ၸၢႆးၸိူင်းၶႄႇ ၸိုဝ်ႈလိုဝ်းလင် ၸိုဝ်ႈႁွင်ႉ Wang Xing ႁၢႆၵႂႃႇတီႈၼႂ်းလိၼ်မိူင်းမၢၼ်ႈ ဢၼ်တေႃႇၼႃႈၵၼ် တင်းဝဵင်းမႄႈသွတ်ႇ ၸႄႈတွၼ်ႈတၢၵ်ႇ မိူင်းထႆး ႁၢႆလႆႈ 4 ဝၼ်းယဝ်ႉ ပလိၵ်ႈထႆး ၸင်ႇသွၵ်ႈႁႃႁၼ်တူဝ်ၶိုၼ်း ဝႃႈၼႆ။

ၶၢဝ်ႇထႆး ၶၢဝ်ႇသူတ်ႇ တႅမ်ႈတၢင်ႇပိုၼ်ၽၢဝ်ႇဝႆႉဝႃႈ ၸၢႆးၸိူင်း ၸိုဝ်ႈလိုဝ်းမိူင်းၶႄႇၼႆႉ ၽွင်းလုၵ်ႉမႄႈသွတ်ႇသေ ၶၢမ်ႈၶူဝ်လႅၼ်လိၼ်ၶဝ်ႈမိူင်းမၢၼ်ႈ မိူဝ်ႈဝၼ်းတီႈ 3/1/2025 သေႁၢႆၵႂႃႇ။ တိတ်းတေႃႇၵပ်းသိုပ်ႇဢမ်ႇလႆႈ။ ဝၼ်းမၼ်းၸၢႆးႁၢႆၵႂႃႇ ၼၼ်ႉ ၵေႃႉႁၵ်ႉမၼ်းၼၢင်းတႅမ်ႈတၢင်ႇ ၼိူဝ်သိုဝ်ႇၼႅင်ႈသၢၼ်၊ ထိုင်မႃးဝၼ်းတီႈ 6/1/2025 လုမ်းတၢင်မိူင်းၶႄႇ ဢၼ်မီးတီႈဝဵင်းၵဵင်းမႂ်ႇ ၸင်ႇပိုၼ်ၽၢဝ်ႇ ယိုၼ်ယၼ်ဝႃႈ မၼ်းၸၢႆးႁၢႆတႄႉတႄႉ ဝႃႈၼႆ။

ထိုင်မႃး ဝၼ်းတီႈ  7/1/2024 ၼႆႉ လႅင်ႇၶၢဝ်ႇပိုၼ်ႉတီႈ မႄႈသွတ်ႇ လၢတ်ႈဝႃႈ – “ၵူၼ်းသိုၵ်းတပ်ႉပႂ်ႉလႅၼ်လိၼ် BGF ၵပ်းသိုပ်ႇၾူၼ်းၸူး ၸဝ်ႈၼႃႈတီႈထႆးဝႃႈ – ႁၼ်တူဝ် ၸၢႆးၸိူင်းၶႄႇယဝ်ႉ၊ တေဢဝ်မွပ်ႈပၼ် ၶိုၼ်း ၼႂ်းမိုဝ်းၸဝ်ႈၼႃႈတီႈထႆး ၼႂ်းၶၢဝ်းယၢမ်းၵၢင်ဝၼ်း 2 မူင်း တီႈလႅၼ်လိၼ် ဝႃႈၼႆသေတႃႉ ၾၢႆႇၸဝ်ႈ ၼႃႈတီႈထႆးလၢတ်ႈဝႃႈ တေႃႇထိုင်ၶၢဝ်းယၢမ်း ဝၢႆးဝၼ်း 3 မူင်းၵေႃႈ ဢမ်ႇမႃးသူင်ႇ။ ၶိုၼ်းၵပ်းသိုပ်ႇမႃးဝႃႈ ၾၢႆႇတၢင်းၼေႇပျီႇတေႃႇ ထၢၼ်တပ်ႉသိုၵ်းမၢၼ်ႈ လၢတ်ႈဝႃႈ ပႆႇဢၼုယၢတ်ႈသူင်ႇတူဝ်ၶိုၼ်းၼႆလႄႈ ယွၼ်းသုတ်ႉၶၢႆႉၶၢဝ်းယၢမ်းသူင်ႇတူဝ်။ ၵူၺ်းၵႃႈ တေပဵၼ်ဝၼ်းလႂ်ၶၢဝ်းလႂ်တႄႉ ဢမ်ႇလၢတ်ႈမႃးတႅတ်ႈတေႃး။ ၵွပ်ႈၼႆ ယူႇတီႈၸဝ်ႈၼႃႈတီႈထႆးသေ ယိုၼ်ယၼ်ဝႃႈ တေႃႇထိုင်ၶၢဝ်းယၢမ်းဝၢႆးဝၼ်း 4 မူင်းၼႆႉ ပႆႇႁၼ်တူဝ် ၸၢႆးၸိူင်းၶႄႇ”- ဝႃႈၼႆ။

ၵူၺ်းၵႃႈ ဢၼ်သိုၵ်း  BGF ၶဝ်ၼႄႁၢင်ႈမၼ်းၶိုၼ်ႈမႃးတၢင်း သိုဝ်ႇဢွၼ်ႊလၢႆႊၼၼ်ႉတႄႉ ၸၢႆးၸိူင်းၶႄႇၼႆႉ ႁၢင်ႈၾၢင်ယွမ်သဝ်ႈ၊ ထႃႁူဝ်ဝႆႉ မိူၼ်ဢမ်ႇယူႇလီ။ ယွၼ်ႉသင် ပဵၼ်ႁိုဝ်တႄႉတႄႉၼႆ ဢမ်ႇပႆႇလႆႈႁူႉ ႁူဝ်ယွႆႈမၼ်း။

ၸၢႆးၸိူင်း Wang Xing ဢၼ်တင်းၼမ်ႁူႉၸၵ်းဝႃႈ Xing Xing ၼႆႉ ဝၼ်းတီႈ 3/1/2025 ၼၼ်ႉ လုၵ်ႉမိူင်းသျၢင်ႇႁၢႆး မႃးထိုင်မိူင်းထႆးသေ သိုပ်ႇၶၢမ်ႈၶူဝ်လႅၼ်လိၼ် ဢၢၼ်းတေၵႂႃႇတီႈမျႃႉဝတီႇ ဝဵင်းလူင်တီႈဢၼ်ၶႄႇ မႃးတင်ႈပၢင်တေႃႇလွင်းၼၼ်ႉ။ ဝၢႆးလင် ၶၢမ်ႈၶူဝ်လႅၼ်လိၼ်ယဝ်ႉ ဢဝ်မၼ်းၸၢႆးႁၢႆၵႂႃႇ လူၺ်ႈဢမ်ႇ ႁူႉတၢင်းၵႂႃႇ။