ၸဝ်ႈၶုၼ်သႃႇ ၵေႃႈလီ၊ ၸဝ်ႈၵၢၼ်းယွတ်ႈ ၵေႃႈလီ၊ ၸဝ်ႈသင်ႇၶ ၵေႃႈလီ၊ ၸဝ်ႈႁၵ်ႉၸၢတ်ႈၵူၼ်းမိူင်းလႂ် ၵေႃႈလီ၊ ဢၼ်ဢမ်ႇလီၼႆႉ ပဵၼ်မၢၼ်ႈၶႂၢၵ်ႈမိူင်းၵူၺ်း။

ၵွပ်ႈၼၼ် ၶေႃႈၵႂၢမ်းၸိူဝ်းၼႆႉ ႁႂ်ႈသူၸဝ်ႈဝူၼ်ႉၸွမ်းႁပ်ႉႁွင်းပွင်ႇၸႂ်သေၵမ်း။ ယုၵ်ႉႁႂ်ႈတွၼ်းၵႄး မႄးႁႂ်ႈလီ၊ သီႁႂ်ႈၵဵင်ႈ၊ ၶဵင်ႈႁႂ်ႈၶိုၼ်ႈ၊ ယိုၼ်ႈႁႂ်ႈထိုင်၊ ၶိုင်ႁႂ်ႈၸိုဝ်ႈ၊ သိုဝ်ႈႁႂ်ႈလတ်း၊ တႅပ်းတတ်းႁဵတ်းၵၢၼ် ၸိုင်ႈမိူင်းတႆးၼႆႉ ဢမ်ႇလူဝ်ႇပႂ်ႉဝၼ်းလိူၼ်ပီ၊ တိုၼ်းတၼ်းၶိုတ်းၵွၼ်းၶေႃ ၵမ်းလဵဝ်ဢမ်ႇႁၢင်ႉ။

ၵႃႇၵွၼ်ႇပူၼ်ႉမႃး မိူဝ်ႈဢွၼ်တၢင်းၼႆႉ ပိူၼ်ႈဝႃႈထႅင်ႈ 5-10 ပီၵူၺ်း မိူင်းတေလႅင်းယဝ်ႉ။ ယၢမ်းလဵဝ်ၼႆႉသမ်ႉ ထႅင်ႈ 2-3 ပီ မိူင်းၸင်ႇတေလႅင်းၼႄႇ? ပဵၼ်ႁိုဝ်ၵေႃႈယဝ်ႉ ပဵၼ်ၵဝ်ႉၵေႃႈယႃႇ၊ ပဵၼ်ၵူမ်ႇၶီႈမႃႇၵေႃႈတိူင်း။ “တၢင်းၶတ်းၸႂ်ယူႇတီႈၵူၼ်း၊ တၢင်းဢွင်ႇပေႉ ယူႇတီႈၾႃႉၽီတႅပ်းတတ်း” ၼႆၼၼ်ႉယဝ်ႉ။

ယိူင်းမၢႆသုင်သုတ်းႁဝ်း ထိုင်တီႈယွတ်ႈႁွတ်ႈတီႈပၢႆၵေႃႈလီ ဢမ်ႇထိုင်ၵေႃႈယႃႇ၊ ဢိင်ၼိူဝ် ပုၼ်ႈၽွၼ်း ပိုၼ်းပၼ်မီးမႃးၼၼ်ႉ ၼမ်ႉၵတ်ႉတၢင်းၶတ်းၸႂ်ႁဝ်းမီးၵႃႈႁိုဝ်ၵေႃႈ ႁူႉတေလႆႈႁဵတ်း “မႁႃႇၸၼၵလုၺ်း ၼမ်ႉပၢင်ႇလၢႆႇ” သေ သိုပ်ႇႁဵတ်းသၢင်ႈၶိုင်ပွင်ၵႂႃႇဢမ်ႇႁၢင်ႉ။

ၸဝ်ႈၶမ်း 02/01/1996 (ၶေႃႈမုလ်း ပပ်ႉၵွၼ်းၶေႃ မၢႆ – 139 ပီ 1996)