူဝ်းၼႆႉဢမ်ႇမီးယဝ်ႉ။  တႄႇ2018 မႃးၼႆႉ ၶတ်းၸႂ်တႃႇမၵ်းမၼ်ႈ ၶူဝ်းၼုင်ႈၸၢဝ်းထၼေႃႉသေ 2023 မႃးၼႆႉတႄႉ မၵ်းမၼ်ႈပဵၼ်သီၶွင်ႇလႄႈ ၊ သီမူၼ်ႇ မႃး ၊ ဝၢႆးၼၼ်ႉ ၵူၼ်းၸၢဝ်းထၼေႃႉၵေႃႈ သူၼ်ၸႂ် ၵၢၼ်ၸိူဝ်ႉၸၢတ်ႈမႃးၶိုၼ်း ”ဝႃႈၼႆ ။

ယၢမ်းလဵဝ်ၵေႃႈ ၶတ်းၸႂ်တႃႇပိုၼ်ၽႄႈ လိၵ်ႈထၼေႃႉလႄႈ ဝၢႆးၼႆႉမႃးတေသွၼ်ႁဵၼ်းလိၵ်ႈထၼေႃႉ  ၶႆႈႁႂ်ႈၵူၼ်းၸၢဝ်းထၼေႃႉ မေႃႁၵ်ႉၸိူဝ်ႉၶိူဝ်းလႄႈ ႁၵ်ႉလိၵ်ႈၸၢဝ်းၶိူဝ်းၸဝ်ႈၵဝ်သေ ၊ တႃႇႁႂ်ႈၸိူဝ်ႉၶိူဝ်းဢမ်ႇႁၢႆ ၼၼ်ႉတေႁၵ်ႉသႃၵႂႃႇ ဝႃႈၼႆ။

“ၵူၼ်းၸၢဝ်းထၼေႃႉၼႆႉၵမ်ႈၼမ်တေဢမ်ႇႁူႉ ၊ ၵူၼ်းယူႇတင်းၸိုင်ႈတႆး ပွတ်းၸၢၼ်းတင်းဢမ်ႇပေႃး ႁူႉၵၼ် ၊ ၶႆႈဝႃႈ ပဵၼ်ၸၢဝ်းၶိူဝ်း ဢၼ်တေမွတ်ႇႁၢႆ ၊ ယွၼ်ႉၼၼ် ၶႂ်ႈႁႂ်ႈ  ၸၢဝ်းထၼေႃႉလၢတ်ႈၵႂၢမ်းထၼေႃႉ ၊ ၼုင်ႈၶူဝ်းထၼေႃႉ ၊ ၶႆႈႁႂ်ႈႁၵ်ႉသႃၵႂႃႇ”- ဝႃႈၼႆ ။

ၵဵဝ်ႇၵပ်းလွင်ႈ ၶိုၼ်ႈယႂ်ႇႁုၼ်ႈမုၼ်းပိုၼ်ႉတီႈ၊ ၵၢၼ်ပၢႆးပၺ်ႇၺႃႇ လႄႈ သုၼ်ႇလႆႈသုၼ်ႇပဵၼ်ၸၢဝ်းၶိူဝ်းၸိူဝ်းၼႆႉၵေႃႉ  သုမ်းတိုဝ်ႉတၢင်းဝႆႉတၢင်းၼမ်ၼႆ ၸၢဝ်းထၼေႃႉ လၢတ်ႈဝႆႉၼင်ႇၼႆ။

တီႈပၢင်ပွႆးဝၼ်းၸိူဝ်ႉၸၢတ်ႈၸၢဝ်းထၼေႃႉၼၼ်ႉ ၸုမ်းၸၢဝ်းၶိူဝ်းတႆး၊  တႆးၼွင်၊ ထၼု၊ ပဢူဝ်း၊ တွင်ႇလိူဝ်း ၸိူဝ်းၼႆႉၵေႃႈ ၶဝ်ႈႁူမ်ႈၸွမ်း ၼႆယဝ်ႉ။