ၽႅၼ်ႇလိၼ်ဝႆၼႂ်းၸိုင်ႈတႆးပွတ်းၸၢၼ်း တၢင်းႁႅင်း 4.5 ရိၵ်ႊတိူဝ်ႊ၊ ႁဵတ်းႁႂ်ႈၵူၼ်းၼႂ်းၸႄႈတွၼ်ႈတူၼ်ႈတီး လၢင်းၶိူဝ်း၊ လွႆလႅမ် မႆႈၸႂ်ၵူဝ်ၼႂ်းပိုၼ်ႉလိၼ်မီးႁွႆးၽႅၼ်ႇလိၼ်ဝႆ ဝႃႈၼႆ။

ဝၼ်းတီႈ 01/07/2018 ယၢမ်းၵၢင်ၶမ်ႈ 9:41 မူင်းၼၼ်ႉ ၽႅၼ်ႇလိၼ်ဝႆတီႈတၢင်းၾၢႆႇၸဵင်ႇၸၢၼ်းဝၼ်းဢွၵ်ႇ ဝဵင်း လၢင်းၶိူဝ်း ယၢၼ်ၵႆမွၵ်ႈ 5 လၵ်း။ သၼ်ႇယွၼ်ႈထိုင်ၸႄႈဝဵင်းမိူင်းၼၢႆး၊ မွၵ်ႇမႆႇ၊ မိူင်းပၼ်ႇ၊ ၼမ်ႉၸၢင်၊ ၶူဝ်လမ်၊ ၵဵင်း တွင်း ပႃးၸဵမ်ၼႂ်းၸႄႈတွၼ်ႈလွႆလႅမ်၊ တူၼ်ႈတီး။

လုင်းၶမ်းၸၢႆး ထုင်ႉဝၢၼ်ႈႁၢတ်ႇလၢင်းၶိူဝ်းလၢတ်ႈဝႃႈ – ထုင်ႉႁဝ်းၶႃႈၼႆႉၽႅၼ်ႇလိၼ်ၸိူင်ႉၼႆ ဢမ်ႇတွၼ်ႉယၢမ်ႈငိၼ်း ယၢမ်ႈမီးလႄႈၵူဝ်မီးသၢႆၽႅၼ်ႇလိၼ်ဝႆ၊ ၵူဝ်မၼ်းၵႆႉၵႆႉဝႆ၊ လီမႆႈၸႂ်ယူႇဢေႃႈ- ဝႃႈၼႆ။

ၽႅၼ်ႇလိၼ်ဝႆၵမ်းၼႆႉ ဢမ်ႇၵွမ်ႉၵႃႈၼႂ်းၸိုင်ႈတႆးၵူၺ်း၊ ဝႆပႃးၼႂ်းယၢင်းလႅင်၊ လႅၼ်လိၼ်ထႆး ၸိူဝ်းၼႆႉ ဝႃႈၼႆ။