ၵူၼ်းမိူင်း 400 ပၢႆ လၢႆၸႄႈဝဵင်း ၼႂ်းၸိုင်ႈတႆးပွတ်းၸၢၼ်း ထုၵ်ႇဢဝ်ၼမ်ႉမုၵ်ႈ ၼမ်ႉလၢႆး ၵူတ်ႇထတ်းၸိူဝ်ႉမႅင်းၶူဝ်ႊဝိတ်ႉ 19 ဝႆႉတီႈတႃႈၵုင်ႈ။
ဝၼ်းတီႈ 18/6/2020 ယၢမ်းႁူဝ်ၶမ်ႈ ယူႇတီႈၾၢႆႇမေႃယႃ လႆႈၵဵပ်းဢဝ်ၼမ်ႉမုၵ်ႈၼမ်ႉလၢႆး ၸိူဝ်းၶဝ်ဢၼ်ၵုမ်းတူဝ်ဝႆႉ တင်းမူတ်း 470 ပၢႆ သူင်ႇၵူတ်ႇထတ်းၸိူဝ်ႉမႅင်းၶူဝ်ႊဝိတ်ႉ 19 ဝႆႉတီႈႁွင်ႈၵၢၼ်ပၢႆးယူႇလီ တီႈတႃႈၵုင်ႈ ၼႆယဝ်ႉ။
ၻွၵ်ႊတိူဝ်ႊၼိၼ်းဢိၽိဝ်ႇ ၵႅမ်ၽူႈၸီႉသင်ႇ ႁွင်ႈၵၢၼ်ၾၢႆႇၽဵဝ်ႈမူၺ်ႉတၢင်းပဵၼ်ၸပ်းငၢႆႈ ၸႄႈမိူင်းတႆး လၢတ်ႈတီႈ ၽူႈတွႆႇႁွၵ်ႈဝႃႈ “ၵူၼ်း 470 ၵေႃႉၼၼ်ႉ ပဵၼ်ၵူၼ်းၸိူဝ်း ထုၵ်ႇၵၵ်းတူဝ်ဝႆႉ ။ ၼႂ်းၼၼ်ႉ ပႃးၵူၼ်းၵၢတ်ႇလေႃႉ ၵေႃႉၼိုင်ႈ။ မိူဝ်ႈဝႃး ယၢမ်းၵၢင်ၶမ်ႈၼႆႉ လႆႈသူင်ႇၼမ်ႉမုၵ်ႈၼမ်ႉလၢႆး ၸူးတီႈ NHL (ပၢႆးယူႇလီတီႈတႃႈၵုင်ႈ) ယဝ်ႉ” ဝႃႈၼႆ။
ၸိူဝ်းထုၵ်ႇသူင်ႇၼမ်ႉမုၵ်ႈၼမ်ႉလၢႆးၵူတ်ႇထတ်းတၢင်းပဵၼ်ဝႆႉၼႆႉပဵၼ်ၵူၼ်း တူၼ်ႈတီး၊ ယွင်ႁူၺ်ႈ၊ လွၵ်ႉၸွၵ်ႇ၊ ၵၢတ်ႇလေႃႉ၊ ႁူဝ်ပူင်း၊ သီႇသႅင်ႇ၊ ပၢင်လွင်း၊ ၾၢႆၶုၼ်ႇ၊ လွႆလႅမ်၊ ၵေးသီး၊ မိူင်းသူႈ၊ လၢင်းၶိူဝ်း၊ မိူင်းပၼ်ႇ၊ မွၵ်ႇမႆႇ၊ မိူင်းၼၢႆးလႄႈ ၼမ်ႉၸၢင် ၸိူဝ်းၼႆႉ။
“ဢၼ်လႆႈသူင်ႇၵႂႃႇၵူတ်ႇထတ်းတင်းမူတ်း 473 ၵေႃႉၼၼ်ႉ ႁူမ်ႈပႃးၵူၼ်းတိတ်းၸပ်းၸိူဝ်ႉမႅင်းဝႆႉ 2 ၵေႃႉ” ၻွၵ်ႊတိူဝ်ႊၼိၼ်းဢိၽိဝ်ႇ လၢတ်ႈၼႄၼင်ႇၼႆ။
တေႃႇထိုင် ဝၼ်းတီႈ 18/6/2020 ၼႆႉ ၵူၼ်းမိူင်းတႆးပွတ်းၸၢၼ်း ဢၼ်သူင်ႇၼမ်ႉမုၵ်ႈၼမ်ႉလၢႆး ၵူတ်ႇထတ်းဝႆႉတီႈတႃႈၵုင်ႈၼၼ်ႉ ယၢမ်းလဵဝ် ဢွၼ်ၵၼ်ပႂ်ႉၵႂၢမ်းတွပ်ႇဝႆႉ မီး 800 ပၢႆ ဝႃႈၼႆ။
